1 Ikhaa jngó xúge̱ꞌ rá a̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ra̱ꞌkhá tháán naꞌne a̱kui̱nꞌ rí mba̱ya̱ꞌlaꞌ. Ikháanꞌ nu̱ne̱-gagi̱ilaꞌ xo̱xto̱ꞌ jamí nu̱ne̱laꞌ rí ma̱gi̱xi̱i gamakuꞌ. Ikhaa jngó na̱tha̱nꞌlaꞌ rí ga̱wajún-gúkuálaꞌ ná inuu Táta̱.

2 Na̱tha̱n-jáñuu Ebódia̱ ga̱jma̱á Sínti̱ke̱, rí mbóó a̱kuíi̱n gúni̱i̱ ná inuu Ana̱ꞌlóꞌ. 3 Xúꞌkhue̱n máꞌ na̱tha̱n-jáñaaꞌ ikháánꞌ mangáánꞌ, dxájuꞌ tsí jmbii, tsáánꞌ natiajun ga̱jma̱á nindxu̱ꞌ, rí ma̱ta̱mbáñúú nána̱ a̱ngia̱nꞌlóꞌ tsúꞌkhue̱n. Numuu rí ikhii̱n ni̱mbáyíꞌ rí ni̱tha̱n-ráꞌa ajngáa máján, ga̱jma̱á máꞌ Kleménte̱ mangaa jamí i̱ꞌwíin tsí ni̱mbáyíꞌ. Mbá xúgíin tsúꞌkhue̱n ka̱ma máꞌ mbiꞌñúú ná inuu i̱yi̱i̱ꞌ rí ka̱ma mbiꞌñúú xa̱bo̱ tsí ma̱ju̱wá mbá jámuu.

4 Ga̱ꞌdxalaꞌ jámba̱ miꞌtsú rí mbóó juwalaꞌ gajmiálaꞌ Táta̱ Jesús. Na̱tha̱nꞌlaꞌ mbu̱júꞌ: ¡Ga̱ꞌdxalaꞌ! 5 Májáanꞌlaꞌ jamí gamakuáanꞌlaꞌ gáꞌne ná inúú mbá xúgíin xa̱bo̱, numuu rí inu máꞌ ma̱ꞌkha̱a Táta̱ Jesús.

6 Ma̱xáxná-gamiéjwanlaꞌ mbá jayu gáꞌne rí ma̱ri̱gá, a̱ꞌkhue̱n gakon, i̱ndo̱ó máꞌ Ana̱ꞌlóꞌ gútha̱n-jáñíílaꞌ numuu mbá xúgíí rí ndaꞌyálaꞌ, jamí gu̱rígu̱ulaꞌ gamaku ná inuu Ana̱ꞌlóꞌ mangaa. 7 Jamí Ana̱ꞌlóꞌ gáꞌne rí ma̱ꞌne tsímáá a̱kia̱nꞌlaꞌ. Ikhaa tsímáá rí nanújngoo-rámuu rí nafroꞌo̱o̱ xa̱bo̱ numbaa, ikhaa rúꞌkhue̱n gáña̱wu̱u̱n nímia̱ꞌlaꞌ jamí ju̱ma̱ꞌlaꞌ numuu rí mbóó juwalaꞌ gajmiálaꞌ Krísto̱ Jesús.

8 I̱mbo̱ó máꞌ rí phú na̱tha̱nꞌlaꞌ rá, a̱ngui̱nꞌ, ikhaa ríge̱ꞌ phú jaꞌyoo rí mu̱ndxa̱ꞌwa̱-mijnálaꞌ numuu: mbá xúgíí rí gakon, mbá xúgíí rí nitiamakuíí, mbá xúgíí rí jmbu, mbá xúgíí rí jaꞌwu, mbá xúgíí rí mitsaan, mbá xúgíí rí máján kri̱ga̱ ajngóo. Gu̱ndxa̱ꞌwa̱-mijnálaꞌ máꞌ xúꞌkhue̱n ga̱jma̱á numuu rí máján jamí mangaa máꞌ rí jaꞌyoo rí mi̱ꞌthán rí máján numuu. 9 Mbá xúgíí rí ni̱sngálaꞌ, jamí rí ni̱ma̱ñalaꞌ, xúꞌkhue̱n máꞌ rí ni̱dxawíínlaꞌ jamí rí ndi̱ya̱álaꞌ rí na̱ne̱ ikhúúnꞌ, ikhaa rúꞌkhue̱n gúne̱laꞌ. Jamí Ana̱ꞌlóꞌ, tsí naꞌne rí ma̱juwalóꞌ tsímáá, ma̱xtáa ga̱jma̱á nindxa̱ꞌlaꞌ.

10 Ga̱jma̱á numuu Táta̱ maphú nadxu a̱kui̱nꞌ rí ni̱rmáꞌáa̱n a̱kia̱nꞌlaꞌ ju̱yo̱ꞌ mbu̱júꞌ. Na̱ju̱mu̱ꞌ máꞌ rí támbumalaꞌ ju̱yo̱ꞌ nákhí wapha, i̱ndo̱ó numuu rí táxnálaꞌ mbiꞌi rí mu̱mbáyúꞌlaꞌ. 11 Tsítha̱nlo̱ꞌ xí ndaꞌyóꞌ guéño, numuu rí ikhúúnꞌ na̱ma̱ñuꞌ máꞌ naxtáá gagi ga̱jma̱á rí gúꞌdo̱ꞌ, asndo náá máꞌ rí ríga̱. 12 Nda̱yo̱o̱ máꞌ naxtáá awúun rí tsingíná, jamí nda̱yo̱o̱ máꞌ naxtáá awúun rí ríga̱ guéño. Awúun mbá xúgíí rúꞌkhue̱n nika-ra̱ma̱ñuꞌ, rí ma̱kuéꞌtsó asndo ma̱gi̱ꞌmuꞌ jamí rí ma̱xki̱dxu̱ꞌ mangaa. Xúꞌkhue̱n máꞌ ni̱ma̱ñuꞌ rí ma̱gúꞌdo̱ꞌ guéño, jamí mangaa máꞌ rí mba̱ꞌyóꞌ. 13 Mbá xúgíí máꞌ na̱ꞌngo̱ꞌ numuu rí Krísto̱ naxníꞌ tsiakhe̱.

14 Xómáꞌ ikháanꞌlaꞌ rá, máján máꞌ ne̱ne̱laꞌ rí ni̱mbáyú-jmáálaꞌ ga̱jma̱á nindxu̱ꞌ ná rí na̱mínu̱u̱ꞌlo̱ꞌ. 15 Jamí ndu̱ya̱á máꞌ mangáanꞌlaꞌ, a̱ngui̱nꞌ xa̱bo̱ Filípo̱s, rí nákhí ni̱gíꞌdu̱u̱n ni̱tha̱n-ráꞌa ajngáa máján, ído̱ rí nigájnuꞌ ná Masedónia̱, nimbá kuthuun tsí nanimbu̱únꞌ juyáá Jesús túmbáyí-jmáá ga̱jma̱á nindxu̱ꞌ, rí i̱ndo̱ó máꞌ ikháanꞌlaꞌ ni̱mbáyúꞌlaꞌ. 16 Numuu rí asndo nákhí máꞌ xtáálo̱ꞌ ná Tesalóni̱ka̱, mbaꞌa nothon ni̱xu̱ꞌmálaꞌ rí ndaꞌyóꞌ. 17 Tsítha̱n rúꞌkhue̱n kajngó mu̱xnu̱ꞌlaꞌ i̱tha̱án xóó, rí nandoꞌ ñajuun rí ikháanꞌlaꞌ ma̱guaꞌdáálaꞌ i̱tha̱án xóó ná inuu Ana̱ꞌlóꞌ. 18 Ni̱gruígú máꞌ mbá xúgíí rí ndaꞌyóꞌ jamí asndo napíduun e̱ne̱ rí xúge̱ꞌ rá. Gatíí e̱ne̱ numuu ni̱gruígú rí ni̱xu̱ꞌmálaꞌ ga̱jma̱á nindxu̱u̱ Epafrodíto̱. Rí ni̱xu̱ꞌmálaꞌ ñajuun xómá mbá tsi̱gi̱jña̱ꞌ rí phú ndaa thawuun jamí phú na̱ni̱gu̱u̱ꞌ Ana̱ꞌlóꞌ ma̱grui̱gú. 19 Ikhaa jngó mbá xúgíí rí ndaꞌyálaꞌ, Anu̱ꞌ Mikhuíí maxnálaꞌ ne̱ ga̱jma̱á majñu̱u̱ rí phú mitsaan rí gíꞌdoo guéño Krísto̱ Jesús. 20 A̱gu̱ma-mba̱a̱ mbá jámuu mbiꞌi Táta̱ Ana̱ꞌlóꞌ. Xkuaꞌnii gáꞌne.

21 Gu̱ra̱xi̱inlaꞌ mbá xúgíin xa̱bi̱i Ana̱ꞌlóꞌ ga̱jma̱á numuu Krísto̱ Jesús. Jamí a̱ngia̱nꞌlóꞌ tsí júwa̱ꞌ ga̱jma̱á nindxu̱ꞌ ge̱jyoꞌ, nu̱ra̱xáa̱nꞌlaꞌ mangii̱n. 22 Xúꞌkhue̱n máꞌ mbá xúgíin xa̱bi̱i Ana̱ꞌlóꞌ nu̱ra̱xáa̱nꞌlaꞌ, i̱wa̱á máꞌ phú nu̱ra̱xáa̱nꞌlaꞌ tsí júwa̱ꞌ ná guꞌwóo Sésa̱r.

23 Tátiálóꞌ Jesukrísto̱ gáꞌne-tsakun-rámáaꞌlaꞌ mbá xúgiáanꞌlaꞌ. Xkuaꞌnii gáꞌne.*