1 Ná guꞌwá dxákuun, Jesús nayaxu̱ún xa̱bo̱ tsí maphú guáꞌdáá, xó nu̱dri̱ꞌyée̱ mbúkha̱a̱ xúwán ná awúun e̱jna̱ rí nati mbúkha̱a̱ xúwán. 2 Ndiꞌyoo̱ mangaa rí mbáa a̱ꞌgóxuáꞌa ngínáa nagruíya̱ꞌ a̱jma̱ mbúkha̱a̱ ajwa̱nꞌ laka ná awúun e̱jna̱. 3 A̱ꞌkhue̱n niꞌthán Jesús: «Na̱tha̱nꞌ-jmbalaꞌ rí i̱tha̱án mba̱a̱ nirakhuáa a̱ꞌgóxuáꞌa ngínáa tsíge̱ꞌ xó rí mbá xúgíin xa̱bo̱. 4 Numuu rí mbá xúgíin tsúꞌkhue̱n ni̱ra̱khuáa ná inuu Ana̱ꞌlóꞌ* mbúkha̱a̱ xúwán rí napíduun ná inúu̱. Xómáꞌ a̱ꞌgo̱ tsíge̱ꞌ rá, maske máꞌ mingínáa̱, nirakhuáa̱ mbá xúgíí rí gíꞌdoo̱ ma̱xtáa̱-muu̱».

5 Mbá tikhuun xa̱bo̱ nuthan rí maphú mitsaan itsí ni̱gu̱ma ga̱jma̱á guꞌwá dxákuun, xúꞌkhue̱n máꞌ nuthee̱n rí phú mitsaan karathoo awúun ne̱ ga̱jma̱á rí nixna xa̱bo̱. A̱ꞌkhue̱n Jesús niꞌthúún tsúꞌkhue̱n: 6 «Xómáꞌ rí nu̱ya̱xi̱ílaꞌ xúge̱ꞌ rá, ma̱ga̱nú mbiꞌi rí ma̱ngudi-ri̱ga̱a ne̱ mbá xúgíí. Ni xí i̱mba̱ itsí náxárigu tsu̱du̱u̱ i̱mba̱ itsí».

7 A̱ꞌkhue̱n ni̱ra̱xíi̱ Jesús:

—Táta̱ naꞌsngáá, nguáná gáríga̱ rúꞌkhue̱n rá. Dí ñajuun gáríga̱ kajngó ma̱goo mbu̱ya̱áxo̱ꞌ rí nangiyuu máꞌ ma̱ri̱gá rúꞌkhue̱n rá.

8 A̱ꞌkhue̱n niriꞌña Jesús:

—Xawi lá gúne̱laꞌ, ra̱ꞌkhá ma̱gu̱ma-nduwáanꞌlaꞌ gúne̱ xa̱bo̱. Numuu rí ma̱guwá mbaꞌiin xa̱bo̱ tsí ma̱jmúú mbiꞌyuꞌ. Ikhiin tsúꞌkhue̱n muthan: "Ikhúúnꞌ ñajunꞌ Krísto̱", jamí "Ni̱ga̱nú máꞌ mbiꞌi rá". I̱ndo̱ó máꞌ numuu rí ikhúúnꞌ na̱tha̱nꞌlaꞌ rí mu̱xúꞌgualaꞌ tsu̱du̱ún xa̱bo̱ tsúꞌkhue̱n. 9 Jamí ído̱ gúdxawíínlaꞌ rí ge̱e̱ ñúꞌún ríga̱ xkujndu ná numbaa jamí nu̱dxawíínlaꞌ rí nuxna-mijná xa̱bo̱, ma̱xámíñalaꞌ. Numuu ndaꞌyóo máꞌ rí ma̱ri̱gá ginii jayu rúꞌkhue̱n. I̱ndo̱ó máꞌ numuu rí ra̱ꞌkhá máꞌ núkho̱ ma̱mbá numbaa.

10 A̱ꞌkhue̱n Jesús niꞌthúu̱n xóó:

—Xa̱bi̱i mbá xuajen mba̱a̱ ma̱tu̱xu̱ún muxna-mijná gajmíí xa̱bi̱i i̱mba̱ xuajen mba̱a̱, jamí mbáa thúngaa ma̱tsa̱ñu̱u̱ꞌ ga̱jma̱á i̱mba̱a̱ꞌ thúngaa ga̱jma̱á numuu rí nuthan-ñajwíi̱n. 11 Ma̱xma mi̱ndaꞌkho, ge̱e̱ ñúꞌún ma̱ri̱gá ewi, jamí ge̱e̱ ñúꞌún ma̱ri̱gá nandii rí ma̱gu̱díin xa̱bo̱. Ngamí mi̱ndaꞌkho ma̱ri̱gá, jamí ná mikhuíí phú wáá rí ma̱kujma.

12 »I̱ndo̱ó máꞌ numuu rí ginii muxkalaꞌ xa̱bo̱, jamí mu̱rtuwáa̱nꞌlaꞌ. Ga̱jma̱á numuꞌ ikhúúnꞌ mu̱xna̱xáa̱nꞌlaꞌ xa̱bo̱ ná awúun mbámbá guꞌwá rí na̱gi̱mbáanꞌlóꞌ, magóo̱ judáa̱nꞌlaꞌ ná géjwa̱nꞌ, magóo̱ judáa̱nꞌlaꞌ ná inúú thúngaa jamí ná inúú xa̱bo̱ ñajun. 13 Xkuaꞌnii kajngó ma̱goo mu̱thu̱únlaꞌ xa̱bo̱ ga̱jma̱á numuꞌ. 14 Gu̱ꞌgí-mijnálaꞌ rí mu̱xúndxa̱ꞌwa̱-mijnálaꞌ wapha xáne gúriꞌñalaꞌ ná inúu̱. 15 Numuu rí jmínu̱úꞌ máꞌ ikhúúnꞌ ma̱xna̱ꞌlaꞌ ajngáa jamí ma̱ne̱ rí ma̱ma̱ñalaꞌ mu̱riꞌña, kajngó asndo nimbáa xa̱bo̱ sia̱nꞌ ma̱xáꞌngo̱o̱ gáwe̱je̱ꞌtha̱nꞌlaꞌ ni máꞌ ma̱xárugoo rawanlaꞌ.

16 »Xúꞌkhue̱n máꞌ mu̱xna̱xáa̱nꞌlaꞌ asndo xa̱bo̱ tsí mijngi ju̱ñu̱úlaꞌ: ana̱ꞌlaꞌ, a̱ngia̱nꞌlaꞌ, xa̱bo̱ rixa̱ꞌlaꞌ jamí iyanga̱jwa̱ dríga̱ꞌlaꞌ. Jamí mbá tikhuun tsí ikháanꞌlaꞌ ma̱ja̱ñúú gúni̱i̱. 17 Mbá xúgíin xa̱bo̱ ma̱xáxúún gúyalaꞌ ga̱jma̱á numuꞌ ikhúúnꞌ, 18 i̱ndo̱ó máꞌ numuu rí ma̱xándáti̱ga̱ asndo nimbá tsu̱u̱n idxa̱ꞌlaꞌ. 19 Xí nawajún gúkuálaꞌ ma̱goo ma̱jáwiáanꞌlaꞌ.

20 »Ído̱ ágúya̱álaꞌ rí mbá nawa̱a̱ xa̱ꞌ jayu gatiin xa̱bo̱ tsí ku̱ra̱tuun ajwa̱nꞌ ná Jerusalén, ga̱ma̱ñalaꞌ rí inu máꞌ ma̱ngudi-ri̱ga̱a ne̱ iꞌthán rúꞌkhue̱n rá. 21 A̱ꞌkhue̱n rí xa̱bo̱ tsí gachúún ná numbaa Judéa̱, agáñúu̱ magóo̱ ná júba̱. Jamí tsí gachúún ná xuajen Jerusalén, a̱ga̱jnúu̱. Xómáꞌ tsí gachúún ná xanáá, ma̱xáthangii̱n ná xuajen. 22 Numuu rí mbiꞌi rí ma̱gu̱ma-numa̱a aꞌkhán ñajuun rúꞌkhue̱n, ído̱ ma̱mba̱núu mbá xúgíí rí ka̱ma naꞌthán ná i̱yi̱i̱ꞌ ajngáa rawuun Ana̱ꞌlóꞌ. 23 ¡Maphú mingíníi go̱ꞌo̱ tsí juda-éda jamí tsí nu̱xníxúún i̱ji̱ín! Numuu rí maphú mba̱a̱ gaꞌkho̱ ma̱ri̱gá mbiꞌi rúꞌkhue̱n ná numbaa ríge̱ꞌ, jamí ninújngoo mba̱a̱ jamínu̱ꞌ mu̱drígú xa̱bo̱ tsíge̱ꞌ. 24 Tikhuun ma̱ja̱ñúú ga̱jma̱á chíde̱, i̱ꞌwíin ma̱tiin ga̱jma̱á tsiakhe̱ ma̱ꞌga jiꞌdiin mbá xúgíí xuajen numbaa. Ma̱gu̱ma-ngíníi mi̱ndaꞌkho xa̱bo̱ Jerusalén gúne̱ xa̱bo̱ tsí ra̱ꞌkháa judío̱ ñajúún, xkuaꞌnii asndo ma̱mbá mbiꞌi rí najanúú xa̱bo̱ tsúꞌkhue̱n muthan-ñajun.

25 »Mbiꞌi rúꞌkhue̱n ma̱ri̱gá rí ni miꞌtsú táríga̱ mbuyáá xa̱bo̱ ná inuu a̱kha̱ꞌ, ná inuu go̱nꞌ, jamí ná inúú a̱ꞌgua̱án. Xómáꞌ ná numbaa ge̱jyoꞌ ma̱ri̱gá jamínu̱ꞌ, jamí tsiánguá gáꞌne a̱kui̱ín xa̱bo̱ ga̱jma̱á numuu rí gakhe̱ a̱ꞌwóo iya a̱pha̱ jamí iya rí nambúxu̱u̱ꞌ ná inuu ne̱. 26 Asndo ma̱jámíndúún xa̱bo̱ rí namíñúú, ga̱jma̱á numuu rí na̱ꞌkha̱ ma̱gíꞌnuu numbaa. Numuu rí mi̱tamajnga-ri̱gi̱in a̱ꞌgua̱án mikhuíí mangiin. 27 A̱ꞌkhue̱n mbuyáa̱ A̱dée Xa̱bo̱ Numbaa, rí na̱ꞌkhe̱e̱ ná du̱u̱n ga̱jma̱á mbá xúgíí tsiakhe̱ jamí phú nambiꞌi-taꞌaa̱. 28 Ído̱ ágúya̱álaꞌ rí na̱gi̱ꞌdu̱u̱n máꞌ naríga̱ rúꞌkhue̱n, gu̱xna̱-míjnálaꞌ tsiakhe̱ jamí gu̱xu̱xí idxa̱ꞌlaꞌ, numuu rí nangiyuu máꞌ rí ma̱gu̱ma-jríñáaꞌlaꞌ.

29 A̱ꞌkhue̱n Jesús niꞌthúu̱n ajngáa xkri̱da ríge̱ꞌ mangaa: «Gu̱ya̱xi̱ílaꞌ ixu̱u̱ ígo̱ o asndo náá máꞌ ixe̱ mbo̱ꞌ. 30 Ído̱ rí narudu-ráma̱a máꞌ inúu ne̱, ikháanꞌlaꞌ ndu̱ya̱álaꞌ rí nangiyuu máꞌ go̱nꞌ rí ma̱ꞌne mika. 31 Xkuaꞌnii máꞌ mangaa, ído̱ ágúya̱álaꞌ rí naríga̱ máꞌ rí ni̱tha̱nꞌlaꞌ, a̱gu̱ya̱álaꞌ rí nangiyuu máꞌ mbiꞌi rí Ana̱ꞌlóꞌ maꞌthán-ñájúún mbá xúgíin xa̱bo̱.

32 »Na̱tha̱nꞌ-jmbalaꞌ rí xa̱bo̱ tsí júwa̱ꞌ xúge̱ꞌ, ma̱xájáñúu̱ wapha asndo ágúyáa̱ rí ma̱mba̱núu mbá xúgíí rí na̱tha̱nꞌlaꞌ xúge̱ꞌ. 33 Ma̱ga̱nú mbiꞌi rí ma̱mbáa mikhu ga̱jma̱á numbaa, xómáꞌ rí ajngóꞌ jámuu ma̱ri̱gá ne̱.

34 »Gu̱ña̱wa̱n-mijnálaꞌ, ra̱ꞌkhá ma̱ꞌne gúkú a̱kia̱nꞌlaꞌ gáꞌne rí napeꞌtso guéñalaꞌ, rí najngáanꞌlaꞌ, jamí rí phú naxná-gamiéjwanlaꞌ eꞌne rí ríga̱ ná numbaa ge̱jyoꞌ. Kajngó ma̱xáꞌne rí nda̱a̱ ajngóo gáꞌkha̱ mbiꞌi rúꞌkhue̱n ná inalaꞌ. 35 Numuu rí asndo xó mbá katsáꞌkhán jaꞌnii ma̱ga̱nú rí ma̱gíꞌníí mbá xúgíin xa̱bo̱ numbaa. 36 Ikhaa jngó ga̱juwa-na̱ma̱ñalaꞌ, gu̱tha̱n-jáñíílaꞌ máꞌ xúꞌkhue̱n Ana̱ꞌlóꞌ, kajngó ma̱goo ma̱jríñáaꞌlaꞌ inuu mbá xúgíí rí na̱ꞌkha̱ ma̱gíꞌníí xa̱bo̱, jamí ma̱goo mu̱xna̱xí-mijnálaꞌ ná inuu A̱dée Xa̱bo̱ Numbaa».

37 Rí mbiꞌi, Jesús naꞌsngáá ná guꞌwá dxákuun. Rí mbroꞌon, na̱ka̱-rayáa̱ xu̱u̱ꞌ ná júba̱ rí mbiꞌyuu Olíbo̱. 38 Jamí mbá xúgíin xa̱bo̱ naguwá ná inuu̱ rí miꞌcha̱, kajngó mu̱dxawíín rí naꞌsngáa̱ ná guꞌwá dxákuun.