16 »Numuu rí maphú nandoo Ana̱ꞌlóꞌ jaꞌñúú xa̱bo̱ numbaa rí asndo nixnáa̱ A̱dée̱ tsí mbáwíi, kajngó jámba̱a̱ tsí nanimbo̱o̱ꞌ jaꞌyoo A̱dée̱ ma̱xándáti̱ga̱a̱, rí ma̱xtáa̱ jámuu. 17 Numuu rí Ana̱ꞌlóꞌ táxuꞌmaa̱ A̱dée̱ ná numbaa kajngó maxnáxii̱n xa̱bo̱ numbaa rí mbuyamíni̱í jámuu, rí nixuꞌmaa̱ A̱dée̱ kajngó ma̱ꞌne-jáwíi̱n.

18 »Tsí nanimbo̱o̱ꞌ jaꞌyoo A̱dée Ana̱ꞌlóꞌ mi̱xáxnáxi̱i̱ rí mamínu̱u̱ꞌ jámuu. Xómáꞌ tsí tsínimbo̱o̱ꞌ rá, waxnáxi̱i̱ máꞌ rí mamínu̱u̱ꞌ jámuu numuu rí tsínimbo̱o̱ꞌ jaꞌyoo̱ A̱dée Ana̱ꞌlóꞌ tsí mbáwíi.