1 Ikhúúnꞌ ñajunꞌ Páblo̱, mbáa xa̱bo̱ tsí waxúngua̱a̱ꞌ neꞌne Jesukrísto̱ numuu rí xkuaꞌnii ndiyoo Ana̱ꞌlóꞌ. Ga̱jmi̱ꞌ dxájwalóꞌ Timotéo̱.

2 Na̱xu̱ꞌmá i̱yi̱i̱ꞌ ríge̱ꞌ ma̱ꞌga inúú xa̱bi̱i Ana̱ꞌlóꞌ tsí nanimbu̱únꞌ juyáá Krísto̱ ná xuajen Kolósa̱s.

Ana̱ꞌlóꞌ Mikhuíí jamí Tátiálóꞌ Jesukrísto̱* gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá.

3 Mbámbá rí nu̱tha̱n-jáñííxo̱ꞌ Ana̱ꞌlóꞌ ga̱jma̱á numalaꞌ, nu̱rígu̱uxo̱ꞌ gamaku inuu̱, Anu̱u̱ máꞌ Tátiálóꞌ Jesukrísto̱. 4 Numuu ni̱dxawíínxo̱ꞌ rí wéje̱ a̱kia̱nꞌlaꞌ ná inuu Krísto̱ Jesús, jamí rí nandalaꞌ ju̱ñu̱ú mbá xúgíin xa̱bi̱i Ana̱ꞌlóꞌ. 5 Rúꞌkhue̱n nu̱ne̱laꞌ numuu rí ga̱jma̱á mbá jañii a̱kia̱nꞌlaꞌ guáꞌthi̱ínlaꞌ rí mu̱drígúlaꞌ rí niyáxi̱i Ana̱ꞌlóꞌ maxnálaꞌ ná mikhuíí. Ikháanꞌlaꞌ ni̱dxawíínlaꞌ máꞌ rúꞌkhue̱n ga̱jma̱á majñu̱u̱ ajngáa gakon rí na̱ꞌkha̱ ná ajngáa máján, 6 rí ni̱ga̱nú asndo ná awúun a̱kia̱nꞌlaꞌ. Ikhaa ajngáa máján ríge̱ꞌ nagaja̱a̱ ne̱ jamí naꞌne ne̱ rí máján ná inuu mbá xúgíí numbaa. Xkuaꞌnii máꞌ eꞌne ne̱ ga̱jma̱á nindxa̱ꞌlaꞌ ikháanꞌlaꞌ asndo nákhí mbiꞌi rí ni̱dxawíínlaꞌ rí phú nandoo Ana̱ꞌlóꞌ jaꞌyalaꞌ jamí nifraꞌa̱ꞌlaꞌ rí gakon rúꞌkhue̱n. 7 Xkuaꞌnii ni̱ma̱ñalaꞌ ga̱jma̱á nindxu̱u̱ Epáfra̱s, yumbáá gajmiáxo̱ꞌ tsí phú nandaxo̱ꞌ ju̱ya̱á, mangaa máꞌ phú jmbii̱ rí ma̱ꞌnii̱ ñajuun Krísto̱ ga̱jma̱á numalaꞌ. 8 Ikhaa̱ niꞌthánxo̱ꞌ rí nandalaꞌ ju̱ñu̱ú xa̱bo̱ ga̱jma̱á numuu Xu̱u̱ꞌ Ana̱ꞌlóꞌ.

9 Ikhaa jngó, asndo nákhí máꞌ mbiꞌi rí ni̱dxawíínxo̱ꞌ rúꞌkhue̱n, tsíni̱ꞌñááxo̱ꞌ rí nu̱tha̱n-jáñííxo̱ꞌ Ana̱ꞌlóꞌ ga̱jma̱á numalaꞌ. Nu̱nda̱ꞌáa̱xo̱ꞌ rí mu̱ne̱-nuwiinlaꞌ mbá xúgíí rí naꞌne a̱kuii̱n rí ma̱gu̱ma. Xúꞌkhue̱n máꞌ rí ma̱ma̱ñalaꞌ jamí ma̱fraꞌa̱ꞌlaꞌ rí nasngájma Xu̱u̱ꞌ Ana̱ꞌlóꞌ. 10 Xkuaꞌnii kajngó ma̱juwalaꞌ xómá rí nandoo Táta̱, ma̱ni̱gu̱u̱ꞌ gáꞌne mbá xúgíí rí nu̱ne̱laꞌ, ma̱ri̱gá mbá xúgíí inii rí máján gúne̱laꞌ jamí ma̱gaja̱a̱ rí nu̱ne̱-nuwiin májánlaꞌ Ana̱ꞌlóꞌ. 11 Xúꞌkhue̱n máꞌ nu̱nda̱ꞌáa̱xo̱ꞌ rí ma̱ꞌne gúkuáanꞌlaꞌ ga̱jma̱á mbá xúgíí ski̱yu̱u̱ꞌ Ana̱ꞌlóꞌ rí phú wáá, kajngó ma̱ꞌngo̱o̱ a̱kia̱nꞌlaꞌ jamí ma̱wajún-gúkuálaꞌ inuu mbá xúgíí gaꞌkho̱. 12 Xkuaꞌnii kajngó gagi a̱kia̱nꞌlaꞌ gúrígu̱ulaꞌ gamaku inuu Ana̱ꞌlóꞌ, numuu rí ikhaa̱ niꞌnii̱ rí ma̱goo mu̱drígú mangáanꞌlaꞌ rí maxnúu̱ xa̱bii̱ tsí júwa̱ꞌ ga̱jma̱á aguu rí gakon. 13 Ana̱ꞌlóꞌ ni̱gu̱wiáanꞌlóꞌ ná ñawúun tsí ra̱májáan, jamí ni̱kaa̱ jaguáa̱nꞌlóꞌ rí maꞌthán-ñájwanlóꞌ A̱dée̱ tsí phú nandoo̱ jaꞌyoo̱. 14 Ga̱jma̱á numuu̱ ikhaa̱ waꞌtse̱-ri̱ñáaꞌlóꞌ numuu rí nijáñuu̱,* xkuaꞌnii neꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlóꞌ.

15 Ga̱jma̱á majñu̱u̱ Krísto̱ nakujma xómá jaꞌnii jayu Ana̱ꞌlóꞌ, tsí na̱nguá iyoo mbu̱ꞌyáálóꞌ ga̱jma̱á idalóꞌ.

Ikhaa̱ xtáa̱ máꞌ nákhí xóó tágu̱ma-ku̱maa numbaa.

16 Ga̱jma̱á majñu̱u̱ ikhaa̱ ni̱gu̱ma-ku̱maa mbá xúgíí rí ríga̱,

ná mikhuíí jamí ná numbaa,

rí nakujma jamí rí tsíkujma mbu̱ꞌyáálóꞌ.

Ga̱nindxúu̱n thúngaa, xa̱bo̱ ñajun, xa̱bo̱ ede̱ o xe̱ꞌ tsí nuthan-ñajun mbo̱ꞌ.

Mbá xúgíí ni̱gu̱ma-ku̱maa ga̱jma̱á ski̱yu̱u̱ꞌ,

jamí drígo̱o̱ máꞌ ikhaa̱ ñajuun ne̱.

17 Xtáa̱ máꞌ ikhaa̱ nákhí rí ni̱gu̱ma-ku̱maa numbaa,

jamí ga̱jma̱á ski̱yu̱u̱ꞌ ikhaa̱ mbá xúgíí ne̱ ríga̱ mújúun.

18 Xúꞌkhue̱n máꞌ ikhaa̱ ñajuu̱n xa̱bo̱ idxu̱ún tsí nanimbu̱únꞌ juyáa̱, tsí ñajúún xómá xuyuu̱.

Krísto̱ ñajuun tsí ginii jayu inuu mbá xúgíí,

jamí ikhaa̱ máꞌ ñajuu̱n tsí ginii jayu ndiyáa̱ mbiꞌyuu̱ nákhí kua̱ꞌa̱a̱n nijáñuu̱.

Ikhaa jngó ikhaa̱ ñajuu̱n tsí phú i̱tha̱án gíꞌdoo numuu̱ inuu mbá xúgíí.

19 Numuu rí Ana̱ꞌlóꞌ ndiyoo rí Krísto̱ ma̱nindxu̱u̱ mbá xúgíi jayu rí ñajuu̱n ikhaa̱.

20 Jamí ga̱jma̱á majñu̱u̱ Krísto̱ tsímáá nimbáxi̱iꞌ Ana̱ꞌlóꞌ ga̱jma̱á nindxu̱u̱ mbá xúgíí,

rí ríga̱ mikhuíí jamí rí ríga̱ ná numbaa.

Niꞌnii̱ rí ma̱juwalóꞌ tsímáá ga̱jma̱á majñu̱u̱ rí nijáñuu̱ ná ixe̱ krúsi̱.

21 Xúꞌkhue̱n máꞌ mangáanꞌlaꞌ, tsáanꞌ nijuwalaꞌ tsíngua̱ꞌ jamí ninindxa̱ꞌlaꞌ xa̱bo̱ sia̱nꞌ ná inuu Ana̱ꞌlóꞌ nákhí wajyúú, ga̱jma̱á numuu rí na̱ju̱ma̱ꞌlaꞌ jamí nu̱ne̱laꞌ rí xkawe̱ꞌ, Krísto̱ neꞌne rí tsímáá gámbáxi̱iꞌlaꞌ ga̱jma̱á nindxu̱u̱ Ana̱ꞌlóꞌ. 22 Rúꞌkhue̱n niꞌnii̱ nákhí ninindxu̱u̱ xa̱bo̱ numbaa jamí nijáñuu̱, kajngó ma̱ꞌne-jaꞌwáanꞌlaꞌ rí maxnáxáa̱nꞌlaꞌ ná inuu Ana̱ꞌlóꞌ jamí ma̱xáríga̱ nimbá rí ra̱máján mi̱ꞌthán ga̱jma̱á numalaꞌ. 23 I̱ndo̱ó máꞌ numuu rí gíꞌmaa rí ma̱wajún-gúkuálaꞌ jamí xa̱ꞌ ná tsu̱du̱u̱ rí nanimba̱ꞌlaꞌ ju̱ya̱á. Xúꞌkhue̱n máꞌ gíꞌmaa rí ga̱jma̱á mbá jañii a̱kia̱nꞌlaꞌ mu̱waꞌthi̱ínlaꞌ ma̱mba̱núu rí ni̱dxawíínlaꞌ máꞌ ga̱jma̱á numuu ajngáa máján. Ikhaa máꞌ ajngáa máján rúꞌkhue̱n nithán-raꞌa inuu mbá xúgíí numbaa, jamí ikhúúnꞌ, Páblo̱, ninindxu̱ꞌ xa̱bo̱ tsí naꞌthán-ráꞌa ne̱.

24 Rí xúge̱ꞌ rá, phú nadxuꞌ rí na̱mínu̱u̱ꞌ ga̱jma̱á numalaꞌ, numuu rí xkuaꞌnii naka-ra̱ne̱-gáxu̱u̱ ná xuyuꞌ rí ndaꞌyóo mamínu̱u̱ꞌ Krísto̱ ga̱jma̱á numúú tsí ñajúún xómá xuyuu̱, ikhiin tsí nanimbu̱únꞌ juyáa̱. 25 Ana̱ꞌlóꞌ ndiyoo rí ikhúúnꞌ ma̱nindxu̱ꞌ tsí nayumbáá ga̱jma̱á numúú tsí nanimbu̱únꞌ juyáá Jesús, jamí nixnángaweꞌ rí ma̱tha̱n-ráꞌalaꞌ mbá xúgíí jayu ajngóo̱. 26 Awan drígo̱o̱ Ana̱ꞌlóꞌ ríge̱ꞌ, rí i̱ndo̱ó máꞌ ikhaa̱ ni̱gi̱da̱ꞌ idxu̱u̱, ni̱gi̱ꞌdoo̱ ngu̱ꞌwo̱o̱ ne̱ asndo nákhí máꞌ wajyúú mbiꞌi. Xómáꞌ xúge̱ꞌ rá, nasngájmee̱ ne̱ kajngó mbuyáá ne̱ xa̱bii̱. 27 Ikhiin tsíge̱ꞌ ñajúún tsí niꞌgí-mina̱ꞌ Ana̱ꞌlóꞌ rí masngájmúú rí phú wáá rí ñajuun awan drígo̱o̱ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, rí maxnúu̱ xa̱bo̱ tsí ra̱ꞌkháa judío̱ ñajúún. Ikhaa awan rúꞌkhue̱n ñajuun ríge̱ꞌ: rí ma̱xtáa Krísto̱ ná awúun a̱kia̱nꞌlaꞌ, jamí rí ga̱jma̱á mbá jañii a̱kia̱nꞌlaꞌ mu̱waꞌthi̱ínlaꞌ rí ma̱juwalaꞌ ná tsímáá xtáa Ana̱ꞌlóꞌ.

28 Ikháanꞌxo̱ꞌ nu̱tha̱n-ráꞌaxo̱ꞌ ga̱jma̱á numuu Krísto̱ ído̱ rí nu̱tha̱n-múꞌúúnxo̱ꞌ mbá xúgíin xa̱bo̱ jamí nu̱sngúu̱nxo̱ꞌ ga̱jma̱á mbá xúgíí rí na̱ma̱ñaxo̱ꞌ eꞌne Ana̱ꞌlóꞌ. Nu̱ne̱xo̱ꞌ rúꞌkhue̱n kajngó mbá xúgíi̱n gánindxúu̱n xómá jaꞌnii jayu Krísto̱ ído̱ rí mu̱xna̱xíi̱nxo̱ꞌ inuu Ana̱ꞌlóꞌ. 29 Ikhaa numuu rúꞌkhue̱n phú gakhe̱ na̱ñajunlo̱ꞌ, kajngó ma̱kujma rí Krísto̱ xtáa̱ ga̱jma̱á nindxu̱ꞌ ga̱jma̱á majñu̱u̱ mbá xúgíí ski̱yu̱u̱ꞌ.