Lucas 15

Ajngáa xkri̱da ga̱jma̱á numuu xu̱kú mogo̱ tsí nindáti̱ga̱a̱

1 Mbá xúgíin xa̱bo̱ tsí nu̱ru̱ma mbúkho̱o̱ guꞌwá-ñajun, gajmíí i̱ꞌwíin xa̱bo̱ tsí nune̱ aꞌkhán, nu̱xu̱ꞌma-mijnée̱ mu̱dxawíi̱n rí naꞌsngáá Jesús. 2 Xómáꞌ xa̱bo̱ fariséo̱ gajmíí xa̱bo̱ tsí nusngáá xtángoo nuthan-ri̱ge̱e̱ numuu Jesús ajngáa ríge̱ꞌ: «Na̱grui̱gúu̱n xa̱bo̱ tsí nune̱ aꞌkhán jamí nakuiꞌtsii̱ gajmíi̱».

3 A̱ꞌkhue̱n Jesús neꞌne ajngáa xkri̱da ríge̱ꞌ inúu̱: 4 «Xí mbáa tsí ikháanꞌlaꞌ gíꞌdiin mbá witsu skíñíi (100) xu̱kú mogo̱ jamí nindáti̱ga̱a̱ mbáa, á ra̱ꞌkhá maniñúu̱ tsí mbá akho̱ skíñú gu̱wa̱ꞌ-nítsu i̱khu̱un (99) ná xanáá, rí ma̱ꞌgee̱ gáꞌyáa̱ tsí nindáti̱ga̱a̱ asndo náá gáxkamaa̱ rá. 5 Jamí ído̱ naxkamaa̱ rá, phú gagi a̱kuii̱n naríguii̱ ná xpapoo̱. 6 Ído̱ na̱ga̱núu̱ guꞌwóo̱ nandxaꞌwúu̱n iyanga̱jwee̱ jamí xa̱bo̱ rixo̱o̱, a̱ꞌkhue̱n naꞌthúu̱n: "Ga̱ꞌdxalaꞌ ga̱jma̱á nindxu̱ꞌ, numuu rí ni̱xkama̱a máꞌ xu̱kú mogui̱ꞌ tsí nindáti̱ga̱a̱ jáꞌyéꞌ". 7 Na̱tha̱nꞌlaꞌ rí xkuaꞌnii máꞌ mangaa i̱tha̱án mba̱a̱ gagi ríga̱ ná mikhuíí ga̱jma̱á numuu mbáa xa̱bo̱ aꞌkhán tsí nathanga̱a a̱kui̱in ná inuu Ana̱ꞌlóꞌ, xó rí ga̱jma̱á numúú tsí mbá akho̱ skíñú gu̱wa̱ꞌ-nítsu i̱khu̱un (99) xa̱bo̱ májíin tsí tsíꞌyóo máꞌ rí ma̱thanga̱a a̱kui̱ín ná inuu Ana̱ꞌlóꞌ.

Ajngáa xkri̱da ga̱jma̱á numuu mbúkha̱a̱ ajwa̱nꞌ rí nindáti̱ga̱

8 »Xúꞌkhue̱n máꞌ mangaa, xí mbáa a̱ꞌgo̱ gíꞌdoo mbá gu̱wa̱ꞌ mbúkha̱a̱ ajwa̱nꞌ*15.8 Ná i̱yi̱i̱ꞌ griégo̱ naꞌthán «dracmas», jamí mbá mbúkha̱a̱ rúꞌkhue̱n nadaa numuu mbáa yumbáá rí nañajun mbá mbiꞌi. jamí nandáti̱go̱o̱ ne̱ mbá, á ra̱ꞌkhá naskámee̱ agu jamí nagíxi̱i̱ mújúu̱n guꞌwá asndo náá gáxkamaa̱ ne̱ rá. 9 Jamí ído̱ naxkamaa̱ ne̱, a̱ꞌkhue̱n nagímbúu̱n go̱ꞌo̱ iyanga̱jwee̱ jamí go̱ꞌo̱ rixo̱o̱, jamí naꞌthúu̱n: "Ga̱ꞌdxalaꞌ ga̱jma̱á nindxu̱ꞌ numuu rí ni̱xkama̱a máꞌ mbúkho̱ꞌ rí nindáti̱ga̱-jáꞌyúꞌ". 10 Na̱tha̱nꞌlaꞌ rí xkuaꞌnii máꞌ mangaa gagi a̱kui̱ín ánje̱l drígo̱o̱ Ana̱ꞌlóꞌ ga̱jma̱á numuu mbáa xa̱bo̱ aꞌkhán tsí nathanga̱a a̱kui̱in ná inuu Ana̱ꞌlóꞌ».

Ajngáa xkri̱da ga̱jma̱á numuu ada̱ tsí nindáti̱ga̱a̱

11 Jesús niꞌthán xóó: «Mbáa xa̱bo̱ gíꞌdiin a̱jmi̱i i̱ji̱in. 12 Tsí i̱wa̱á dxáma niꞌthúun tátée: "Táa, araxnúꞌ rí ga̱náꞌyoo ma̱nguanúu ñawúnꞌ". A̱ꞌkhue̱n anúu̱ nixnúu mbámbáa rí ma̱nguanúu ñawúun. 13 Tágajyúu máꞌ mbiꞌi, ikhaa tsí i̱wa̱á dxáma, nigímbúu mbá xúgíí rí ni̱to̱ꞌo̱o̱ ñawúun, a̱ꞌkhue̱n ni̱ke̱e̱ gáxtáa̱ tsíngua̱ꞌ, i̱mba̱ numbaa. Ikhín nitsíjmuu̱ rí gíꞌdoo̱, numuu rí nikhuáa jayu nixtáa̱. 14 Ído̱ wámbo̱o̱ nitsíjmuu̱ mbá xúgíí, a̱ꞌkhue̱n phú gakhe̱ niríga̱ ewi ná numbaa rúꞌkhue̱n, jamí ni̱gi̱ꞌdu̱u̱n ni̱xki̱dxu̱u̱ ikhaa̱. 15 A̱ꞌkhue̱n ni̱ke̱e̱ gánda̱ꞌe̱e̱ ñajun inuu mbáa xa̱bo̱ ná numbaa xtáa̱. Xómáꞌ tsúꞌkhue̱n nixná-ñájuu̱n rí ma̱ꞌgee̱ gáña̱wúu̱n a̱ga ná mbayuu. 16 Xómáꞌ ikhaa̱ naꞌne a̱kuii̱n rí mi̱khui̱i̱ asndo ma̱gi̱ꞌmuu̱ rí naꞌpho̱ a̱ga, i̱ndo̱ó máꞌ numuu rí nimbáa tsíxnúu̱ ne̱ mi̱khui̱i̱.

17 »Asndo a̱ꞌkhue̱n nindxaꞌwá-mina̱aꞌ jamí niꞌthée̱n: "Wáthi̱in yumbáá asndo napíduun guma mu̱pho̱ ná guꞌwóo tátéꞌ, xómáꞌ ikhúúnꞌ níꞌngo̱ꞌ i̱xki̱dxu̱ꞌ ge̱jyoꞌ. 18 Ma̱ꞌgáaꞌ guꞌwóo tátéꞌ jamí ma̱thu̱u̱n: ‘Táa, ne̱ne̱ aꞌkhán ná inuu Ana̱ꞌlóꞌ jamí ná inaaꞌ ikháánꞌ. 19 Nánguá jaꞌyoꞌ rí ma̱nindxu̱ꞌ a̱ꞌdiáaꞌ. Athañu̱ꞌ xómá rí nathañi̱í mbáa yumbiáaꞌ’". 20 Xkuaꞌnii ndiyáa̱ la jamba̱a̱ ni̱ꞌkhaa̱ guꞌwóo tátée̱.

»Asndo xóó máꞌ tsíngua̱ꞌ i̱ꞌkhe̱e̱ ído̱ waꞌyáa̱ neꞌne tátée̱, jamí niñáwíin a̱kui̱in jaꞌyoo̱. A̱ꞌkhue̱n nigáyuu tátée̱ ni̱ka̱ gáxkamaa̱ jamí ndiyáraꞌaa̱ rí ni̱grui̱guíi̱, jamí niraꞌnuu̱ inuu rí naraxii̱. 21 Xómáꞌ dxáma tsúꞌkhue̱n niꞌthán: "Táa, ne̱ne̱ aꞌkhán ná inuu Ana̱ꞌlóꞌ jamí ná inaaꞌ ikháánꞌ. Jamí nánguá jaꞌyoꞌ rí ma̱nindxu̱ꞌ a̱ꞌdiáaꞌ".

22 »Xómáꞌ tátée̱ nixná-ñájúún yumbée: "Nacha̱,*15.22 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá iꞌthán «Nacha̱». gu̱rawíilaꞌ xtíin rí i̱tha̱án máján jamí gu̱riꞌkhuii̱laꞌ. Gu̱xu̱ꞌdáalaꞌ mbá ajwa̱nꞌ jndi ná a̱dée ñawúu̱n, jamí gu̱xu̱ꞌdáalaꞌ cháda nakhúu̱. 23 A̱guwa ju̱ya̱a̱laꞌ a̱ꞌdá-xédé tsí i̱wa̱á rangíi, jamí gu̱xíya̱a̱laꞌ. ¡Mu̱peꞌtsolóꞌ jamí mu̱ꞌne̱lóꞌ ndxa̱a̱! 24 Numuu rí ndiꞌya̱a a̱ꞌdéꞌ tsíge̱ꞌ tsí nijáñuu máꞌ. Nindáti̱ga̱a̱ jamí ni̱xkamaa̱lóꞌ". A̱ꞌkhue̱n ni̱gíꞌdíi̱n nini̱i̱ ndxa̱a̱.

25 »Awúun máꞌ rúꞌkhue̱n, dxáma tsí nikhi̱i̱ xtáa̱ nañajwii̱n xanáá. Ído̱ nithangaa̱ jamí nangiyuu̱ máꞌ guꞌwáá, nidxawuu̱n ajmúú jamí gi̱sian. 26 A̱ꞌkhue̱n nindxaꞌwóo̱ mbáa yumbáá jamí niraxu̱u̱: "Dí ríga̱ guꞌwáá róꞌ". 27 Xómáꞌ tsúꞌkhue̱n niꞌthán: "Á ra̱ꞌkhá dxíya̱a̱ꞌ ni̱ꞌkha̱a. Xómáꞌ tátiáaꞌ nixná-ñájun rí ma̱ja̱ñúu a̱ꞌdá-xédé tsí i̱wa̱á rangíi, numuu rí máján nda̱a̱ rí nigíꞌnuu dxíya̱a̱ꞌ ni̱ꞌkha̱a". 28 Xómáꞌ dxáma tsí nikhi̱i̱ nijiꞌnáa jamí asndo tsíyoo̱ gáta̱ꞌaa̱ guꞌwáá. A̱ꞌkhue̱n nigájnuu tátée̱ gáꞌthán-jáñuu̱ rí ma̱ta̱ꞌaa̱ guꞌwáá. 29 Xómáꞌ dxáma tsúꞌkhue̱n niꞌthúun tátée: "Nathayáá máꞌ ikháánꞌ wátha̱ tsigu xtáá na̱ñajun ga̱jma̱á nindxa̱a̱ꞌ, jamí na̱ne̱-mbánuu mbá xúgíí rí narathúnꞌ. Jamí nimbá miꞌtsú tára̱xni̱ꞌ maske asndo mbáwíi a̱ꞌdá-tsótoon rí ma̱ne̱ ndxa̱a̱ gajmíꞌ iyanga̱jwe̱ꞌ. 30 Xómáꞌ xúge̱ꞌ rí ni̱ꞌkha̱a a̱ꞌdiáaꞌ tsíge̱ꞌ, tsí wámbo̱o̱ mbúkha̱a̱ꞌ nitsíjmuu gajmíí go̱ꞌo̱ tsí nu̱ngu̱jwa̱-mijná, jamí asndo niraxná ñajun rí ma̱ja̱ñúu a̱ꞌdá-xédé tsí i̱wa̱á rangíi ga̱jma̱á numuu̱".

31 »Xómáꞌ tátée̱ niriꞌña: "A̱ꞌdéꞌ, ikháánꞌ jámba̱ miꞌtsú máꞌ xtaa ga̱jma̱á nindxu̱ꞌ, jamí mbá xúgíí rí gúꞌdo̱ꞌ ríga̱ ná ñawáanꞌ. 32 I̱ndo̱ó máꞌ numuu rí xúge̱ꞌ rá, phú ga̱náꞌyoo rí mu̱ꞌne̱lóꞌ ndxa̱a̱ jamí ma̱juwalóꞌ gagi, numuu rí ndiꞌya̱a dxíya̱a̱ꞌ tsí nijáñuu. Tsí nindáti̱ga̱a̱, ikhaa ni̱xkama̱alóꞌ"».