Lucas 1

Ánje̱l Gabriél naꞌthán rí ma̱gu̱maa Jesús

26 Ído̱ neꞌne máꞌ majuun go̱nꞌ rí jago̱-édoo Elisabét, a̱ꞌkhue̱n Ana̱ꞌlóꞌ nixuꞌmaa ánje̱l Gabriél ma̱ꞌga ná xuajen Nasarét, rí ꞌgí ná numbaa Galiléa̱. 27 Ni̱ke̱e̱ gáꞌyoo̱ mbáa dxáꞌgú tsí niꞌkhu̱u̱ máꞌ rí manújún ga̱jma̱á mbáa xa̱bo̱ tsí mbiꞌyuu José, a̱ꞌdá-ri̱jyu̱u̱ thúngaa Dabíd. Dxáꞌgú tsúꞌkhue̱n mbiꞌyuu María̱. 28 Ído̱ ni̱to̱ꞌo̱o̱ ánje̱l ná gída̱ꞌ María̱, a̱ꞌkhue̱n niꞌthúu̱n: «Na̱ra̱xi̱ínlo̱ꞌ, tsáánꞌ phú na̱gu̱ma-nga̱jwa̱án eꞌne Ana̱ꞌlóꞌ. Táta̱ xtáa ga̱jma̱á nindxa̱a̱ꞌ, jamí phú i̱tha̱án na̱gu̱ma-tsakun-rámááꞌ ikháánꞌ xó rí i̱ꞌwíin go̱ꞌo̱».*1.28 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «jamí phú i̱tha̱án na̱gu̱ma-tsakun-rámááꞌ ikháánꞌ xó rí i̱ꞌwíin go̱ꞌo̱».

29 Xómáꞌ María̱ phú nimakuu̱ rí xkuaꞌnii waꞌtháa̱n neꞌne ánje̱l, jamí naraxe̱-mine̱e̱ꞌ: «Náá numuu kajngó xáꞌnii iraxúu̱nꞌ róꞌ». 30 A̱ꞌkhue̱n waꞌtháa̱n neꞌne ánje̱l:

—Ma̱xámíñaaꞌ, María̱, numuu rí Ana̱ꞌlóꞌ niꞌgí-mina̱ꞌ rí ma̱ꞌne-nga̱jwa̱ánꞌ. 31 Atadxawíín lá rí ma̱tha̱a̱nꞌ: Rí xúge̱ꞌ rá, mi̱da-éda, ma̱tha̱ni̱i̱ mbáa dxáma, tsí ma̱ra̱xna̱-mbiꞌíí Jesús. 32 Ikhaa̱ ma̱nindxu̱u̱ mbáa xa̱bo̱ mba̱a̱, jamí ma̱ꞌne mbiꞌyuu̱ «A̱dée Ana̱ꞌlóꞌ Mikhuíí». Táta̱ Mikhuíí ma̱ꞌne rí ma̱nindxu̱u̱ thúngaa xómá ninindxu̱u̱ xi̱ꞌñú-egoo̱ Dabíd wajyúú. 33 Kajngó maꞌthán-ñájúu̱n jámuu xa̱bi̱i Jakób, jamí ni miꞌtsú ma̱xáyámba̱ rí naꞌthán-ñájwii̱n ikhaa̱.

34 A̱ꞌkhue̱n rí María̱ niraxu̱u̱ ánje̱l:

—Xáne lá gágoo ma̱mba̱núu rí narathúnꞌ, xí xóó táya̱a̱ xa̱biya̱ rá.

35 A̱ꞌkhue̱n ánje̱l niriꞌñuu María̱:

—Xu̱u̱ꞌ Ana̱ꞌlóꞌ ma̱ga̱taa ga̱jma̱á nindxa̱a̱ꞌ, jamí ski̱yu̱u̱ꞌ Ana̱ꞌlóꞌ Mikhuíí mambráꞌáánꞌ asndo xó mbá nákua. Ikhaa jngó ada̱ tsí ma̱tha̱ni̱i̱ ma̱nindxu̱u̱ Xa̱bo̱ Jaꞌwii, jamí ma̱ꞌne mbiꞌyuu̱ «A̱dée Ana̱ꞌlóꞌ». 36 Asndo nána̱ Elisabét máꞌ mangaa, tsí mijngi xtayáá, ma̱ꞌnii mbáa ada̱ maske ni̱ka̱ guéño máꞌ tsiguu̱. Ikhaa tsí nuthan xa̱bo̱ rí tsíyoo ma̱ꞌne-xuajen, wámba̱ máꞌ timajuun go̱nꞌ eꞌne rí jago̱-édee̱. 37 Numuu rí Ana̱ꞌlóꞌ na̱ꞌngo̱o̱ naꞌne mbá xúgíí jayu.

38 A̱ꞌkhue̱n María̱ niꞌthán:

—Ge̱jyoꞌ xtáá ma̱ne̱ rí naꞌthán Táta̱. Ga̱mba̱núu ga̱jma̱á nindxu̱ꞌ xómá rí nirathán.

Wámba̱ rúꞌkhue̱n, ni̱ka̱a ánje̱l.