1 Maphú miꞌcha̱ rí mbiꞌi ginii rí ndayáa semána̱, nigóó go̱ꞌo̱ ná waꞌdi̱i Jesús, juye̱e̱ nigóo̱ iyoo iná ndaa thawuun rí nene̱-mújúu̱n. Jamí nigóó i̱ꞌwíin go̱ꞌo̱ ga̱jma̱á nindxúu̱n.* 2 Ído̱ niguáꞌníi̱, a̱ꞌkhue̱n ndiyáa̱ rí waxuꞌma janíí itsí rí nirugoo iñá-wajen, ja̱ma̱ꞌtha ne̱ ndiyáa̱. 3 A̱ꞌkhue̱n ni̱tu̱ꞌúu̱n, jamí na̱nguá ndiyáa̱ xuyuu Táta̱ Jesús ikhín. 4 Awúun máꞌ rí namíñúu̱ rí xkuaꞌnii ndiyáa̱ jamí ni tsíyáa̱ dí gúni̱i̱, a̱ꞌkhue̱n mbá nacha̱ niwájun ná níjñúu̱ a̱jmi̱i xa̱bo̱ tsí júwúún xtíin rí nambiꞌi-taꞌa. 5 Maphú nimíñúú go̱ꞌo̱ jamí ni̱rnga̱di̱i̱n, ni̱drákee̱ idxúu̱n mbayíí. A̱ꞌkhue̱n waꞌthúu̱n nene̱ xa̱bo̱ tsúꞌkhue̱n: «Dójngó i̱ꞌyáalaꞌ tsí ndaꞌya ná majñu̱ú tsí nijáñúú róꞌ. 6 Ndawa̱a̱ ge̱jyoꞌ, ndiyáa̱ mbiꞌyuu̱. Ga̱rmáꞌáan a̱kia̱nꞌlaꞌ rí niꞌthánlaꞌ nákhí ningrigo̱o̱ꞌ ná numbaa Galiléa̱: 7 "Ndaꞌyóo rí A̱dée Xa̱bo̱ Numbaa mi̱xnáxi̱i̱ ná ñawúún xa̱bo̱ tsí nune̱ aꞌkhán, mi̱ꞌdujmaa̱ ná ixe̱ krúsi̱ ma̱ja̱ñúu̱, jamí mbayáa̱ mbiꞌyuu̱ ído̱ gárámuu atsú mbiꞌi"».

8 A̱ꞌkhue̱n ni̱rmáꞌáan a̱kui̱ín go̱ꞌo̱ ajngáa rí niꞌthán Jesús. 9 Jamí ído̱ niguwáa̱n rí nigóo̱ ná iñá-wajíín, nithúu̱n mbá xúgíí ríge̱ꞌ tsí mbá gu̱wa̱ꞌ i̱mbi̱in (11) niꞌsngúún Jesús, xúꞌkhue̱n máꞌ mbá xúgíin tsí i̱ꞌwíin mangaa. 10 Go̱ꞌo̱ tsíge̱ꞌ ñajúún tsí nigóó juñu̱ú ajngáa inúú tsí maxúngui̱inꞌ Jesús: María̱ tsí na̱ꞌkha̱ ná Magdála̱, Juána̱, María̱ nánée Santiágo̱,* jamí i̱ꞌwíin go̱ꞌo̱ tsí nigóó ga̱jma̱á nindxúu̱n mangaa. 11 Xómáꞌ tsí maxúngui̱inꞌ Jesús, ni̱ndxa̱ꞌwa̱-mijnée̱ rí najmiñúú go̱ꞌo̱ rí xkuaꞌnii ithan, ikhaa jngó tánimbúu̱nꞌ juñúu̱.

12 Xómáꞌ Pédro̱, nigájnuu̱ jamí ni̱ke̱e̱-ragáyuu̱ ná iñá-wajen. Ído̱ ni̱ga̱níi̱ niraꞌe̱e̱ awúún, jamí i̱ndo̱ó máꞌ xtíin wapa rí wambráꞌaa Jesús ndiꞌyoo̱. A̱ꞌkhue̱n nithangaa̱ guꞌwáá, jamí phú namakuu̱ eꞌne rí niríga̱.

13 Ikhaa máꞌ mbiꞌi rúꞌkhue̱n nagóó a̱jmi̱i tsí niꞌsngúún Jesús ná jambo̱o̱ mbá xuajen lájwíin rí mbiꞌyuu Emaús. Naꞌne xí mbá gu̱wa̱ꞌ i̱mba̱ (11) kilóme̱tro̱* wáa ꞌgí xuajen rúꞌkhue̱n inuu Jerusalén. 14 Nagóo̱-ruthan-mijnée̱ ga̱jma̱á numuu mbá xúgíí rí ni̱ꞌkha̱-raríga̱. 15 Awúun máꞌ rí nu̱ndxákuu̱n jamí nu̱ra̱xe̱-mijnée̱, a̱ꞌkhue̱n jmína̱a̱ꞌ máꞌ Jesús nixuꞌma-mina̱ꞌ jamí nigíꞌdu̱u̱n na̱ka̱ ga̱jma̱á nindxúu̱n. 16 I̱ndo̱ó máꞌ numuu rí asndo xó nijúgoo idúu̱n jaꞌnii, kajngó mu̱xúne̱-nuwii̱n. 17 A̱ꞌkhue̱n Jesús niraxúu̱n:

—Dí ñajuun rí nu̱tha̱n-mijnálaꞌ ga̱jma̱á numuu awúun rí nakualaꞌ jamba̱a̱ róꞌ. Jamí náá numuu kajngó phú nathájwíin a̱kia̱nꞌlaꞌ róꞌ.*

18 A̱ꞌkhue̱n mbáa tsí ikhii̱n niriꞌña, ikhaa tsí mbiꞌyuu Kleófa̱s:

—Rí mbá xúgíin xa̱bo̱ tsí niguwá ná Jerusalén, mbáwíín máꞌ ikháánꞌ ñajwaanꞌ tsí tsíꞌthayáá dí ñajuun rí ni̱kú niríga̱.

19 A̱ꞌkhue̱n niraxe̱ Jesús:

—Dí niríga̱ rá.

A̱ꞌkhue̱n ikhii̱n nitháa̱n:

—Rí nigíꞌnuu Jesús tsí na̱ꞌkha̱ ná Nasarét. Ikhaa̱ nisngájmee̱ rí xa̱bo̱ tsí na̱gu̱wíjnga̱a ajngóo Ana̱ꞌlóꞌ ñajuu̱n, ga̱jma̱á majñu̱u̱ rí niꞌthée̱n jamí rí niꞌnii̱ ná inuu Ana̱ꞌlóꞌ jamí ná inúú mbá xúgíin xa̱bo̱. 20 Ikhaa̱ waxnáxi̱i̱ nene̱ dxakuun tsí gíꞌdoo numúú jamí xa̱bo̱ ñajun dríga̱ꞌlóꞌ, kajngó mi̱ꞌdujmaa̱ ná ixe̱ krúsi̱ ma̱ja̱ñúu̱. 21 Xómáꞌ ikháanꞌxo̱ꞌ niwaꞌthi̱ínxo̱ꞌ rí ikhaa̱ ñajuu̱n tsí ma̱ꞌne-jríya̱a̱ꞌ xuajñalóꞌ Israél. Jamí xúge̱ꞌ eꞌne riatsú mbiꞌi rí ninújngoo mbá xúgíí rúꞌkhue̱n rá. 22 I̱ndo̱ó máꞌ numuu rí mbá tikhuun go̱ꞌo̱ tsí ñajúún a̱ngia̱nꞌxo̱ꞌ nene̱-mi̱ꞌñáxo̱ꞌ, numuu rí jáma̱á miꞌcha̱ nigóo̱ ná iñá-wajíín, 23 jamí túxkamaa̱ xuyuu Jesús. A̱ꞌkhue̱n nithangii̱n guꞌwáá nithanxo̱ꞌ rí nikujmii ánje̱l inúu̱. Ikhiin tsúꞌkhue̱n nithúún go̱ꞌo̱ rí xtáa̱ ndaꞌya Jesús. 24 A̱ꞌkhue̱n nigóó mbá tikhuun a̱ngia̱nꞌxo̱ꞌ ná iñá-wajíín, jamí ni̱xkamaa̱ xómá jayu nithan go̱ꞌo̱, i̱ndo̱ó máꞌ numuu rí na̱nguá ndiyáa̱ Jesús.

25 A̱ꞌkhue̱n Jesús niꞌthúu̱n:

—¡Dí maphú tsíndxa̱ꞌwa̱-mijnálaꞌ! Jamí phú tsíyoo gánimba̱ꞌlaꞌ mbá xúgíí rí nithan xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú. 26 Á ra̱ꞌkhá ndiꞌyóo rí ma̱gíꞌnuu Krísto̱ mbá xúgíí rúꞌkhue̱n ginii, jamí nda̱wa̱á ma̱gu̱ma-mba̱a̱ ná mikhuíí rá.

27 A̱ꞌkhue̱n Jesús nigíꞌdu̱u̱n niꞌthán-makúu̱n mbá xúgíí rí naꞌthán ná i̱yi̱i̱ꞌ ajngóo Ana̱ꞌlóꞌ ga̱jma̱á numuu̱ ikhaa̱. Nigíꞌdu̱u̱n-muu̱ ná i̱yi̱i̱ꞌ rí niꞌtháán Moisés, xkuaꞌnii asndo mbá xúgíí i̱yi̱i̱ꞌ rí nitháán tsí ni̱rawíjnga̱a ajngóo Ana̱ꞌlóꞌ wajyúú.

28 Ído̱ niguáꞌníi̱ ná xuajen rí nagóo̱, a̱ꞌkhue̱n Jesús niꞌnii̱ asndo xó rí na̱ke̱e̱ i̱tha̱án xóó tsíngua̱ꞌ. 29 Xómáꞌ ikhii̱n nene̱-ski̱yíi̱ rí ma̱nguanúu: «Ga̱nguanáaꞌ ga̱jma̱á nindxa̱ꞌxo̱ꞌ, numuu rí phú wakhíí máꞌ, jamí i̱mbégo xúge̱ꞌ ma̱ꞌne jína». A̱ꞌkhue̱n Jesús ni̱to̱ꞌo̱o̱ guꞌwáá ga̱jma̱á nindxúu̱n.

30 Ído̱ rí nitrigii̱n mu̱peꞌtso-añúu̱, Jesús niwatuun mbá guma bopho jamí niríguu̱ la gamaku inuu Ana̱ꞌlóꞌ, a̱ꞌkhue̱n nixpíꞌthángaa̱ ne̱ jamí nixnúu̱ ne̱ mu̱phi̱i̱. 31 A̱ꞌkhue̱n rí asndo xó ni̱ma̱ꞌtha̱a idúu̱n jaꞌnii, jamí nene̱-nuwii̱n Jesús. I̱ndo̱ó máꞌ numuu rí asndo ni túyáa̱ xáne neꞌne ndawa̱a̱ ná inúu̱.

32 A̱ꞌkhue̱n nithan-mijnée̱: «Á ra̱ꞌkhá phú tsímáá neꞌne a̱kia̱nꞌlóꞌ nákhí naguwa gajmiálóꞌ ná jamba̱a̱, awúun máꞌ rí na̱ꞌkhe̱e̱ naꞌthán-makalóꞌ i̱yi̱i̱ꞌ ajngóo Ana̱ꞌlóꞌ rá». 33 A̱ꞌkhue̱n mbá nacha̱ máꞌ niguáxi̱i̱n, jamí niguwáa̱n-ragáñúu̱ ná Jerusalén. Ikhín mbá ꞌnduꞌ máꞌ ni̱xkamii̱ tsí mbá gu̱wa̱ꞌ i̱mbi̱in (11) niꞌsngúún Jesús, jamí i̱ꞌwíin máꞌ a̱nguíi̱n. 34 Xómáꞌ tsúꞌkhue̱n waꞌthúu̱n nene̱: «Maphú gakon rí ndiyáa mbiꞌyuu Táta̱, jamí nikujmaa̱ inuu Simón». 35 A̱ꞌkhue̱n tsí a̱jmi̱i, nithee̱n mbá xúgíí rí nigíꞌníi̱ ná jamba̱a̱, jamí nithee̱n xáne nene̱-nuwii̱n Jesús nákhí nixpíꞌthángaa̱ guma ná inúu̱.

36 Awúun máꞌ rí xóó nuthee̱n rúꞌkhue̱n, a̱ꞌkhue̱n rí jmína̱a̱ꞌ máꞌ Jesús ni̱we̱je̱ ná majñúu̱, jamí niraxii̱n: «Tsímáá gájuwalaꞌ». 37 Maphú nimíñúu̱ mi̱ndaꞌkho, jamí ni̱ndxa̱ꞌwa̱-mijnée̱ rí tsiꞌyoo ñajuun tsí nduyáa̱.

38 Xómáꞌ Jesús niꞌthúu̱n: «Náá numuu kajngó namíñalaꞌ mi̱ndaꞌkho róꞌ. Náá numuu kajngó xkuaꞌnii i̱ndxa̱ꞌwa̱-mijnálaꞌ róꞌ. 39 Gu̱ya̱xi̱ílaꞌ ñawúnꞌ ga̱jma̱á nakhúꞌ mbu̱ya̱álaꞌ. Jmínu̱úꞌ máꞌ ikhúúnꞌ ñajunꞌlo̱ꞌ. Gu̱ya̱xu̱ꞌ májánlaꞌ jamí gu̱xkajmúúlaꞌ kajngó mbu̱ya̱álaꞌ rí gúꞌdo̱ꞌ itsu̱ꞌ ga̱jma̱á xuyuꞌ. Ra̱ꞌkhá xkuaꞌnii mbáa tsí tsiꞌyoo». 40 Awúun máꞌ rí Jesús naꞌthúu̱n rúꞌkhue̱n, nisngájmúu̱ ñawúu̱n ga̱jma̱á nakhúu̱.

41 Xómáꞌ tsí niꞌsngúu̱n ninújngoo gagi a̱kuíi̱n jamí phú namakúu̱n mi̱ndaꞌkho. Asndo xó tsíyoo wáa gánimbúu̱nꞌ ini̱i̱, ikhaa jngó Jesús niraxúu̱n: «Á guáꞌdáálaꞌ tháan rí mu̱ꞌpholóꞌ ge̱jyoꞌ rá». 42 A̱ꞌkhue̱n nixnáa̱ mbá lájwíin i̱gi̱ꞌ nigui̱i̱ꞌ mi̱khu̱u̱, jamí mbá xtíya yáá.* 43 Xómáꞌ Jesús ni̱grui̱gú ne̱, jamí niꞌkhui̱i̱ ne̱ ná inúu̱.

44 Nda̱wa̱á a̱ꞌkhue̱n niꞌthúu̱n ajngáa ríge̱ꞌ: «Rí nigíꞌnuꞌ ñajuun mbá xúgíí rí ni̱tha̱nꞌlaꞌ máꞌ nákhí nixtáá ga̱jma̱á nindxa̱ꞌlaꞌ: rí ndaꞌyóo ma̱mba̱núu mbá xúgíí rí ka̱ma naꞌthán ga̱jma̱á numuꞌ ná xtángawoo Moisés, ná i̱ñu̱úꞌ xa̱bo̱ tsí ni̱rawíjnga̱a ajngóo Ana̱ꞌlóꞌ, jamí rí ka̱ma naꞌthán ga̱jma̱á numuꞌ ná I̱yu̱u̱ꞌ ajmúú». 45 A̱ꞌkhue̱n Jesús niꞌthán-makúu̱n i̱yi̱i̱ꞌ ajngóo Ana̱ꞌlóꞌ, kajngó ma̱fruꞌúu̱n ne̱, 46 jamí niꞌthúu̱n: «Xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ, jamí xkuaꞌnii ndiꞌyóo ma̱ꞌne,* rí mamínu̱u̱ꞌ mi̱ndaꞌkho jamí ma̱ja̱ñúu Krísto̱, xúꞌkhue̱n máꞌ rí mbayáa̱ mbiꞌyuu̱ ído̱ gárámuu atsú mbiꞌi. 47 Mangaa máꞌ ka̱ma naꞌthán rí ga̱jma̱á numuu̱ ikhaa̱ mi̱ꞌthán-raꞌa mbá xúgíí numbaa rí ma̱thanga̱a a̱kui̱ín xa̱bo̱ ná inuu Ana̱ꞌlóꞌ, kajngó Ana̱ꞌlóꞌ ma̱ꞌne mba̱a̱ a̱kui̱in jaꞌyoo aꞌkhúu̱n. Ma̱gi̱ꞌdu̱u̱n mi̱ꞌthán-raꞌa ginii jayu ná Jerusalén. 48 Jamí ikháanꞌlaꞌ mu̱tha̱nlaꞌ ga̱jma̱á numuu mbá xúgíí ríge̱ꞌ.

49 »Xómáꞌ ikhúúnꞌ ma̱xu̱ꞌmáa tsí nixuda-mina̱ꞌ Tátéꞌ rí ma̱ꞌkha̱ ga̱jma̱á nindxa̱ꞌlaꞌ. I̱ndo̱ó máꞌ numuu rí ga̱nguanálaꞌ naꞌcho̱o̱ ná Jerusalén ge̱jyoꞌ, asndo gúdrígúlaꞌ tsiakhe̱ rí na̱ꞌkha̱ mikhuíí».

50 Nda̱wa̱á a̱ꞌkhue̱n, Jesús ni̱gu̱wíin tsí niꞌsngúún, ni̱ka̱ jaguu̱n asndo ná mijngi Betánia̱. Ikhín nixúxi̱i̱ ñawúu̱n ri̱jma̱á, jamí neꞌne-tsakun-rámii̱. 51 Awúun máꞌ rí naꞌne-tsakun-rámii̱ xkuaꞌnii, a̱ꞌkhue̱n niríya̱ꞌ-mine̱e̱ꞌ ná majñu̱ú, jamí ni̱ka̱ jiꞌyáa̱ mikhuíí. 52 Xómáꞌ ikhii̱n nene̱-mba̱a̱, a̱ꞌkhue̱n rí maphú gagi a̱kuíi̱n niguwáa̱n ná Jerusalén. 53 Jamí jámba̱ miꞌtsú traꞌii̱n ná guꞌwá dxákuun, nune̱-mba̱a̱ Ana̱ꞌlóꞌ jamí nuthee̱n rí máján ga̱jma̱á numuu̱.* Xkuaꞌnii gáꞌne.*