Lúka̱s 2

22 Ído̱ nirámuu mbiꞌi rí mune̱-jaꞌwu-mijnée̱ xómá rí naꞌthán xtángawoo Moisés, a̱ꞌkhue̱n nigóo̱ juya̱a̱ ada̱ ná Jerusalén kajngó mu̱xna̱xíi̱ inuu Táta̱. 23 Numuu rí xkuaꞌnii ka̱ma naꞌthán ná xtángawoo Táta̱: «Jámba̱a̱ dxáma tsí na̱gu̱maa ginii, i̱ndo̱ó máꞌ Táta̱ jaꞌyoo̱».*2.23 Ajngáa ríge̱ꞌ na̱ꞌkha̱ ná I̱yu̱u̱ꞌ xó nigájna̱á xa̱bo̱ 13.2,12. 24 Ikhaa jngó ni̱xna̱xíi̱ tsi̱gi̱jña̱ꞌ xómá rí naꞌthán ná xtángawoo Táta̱: «a̱jmi̱i gúgo̱ o a̱jmi̱i rigu».*2.24 Ajngáa ríge̱ꞌ na̱ꞌkha̱ ná I̱ñu̱úꞌ dxakuun xa̱bi̱i Lebí 12.6-8.

25 Nákhí mbiꞌi rí ñúꞌún xtáa mbáa xa̱bo̱ tsí mbiꞌyuu Simeón ná Jerusalén. Simeón ñajuun mbáa xa̱bo̱ májáan, naꞌne-mba̱a̱ Ana̱ꞌlóꞌ, jamí Xu̱u̱ꞌ Ana̱ꞌlóꞌ xtáa ga̱jma̱á nindxu̱u̱. Gíꞌthu̱u̱n rí ma̱ꞌkha̱ tsí ma̱ꞌne-jáwíin xa̱bo̱ Israél, 26 numuu rí wasngájmáa̱ neꞌne Xu̱u̱ꞌ Ana̱ꞌlóꞌ rí ma̱xájáñuu̱ wapha, asndo mba̱ꞌyoo̱ rí ma̱ꞌkha̱ Krísto̱, tsí maxúngua̱a̱ꞌ Táta̱. 27 Ikhaa máꞌ Xu̱u̱ꞌ Ana̱ꞌlóꞌ neꞌne rí mbiꞌi rúꞌkhue̱n, ma̱ꞌga Simeón ná guꞌwá dxákuun. Awúun máꞌ rúꞌkhue̱n ni̱ꞌkha̱ jiꞌyáa ada̱ neꞌne tátée ga̱jma̱á nánée, kajngó mune̱-mbáníi̱ xómá rí naꞌthán xtángoo. 28 A̱ꞌkhue̱n Simeón ni̱grui̱guíi̱ ada̱ ná ñawúu̱n, jamí neꞌne-mba̱a̱ Ana̱ꞌlóꞌ. Xáꞌnii niꞌthée̱n:

29 «Táta̱, nithane̱-mbáníí máꞌ rí nirathúnꞌ rá.

Xúge̱ꞌ rí ma̱goo máꞌ ma̱ta̱tsi̱ꞌñáá yumbiáaꞌ rí ma̱ja̱ñúu tsímáá rá.

30 Numuu rí ndi̱yo̱o̱ máꞌ tsí nitaxúngua̱a̱ꞌ rí ma̱ꞌne-jáwíin xa̱bo̱ rá,

31 tsí nithaꞌgíi rí mbuyáá mbá xúgíin xa̱bo̱ tsí júwa̱ꞌ ná numbaa.

32 Ikhaa̱ ñajuu̱n xómá agu rí nambiꞌñúú mbá xúgíin tsí ra̱ꞌkháa xa̱bo̱ judío̱ ñajúún.

Ga̱jma̱á numuu̱ ikhaa̱ ma̱tu̱xi̱i gamakúún xa̱bo̱ xuajñaaꞌ Israél».

33 A̱ꞌkhue̱n maphú nimakuu José ga̱jma̱á María̱ rí xkuaꞌnii niꞌthán Simeón ga̱jma̱á numuu ada̱. 34 A̱ꞌkhue̱n Simeón neꞌne-tsakun-rámii̱, jamí xáꞌnii niꞌthúu̱n María̱, nánée ada̱: «Ído̱ gáꞌkhi̱i̱ ada̱ tsíge̱ꞌ ma̱ꞌnii̱ rí mbaꞌiin xa̱bo̱ ma̱ga̱jnúu gamakúún jamí mbaꞌiin xa̱bo̱ ma̱gi̱ꞌdoo numúú ná xuajen Israél. Ikhaa̱ masngájmúu̱ xa̱bo̱ rí gakon ga̱jma̱á numuu Ana̱ꞌlóꞌ, xómáꞌ xa̱bo̱ ma̱xáxúún gúyáa̱, 35 kajngó ma̱kujma rí nu̱ndxa̱ꞌwa̱-mijná xa̱bo̱ ná awúun a̱kuíi̱n. Xómáꞌ ikháánꞌ rá nána̱, rúꞌkhue̱n ma̱ꞌne rí asndo xómá chíde̱ ma̱ru̱wa̱nꞌ-jngaa nímia̱aꞌ».

36 Ikhín máꞌ gída̱ꞌ mbáa a̱ꞌgo̱ tsí mbiꞌyuu Ána̱ mangaa, tsí na̱gu̱wíjnga̱a ajngóo Ana̱ꞌlóꞌ. A̱dée xa̱bo̱ tsí mbiꞌyuu Fanuél, xa̱bo̱ ri̱jyu̱u̱ꞌ máꞌ Asér ñajuun a̱ꞌgo̱ tsúꞌkhue̱n, jamí nikhi̱i̱ guéño máꞌ. Nákhí dxáꞌguíi̱ ninújwíi̱n jamí nixtáa̱ ga̱jmáa̱ a̱jmbaa̱ mbá juwan tsigu. 37 Jamí a̱ꞌgóxuáꞌa tsíge̱ꞌ gíꞌdoo mbá akho̱ skíñú i̱kho̱ (84) tsiguu. Jámba̱ miꞌtsú kra̱ꞌaa̱ ná awúun guꞌwá dxákuun. Mbiꞌíí mbruꞌwíín xtáa̱ ná inuu Ana̱ꞌlóꞌ, naꞌne-miꞌkhíi̱ jamí i̱ndo̱ó máꞌ Ana̱ꞌlóꞌ iꞌthán-jáñuu̱. 38 Awúun máꞌ rí na̱gu̱ma-tsakun-rámaa José ga̱jma̱á María̱, ni̱ga̱níi̱ ikhaa̱ jamí niríguu̱ la gamaku inuu Ana̱ꞌlóꞌ. Jamí niꞌthée̱n ga̱jma̱á numuu ada̱ ná inúú xa̱bo̱ tsí guáꞌthi̱ín rí Ana̱ꞌlóꞌ ma̱ꞌne-jáwíin xa̱bo̱ Jerusalén.