Juáán 15

Jesús ñajuun xómá ixu̱u̱ úba̱ rí phú gakon

1 »Ikhúúnꞌ ñajunꞌ xómá ixu̱u̱ úba̱ rí phú gakon, jamí Tátéꞌ ñajuun tsí na̱ña̱wu̱u̱n ne̱. 2 Jámba̱ ñawúun ixu̱ꞌ rí tsíxná xndúu, na̱ro̱thon-ríguíi̱ ne̱. Xúꞌkhue̱n máꞌ mangaa mbá xúgíí ñawúnꞌ rí naxná xndúu, ikhaa̱ naꞌne-jaꞌwuu̱ ne̱, kajngó i̱tha̱án mbaꞌa xndúu ne̱ gájma̱a̱. 3 Xómáꞌ ikháanꞌlaꞌ, jaꞌwáanꞌlaꞌ máꞌ ga̱jma̱á numuu ajngáa rí ni̱tha̱nꞌlaꞌ. 4 Ga̱juwalaꞌ jayu ga̱jma̱á nindxu̱ꞌ, xómá rí ikhúúnꞌ xtáá jayu ga̱jma̱á nindxa̱ꞌlaꞌ. Ndu̱ya̱álaꞌ máꞌ rí nimbá ñawúun ixu̱u̱ úba̱ tsíxná xndúu, xí na̱nguá ka̱ma ne̱ jayu ná ixu̱u̱. Xúꞌkhue̱n máꞌ mangáanꞌlaꞌ, nda̱a̱ rí gáꞌnga̱ꞌlaꞌ gúne̱ xí na̱nguá juwalaꞌ jayu ga̱jma̱á nindxu̱ꞌ ikhúúnꞌ.

5 »Ikhúúnꞌ ñajunꞌ xómá ixu̱u̱ úba̱, jamí ikháanꞌlaꞌ ñajwanlaꞌ xómá ñawúun ixu̱u̱ úba̱. Tsí xtáa jayu ga̱jma̱á nindxu̱ꞌ ikhúúnꞌ, xómá rí ikhúúnꞌ xtáá jayu ga̱jma̱á nindxu̱u̱ ikhaa̱, ikhaa tsúꞌkhue̱n ma̱nindxu̱u̱ xómá ñawúun ixu̱u̱ úba̱ rí phú naxná xndúu. Numuu rí nimbá rí ma̱xáꞌnga̱ꞌlaꞌ gúne̱, xí nu̱ne̱ tsíngua̱ꞌ-mijnálaꞌ ná inuꞌ. 6 Tsí na̱nguá xtáa̱ jayu ga̱jma̱á nindxu̱ꞌ, mi̱ꞌdaa̱ rixa̱á xómá ñawúun ixu̱u̱ úba̱ rí tsíxná xndúu, rí nothon-rígú, rí nojndoo, jamí nda̱wa̱á nitagímbúu jamí nati ná awúun agu mi̱kha. 7 Xí ikháanꞌlaꞌ juwalaꞌ jayu ga̱jma̱á nindxu̱ꞌ jamí ríga̱ jayu ajngóꞌ ga̱jma̱á nindxa̱ꞌlaꞌ, gu̱nda̱ꞌa̱laꞌ asndo náá máꞌ rí nandalaꞌ, jamí ma̱janálaꞌ ne̱. 8 Phú na̱gu̱ma-mba̱a̱ Tátéꞌ eꞌne ído̱ rí ikháanꞌlaꞌ phú nu̱ne̱laꞌ rí máján, a̱ꞌkhue̱n nakujma rí ikháanꞌlaꞌ ñajwanlaꞌ tsí na̱sngúún.