1 Ikhúúnꞌ ñajunꞌ Páblo̱, mbáa xa̱bo̱ tsí waxúngua̱a̱ꞌ. Ra̱ꞌkhá xa̱bo̱ numbaa nixniꞌ jamí ni̱ꞌgiúún rí ma̱ne̱ ñajun ríge̱ꞌ, rí jmína̱a̱ꞌ máꞌ Jesukrísto̱ nixúꞌmúú, jamí mangaa máꞌ Ana̱ꞌlóꞌ tsí neꞌne rí mbayáa mbiꞌyuu Jesús. 2 Ikhúúnꞌ jamí mbá xúgíin a̱ngia̱nꞌlóꞌ tsí gajmíꞌ ge̱jyoꞌ, nu̱ra̱xi̱inxo̱ꞌ mbámbá kuthuun tsí nanimbu̱únꞌ juyáá Jesús ná numbaa Galásia̱.

3 Ana̱ꞌlóꞌ Mikhuíí jamí Tátiálóꞌ Jesukrísto̱ gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá. 4 Jesukrísto̱ nixnáxe̱-mina̱ꞌ rí ma̱ja̱ñúu ga̱jma̱á numuu aꞌkhánlóꞌ. Xkuaꞌnii neꞌne-jríñáa̱ꞌlóꞌ ná inuu numbaa xkawe̱ꞌ rí juwalóꞌ, xómá rí nandoo Tátiálóꞌ Mikhuíí. 5 ¡A̱gu̱ma-mba̱a̱ Ana̱ꞌlóꞌ mbá jámuu mbiꞌi! Xkuaꞌnii gáꞌne.

6 Maphú namakuꞌ rí nacha̱ guéño ne̱ne̱-tsíngua̱ꞌ-mijnálaꞌ inuu Ana̱ꞌlóꞌ tsí nindxaꞌwálaꞌ ga̱jma̱á numuu rí phú nandoo jaꞌyalaꞌ Krísto̱, jamí mbá nacha̱ máꞌ nikualaꞌ tsu̱du̱u̱ i̱mba̱ inii gisngáá. 7 Ra̱ꞌkhá máꞌ numuu gakon rí ríga̱ i̱mba̱ inii ajngáa máján, rí júwa̱ꞌ mbá tikhuun xa̱bo̱ tsí nandúún gúne̱-ngra̱ꞌáanꞌlaꞌ jamí nandúu̱n gúne̱-maꞌchíi̱ ajngáa máján ga̱jma̱á numuu Krísto̱. 8 Maske máꞌ mbáa tsí ikháanꞌxo̱ꞌ o mbáa ánje̱l tsí na̱ꞌkha̱ mikhuíí mbo̱ꞌ, asndo tsáa máꞌ tsí naꞌsngálaꞌ i̱mba̱ ajngáa máján kriꞌkhu xó rí ni̱sngááxo̱ꞌ ná inalaꞌ, gamínu̱u̱ꞌ tsúꞌkhue̱n gáꞌne Ana̱ꞌlóꞌ. 9 Xómá ni̱tha̱nxo̱ꞌ nákhí wapha, nathangu̱ún na̱tha̱nꞌlaꞌ mbu̱júꞌ: xí mbáa naꞌsngálaꞌ i̱mba̱ ajngáa máján kriꞌkhu xó rí ni̱drígúlaꞌ máꞌ, gamínu̱u̱ꞌ tsúꞌkhue̱n gáꞌne Ana̱ꞌlóꞌ.

10 Á na̱ju̱ma̱ꞌlaꞌ rí naxná-gamiéjunꞌ rí muthan máján xa̱bo̱ ga̱jma̱á numuꞌ dxe̱ꞌ. Á na̱ne̱ rí ma̱ni̱gu̱ún xa̱bo̱ juyeꞌ, i̱ju̱ma̱ꞌlaꞌ dxe̱ꞌ. Á ra̱ꞌkhá Ana̱ꞌlóꞌ ñajuun tsí phú nandoꞌ rí maꞌthán máján numuꞌ rá. Xí xóó na̱ne̱ rí muthan máján xa̱bo̱ ga̱jma̱á numuꞌ, ra̱ꞌkhá máꞌ yumbée Krísto̱ ñajunꞌ xúꞌkhue̱n rá.

11 A̱ngui̱nꞌ, nandoꞌ rí ma̱gi̱da̱ꞌ mújúun idxa̱ꞌlaꞌ ríge̱ꞌ: ajngáa máján rí na̱sngáálo̱ꞌ, ra̱ꞌkhá xa̱bo̱ numbaa nene̱-ku̱maa ne̱. 12 Tágruígú ne̱, ni máꞌ táma̱ñuꞌ ne̱ ga̱jma̱á majñu̱u̱ nimbáa xa̱bo̱ numbaa, rí jmína̱a̱ꞌ máꞌ Jesukrísto̱ nirmáꞌthoo inuꞌ kajngó ma̱ne̱-núwíin ne̱.

13 Ni̱dxawíínlaꞌ máꞌ xáne jaꞌñúú ikhúúnꞌ nákhí rí na̱ne̱-mbánuulo̱ꞌ rí nanimba̱ꞌxo̱ꞌ tsáanꞌ ñajwanxo̱ꞌ xa̱bo̱ judío̱, rí ne̱ne̱-ngíníi mi̱ndaꞌkho tsí nanimbu̱únꞌ juyáá Jesús, jamí ni̱ꞌgí-mina̱ꞌ rí ma̱ne̱-gámbii̱nlo̱ꞌ. 14 Ná majñu̱ú a̱ngui̱nꞌ xa̱bo̱ judío̱ tsí mbéꞌthúún gajmíꞌ ná xuajñuꞌ, ikhúúnꞌ ñajunꞌ tsí phú i̱tha̱án na̱ni̱gu̱u̱ꞌ rí ma̱ꞌne-mbánuu gisngáá rí ni̱ꞌgí táta̱-xi̱ꞌñúꞌ wajyúú. 15 I̱ndo̱ó máꞌ numuu rí Ana̱ꞌlóꞌ niraꞌwúún jamí nindxaꞌwéꞌ asndo nákhí máꞌ xóó tágu̱múúlo̱ꞌ ga̱jma̱á numuu rí maphú nandoo̱ jaꞌyeꞌ. Ído̱ rí neꞌne a̱kuii̱n ikhaa̱, 16 niꞌnii̱ rí ma̱ne̱-núwíinlo̱ꞌ A̱dée̱, kajngó ma̱tha̱n-ráꞌalo̱ꞌ ga̱jma̱á numuu̱ ikhaa̱ ná inúú xa̱bo̱ tsí ra̱ꞌkháa judío̱ ñajúún. Xómáꞌ ikhúúnꞌ tára̱xu̱u̱lo̱ꞌ mbá nacha̱ nimbáa xa̱bo̱ numbaa, 17 ni máꞌ táꞌgálo̱ꞌ gáñu̱ú ná Jerusalén tsí wapha máꞌ ninindxu̱ún mbo̱ waxúngui̱inꞌ neꞌne Jesús xó rí ikhúúnꞌ. A̱ꞌkhue̱n gakon, mbá nacha̱ máꞌ nikalo̱ꞌ ná numbaa Arábia̱, jamí nda̱wa̱á a̱ꞌkhue̱n niꞌkha̱aꞌ mbu̱júꞌ ná xuajen Damásko̱.

18 Asndo nirámuu atsú tsigu, a̱ꞌkhue̱n nika gáyo̱o̱ Pédro̱* ná Jerusalén, jamí nixtáá ga̱jma̱á nindxu̱u̱ mbá gu̱wa̱ꞌ-nítsu (15) mbiꞌi. 19 I̱ndo̱ó máꞌ numuu rí táñu̱ú i̱ꞌwíin tsí waxúngui̱inꞌ neꞌne Jesús, rí i̱ndo̱ó máꞌ Santiágo̱* ndi̱yo̱o̱, dxíyo̱o̱ Táta̱. 20 Mbá xúgíí rí na̱tha̱nꞌlaꞌ ge̱jyoꞌ, ndaꞌyoo Ana̱ꞌlóꞌ rí tsíne̱-ndúwalo̱ꞌ. 21 Nda̱wa̱á a̱ꞌkhue̱n nika ná numbaa Síria̱ jamí ná numbaa Silísia̱. 22 Xómáꞌ mbámbá kuthuun tsí nanimbu̱únꞌ juyáá Krísto̱ ná numbaa Judéa̱, ni máꞌ na̱nguá ene̱-nuwúu̱n nákhí xúꞌkhue̱n. 23 I̱ndo̱ó máꞌ xáꞌnii i̱dxawíi̱n ga̱jma̱á numuꞌ: «Xa̱bo̱ tsí neꞌne-ngínáálóꞌ mi̱ndaꞌkho nákhí xúꞌkhue̱n, naꞌthán-ráꞌa ajngáa máján rí xúge̱ꞌ rá, ikhaa máꞌ rí niꞌgí-mine̱e̱ꞌ rí ma̱ꞌne-gámbo̱o̱». 24 Jamí nune̱-mba̱a̱ Ana̱ꞌlóꞌ ga̱jma̱á numuꞌ.