Lúka̱s 11

2 A̱ꞌkhue̱n Jesús niꞌthúún tsí naꞌsngúún:

—Ído̱ gútha̱n-jáñíílaꞌ Ana̱ꞌlóꞌ, xáꞌnii gútha̱nlaꞌ:

"Tátiáxo̱ꞌ, tsáánꞌ xtaa mikhuíí,*11.2 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «tsáánꞌ xtaa mikhuíí».

a̱gu̱ma-mba̱ánꞌ i̱ndo̱ó máꞌ ikháánꞌ gúne̱ xa̱bo̱.

A̱ga̱nú mbiꞌi rí ikháánꞌ ma̱ra̱tha̱n-ñájúún xa̱bo̱.

Xómá nambánuu rí naꞌne a̱kia̱anꞌ ná mikhuíí,

xkuaꞌnii máꞌ gámbánuu ná numbaa ríge̱ꞌ mangaa.*11.2 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Xómá nambánuu rí naꞌne a̱kia̱anꞌ mikhuíí, xkuaꞌnii máꞌ gámbánuu ná numbaa ríge̱ꞌ mangaa».

3 Araxnáxo̱ꞌ guma rí jayá mbiꞌyaxo̱ꞌ mbámbá mbiꞌi.

4 Athane̱ mba̱a̱ a̱kia̱anꞌ xtayáá aꞌkhánxo̱ꞌ,

numuu rí xkuaꞌnii máꞌ nu̱ne̱ mba̱a̱ a̱kia̱nꞌxo̱ꞌ ju̱ñu̱ú mbá xúgíin tsí gíꞌmii aꞌkhán inaxo̱ꞌ.

Ma̱xáta̱tsi̱ꞌñáxo̱ꞌ rí ma̱gu̱ma-rájáanꞌxo̱ꞌ mu̱ne̱xo̱ꞌ aꞌkhán,

rí athane̱-jríñáaꞌxo̱ꞌ inuu rí ra̱máján".*11.4 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «rí athane̱-jríñáaꞌxo̱ꞌ inuu rí ra̱máján».