1 Maphú miꞌcha̱ rí mbiꞌi ginii rí ndayáa semána̱, asndo xóó mijína, ni̱ka̱ María̱ tsí na̱ꞌkha̱ ná Magdála̱ ná nibóo xuyuu Jesús. A̱ꞌkhue̱n ndiꞌyoo̱ rí i̱mba̱ janíí kri̱ga̱ itsí rí nijúgoo ga̱jma̱á iñá-wajen. 2 Ikhaa jngó nigáyuu̱ ni̱ke̱e̱ gáꞌthúu̱n Simón Pédro̱ jamí i̱mba̱a̱ꞌ tsí waꞌsngáá, ikhaa tsí phú nandoo Jesús jaꞌyoo, jamí niꞌthúu̱n: «Ni̱ri̱ye̱e̱ꞌ xuyuu Táta̱ ná iñá-wajen, jamí tsíꞌyáálóꞌ náá nigóo̱ juñúu̱ ne̱».

3 A̱ꞌkhue̱n Pédro̱ ga̱jma̱á i̱mba̱a̱ꞌ tsí waꞌsngáá nigóo̱ gúyáa̱ iñá-wajen. 4 Nájmii̱ mbóó nigóo̱-ragáñúu̱ rí ginii. I̱ndo̱ó máꞌ numuu rí i̱mba̱a̱ꞌ tsí waꞌsngáá i̱tha̱án nagáyuu̱ xó rí Pédro̱, ikhaa jngó ginii̱ ni̱ga̱níi̱ ná iñá-wajen. 5 Ni̱rnga̱du̱u̱n niraꞌe̱e̱ ná awúun iñá-wajen, jamí ndiꞌyoo̱ rí ikhín triga̱ xtíin rí wambráꞌáá xuyuu Jesús, i̱ndo̱ó máꞌ numuu rí táto̱ꞌo̱o̱. 6 Nda̱wa̱á a̱ꞌkhue̱n ni̱ga̱nú Simón Pédro̱, ikhaa̱ rí ni̱to̱ꞌo̱o̱ ná awúun iñá-wajen. Ikhín máꞌ triga̱ xtíin rí wambráꞌáá xuyuu Jesús ndiꞌyoo̱ mangaa̱. 7 Jamí ndiꞌyoo̱ rí xtíin rí wambráꞌáá idxu̱u̱ Jesús na̱nguá kri̱ga̱ ne̱ ga̱jma̱á xtíin rí wambráꞌáá xuyuu̱, rí i̱mba̱ janíí kri̱ga̱ ne̱ jamí xóó máꞌ jagunijmuu ne̱ ndiꞌyoo̱. 8 A̱ꞌkhue̱n ni̱to̱ꞌo̱o̱ mangaa i̱mba̱a̱ꞌ tsí waꞌsngáá, ikhaa tsí ni̱ga̱nú ginii ná iñá-wajen. Ído̱ ndiꞌyoo̱ rí xkuaꞌnii triga̱ xtíin, a̱ꞌkhue̱n ninimbo̱o̱ꞌ rí ndiyáa mbiꞌyuu Jesús. 9 Numuu rí asndo mbiꞌi rúꞌkhue̱n xóó máꞌ táfruꞌúu̱n i̱yi̱i̱ꞌ ajngóo Ana̱ꞌlóꞌ, rí ndaꞌyóo rí mbayáa mbiꞌyuu Jesús. 10 Nda̱wa̱á a̱ꞌkhue̱n Simón Pédro̱ jamí i̱mba̱a̱ꞌ tsí waꞌsngáá, nigúu̱n guꞌwúu̱n.

11 Xómáꞌ María̱ ninguanúu̱ rixa̱á, wíji̱i̱ na̱mbi̱ye̱e̱ꞌ ná rawuun iñá-wajen. A̱ꞌkhue̱n ni̱rnga̱du̱u̱n maraꞌe̱e̱ awúun iñá-wajen. 12 Ikhín ndiꞌñúu̱ a̱jmi̱i ánje̱l tsí júwúún xtíin miꞌxá, trigi̱in tsúꞌkhue̱n ná nibóo xuyuu Jesús. Mbáa ꞌgí ná ni̱ge̱ꞌe̱ idxu̱u̱ jamí i̱mba̱a̱ꞌ ná nakhúu̱. 13 A̱ꞌkhue̱n watraxíi̱ nene̱ ánje̱l:

—Nána̱, náá numuu kajngó na̱ta̱mbi̱ya̱ꞌ róꞌ.

Xómáꞌ María̱ niriꞌñúú ánje̱l:

—Numuu rí nigóo̱ juñúu̱ xuyuu Táta̱ róꞌ, jamí tsíyo̱o̱lo̱ꞌ ná nigóo̱ gúni̱ꞌñáa̱ ne̱.

14 Ni̱kú máꞌ wámbo̱o̱ niꞌthée̱n ríge̱ꞌ, a̱ꞌkhue̱n nitangayii̱, jamí ndiꞌyoo̱ Jesús wéje̱ ikhín, i̱ndo̱ó máꞌ numuu rí tsíꞌyoo̱ xí Jesús ñajuu̱n. 15 Jamí Jesús niraxu̱u̱ María̱:

—Nána̱, náá numuu kajngó na̱ta̱mbi̱ya̱ꞌ róꞌ. Tsáa ithaꞌyáa róꞌ.

Xómáꞌ ikhaa̱ ni̱ju̱mu̱u̱ rí xa̱bo̱ tsí na̱ña̱wu̱u̱n mbaa xaxtii ixe̱ ñajuun tsí nitháa̱n eꞌne, ikhaa jngó xáꞌnii niꞌthúu̱n:

—Táta̱, xí ikháánꞌ nidxo̱ꞌ-cháa wa̱jen, arathúnꞌ náá nitatsíñáa̱ kajngó ma̱ꞌgá gáyaa̱lo̱ꞌ.

16 —¡María̱! —waꞌtháa̱n neꞌne Jesús.

A̱ꞌkhue̱n nitangayii̱ jamí niꞌthúu̱n Jesús:

—¡Rabóni̱! ("Táta̱ naꞌsngáá" iꞌthán ajngáa araméo̱ ríge̱ꞌ).

17 Xómáꞌ Jesús niꞌthúu̱n:

—Náxáta̱xkajmúúꞌ rá, numuu rí xóó máꞌ táꞌgáaꞌlo̱ꞌ ná xtáa Tátéꞌ. I̱wa̱á máján ayu gára̱thu̱ún a̱ngui̱nꞌ ajngáa ríge̱ꞌ: "Naka̱aꞌlo̱ꞌ ná xtáa Tátéꞌ, ikhaa tsí Tátiálaꞌ mangáanꞌlaꞌ, naka̱aꞌlo̱ꞌ ná xtáa Ana̱ꞌlóꞌ, tsí Anu̱ꞌ Mikhuíí jamí Ana̱ꞌlaꞌ ikháanꞌlaꞌ mangaa".

18 A̱ꞌkhue̱n ni̱ka̱a María̱ tsí na̱ꞌkha̱ ná Magdála̱ jamí niꞌthúu̱n tsí waꞌsngúún rí ndiꞌyoo̱ Táta̱. Xúꞌkhue̱n máꞌ niꞌthúu̱n ajngáa rí waꞌxnángáwíi̱ neꞌne Jesús.

19 Ído̱ neꞌne jína rí ikhaa máꞌ mbiꞌi ginii rí ndayáa semána̱, tsí waꞌsngúún ni̱ru̱wa-mijnáa ná awúun mbá guꞌwá. Ni̱ruguaa̱ xa̱ꞌ mbá xúgíí xkrugoo guꞌwá numuu rí namíñúu̱ ene̱ xa̱bo̱ ñajun judío̱. A̱ꞌkhue̱n ni̱to̱ꞌo̱o̱ Jesús ni̱we̱je̱ ná majñúu̱, jamí niꞌthúu̱n: «Ana̱ꞌlóꞌ gáꞌne rí ma̱juwalaꞌ tsímáá».

20 Ído̱ wámbo̱o̱ niꞌthúu̱n rúꞌkhue̱n, a̱ꞌkhue̱n nisngájmúu̱ tsínu̱u̱ꞌ ñawúu̱n jamí níjñúu̱. Jamí phú nidxu a̱kui̱ín tsí waꞌsngúún ído̱ rí ndiyáa̱ Táta̱. 21 A̱ꞌkhue̱n Jesús niꞌthúu̱n mbu̱júꞌ: «Ana̱ꞌlóꞌ gáꞌne rí ma̱juwalaꞌ tsímáá. Xómá rí Tátéꞌ nixúngu̱únꞌ rí ma̱ꞌkhalo̱ꞌ, xkuaꞌnii máꞌ na̱xu̱ꞌmáaꞌlaꞌ mangúúnꞌ rí mu̱ꞌgualaꞌ».

22 Ído̱ wámbo̱o̱ niꞌthée̱n ríge̱ꞌ, a̱ꞌkhue̱n nindiyuu̱ ga̱jma̱á rawuu̱n ná wájun tsí niꞌsngúu̱n, jamí niꞌthúu̱n: «Gu̱dríguíilaꞌ Xu̱u̱ꞌ Ana̱ꞌlóꞌ. 23 Xí xtáa̱ mbáa xa̱bo̱ tsí nu̱ne̱ mba̱a̱ a̱kia̱nꞌlaꞌ ju̱ya̱á aꞌkhúun, naꞌne mba̱a̱ a̱kui̱in máꞌ Ana̱ꞌlóꞌ mangaa jaꞌyoo aꞌkhúu̱n. Jamí xí xtáa̱ mbáa xa̱bo̱ tsí tsíne̱ mba̱a̱ a̱kia̱nꞌlaꞌ ju̱ya̱á aꞌkhúun, tsíꞌne mba̱a̱ a̱kui̱in máꞌ Ana̱ꞌlóꞌ mangaa jaꞌyoo aꞌkhúu̱n».

24 Xómáꞌ Tomás, tsí mbiꞌyuu máꞌ Dídi̱mo̱ mangaa, mbáa máꞌ tsí mbá gu̱wa̱ꞌ i̱jmi̱i (12), na̱nguá nixtáa̱ nákhí rí nikujmaa Jesús ná inúú tsí niꞌsngúún. 25 Ikhaa jngó tsí i̱ꞌwíin waꞌsngúún nitháa̱n:

—Ndi̱ya̱áxo̱ꞌ Táta̱.

Xómáꞌ Tomás niꞌthúu̱n:

—Ma̱xánimbo̱ꞌ nitháan rí nu̱thu̱nꞌlaꞌ, xí tsíya̱xu̱u̱lo̱ꞌ ná nijámbi̱yu̱u̱ꞌ ñawúu̱n jamí tsíxu̱ꞌdáa a̱dée ñawúnꞌ ná niwa̱nꞌ neꞌne klábo̱, jamí xí tsíxu̱ꞌdáa ñawúnꞌ ná nithon me̱jno̱ꞌ níjñúu̱.

26 I̱mbá migiñu mbiꞌi nda̱wa̱á, a̱ꞌkhue̱n tsí waꞌsngúún ni̱ru̱wa-mijnáa mbu̱júꞌ ná awúun mbá guꞌwá, jamí xtáa Tomás mangaa ga̱jma̱á nindxúu̱n mbiꞌi rúꞌkhue̱n. Maske máꞌ júgoo xa̱ꞌ mbá xúgíí xkrugua, ni̱to̱ꞌo̱o̱ Jesús ni̱we̱je̱ ná majñúu̱ jamí niꞌthúu̱n: «Ana̱ꞌlóꞌ gáꞌne rí ma̱juwalaꞌ tsímáá».

27 A̱ꞌkhue̱n Jesús niꞌthúun Tomás:

—Atiaxi̱í ñawúnꞌ ma̱tha̱ya̱á, jamí atrígu a̱dée ñawáanꞌ ge̱jyoꞌ. Aya̱ ꞌcháa ñawáanꞌ jamí ataxúꞌdaa ne̱ ná níjñúꞌ. Náxánindxa̱a̱ꞌ xa̱bo̱ tsí tsínimbo̱o̱ꞌ, rí ga̱nindxa̱a̱ꞌ xa̱bo̱ tsí nanimbo̱o̱ꞌ.

28 A̱ꞌkhue̱n Tomás niꞌthúun Jesús:

—¡Á lá Tátéꞌ Mikhuíí jamí Anu̱ꞌ Mikhuíí!

29 Xómáꞌ Jesús niꞌthúu̱n:

—Tomás, nanimba̱a̱ꞌ numuu rí nithayoꞌ ráanꞌ. Phú tsímáá júwa̱ꞌ tsí nanimbu̱únꞌ juyeꞌ, maske máꞌ na̱nguá ndiyeꞌ.

30 Mangaa máꞌ phú mbaꞌa i̱ꞌwá rí phú wáá neꞌne Jesús ná inúú tsí niꞌsngúún, i̱ndo̱ó máꞌ numuu rí táwaꞌtháán mbá xúgíí rúꞌkhue̱n ná inuu i̱yi̱i̱ꞌ ríge̱ꞌ. 31 Xómáꞌ rí waꞌtháán ná inuu i̱yi̱i̱ꞌ ríge̱ꞌ rá, waꞌtháán ne̱ kajngó ma̱nimba̱ꞌlaꞌ rí Jesús ñajuun Krísto̱, jamí ikhaa̱ ñajuu̱n A̱dée Ana̱ꞌlóꞌ. Kajngó ído̱ rí ma̱nimba̱ꞌlaꞌ rúꞌkhue̱n, ma̱goo ma̱juwalaꞌ jámuu ga̱jma̱á numuu̱ ikhaa̱.