Lucas 5

18 A̱ꞌkhue̱n niguáꞌnú mbá tikhuun xa̱bo̱ juya̱a̱ mbáa xa̱bo̱ tsí nixtriga̱a̱, jabóo ná inuu mbá agú. Ndiñúu̱ ma̱tu̱ꞌúu̱n guꞌwáá juya̱a̱ tsí najáñuu jamí mu̱ꞌgíi̱ ná inuu Jesús. 19 I̱ndo̱ó máꞌ numuu rí túxkamaa̱ ná ma̱tu̱ꞌúu̱n juya̱a̱ ga̱jma̱á numuu rí xa̱ꞌ jayu gachúún xa̱bo̱. A̱ꞌkhue̱n nitsimúu̱ tsu̱du̱u̱ guꞌwá jamí ni̱rmáꞌtháa̱ ne̱, a̱ꞌkhue̱n ni̱xríguíi̱ tsí najáñuu ná majñu̱ú xa̱bo̱, ni̱ꞌgíi̱ ná inuu Jesús. 20 Ído̱ ndiꞌyoo Jesús rí wéje̱ a̱kui̱ín xa̱bo̱ tsúꞌkhue̱n ná inuu̱, a̱ꞌkhue̱n niꞌthúu̱n xa̱bo̱ tsí nixtriga̱a̱: «Táta̱, ningudi̱i máꞌ aꞌkháanꞌ rá».

21 A̱ꞌkhue̱n rí xa̱bo̱ tsí nusngáá xtángoo gajmíí xa̱bo̱ fariséo̱ ni̱gíꞌdíi̱n ni̱ndxa̱ꞌwa̱-mijnée̱ ríge̱ꞌ: «Tsáa ñajuun tsíge̱ꞌ rí asndo naꞌthán xkawe̱ꞌ ga̱jma̱á numuu Ana̱ꞌlóꞌ róꞌ. I̱ndo̱ó máꞌ Ana̱ꞌlóꞌ ñajuun tsí naꞌne mba̱a̱ a̱kui̱in jaꞌyoo aꞌkhúún xa̱bo̱».

22 Ído̱ ndiꞌyoo Jesús rí xkuaꞌnii nu̱ndxa̱ꞌwa̱-mijnée̱, a̱ꞌkhue̱n niraxúu̱n: «Náá numuu kajngó xkuaꞌnii i̱ndxa̱ꞌwa̱-mijnálaꞌ róꞌ. 23 Náá rí i̱wa̱á na̱nguá mingíjyúu mi̱ꞌthán róꞌ. Á rí mi̱ꞌthán: "Ningudi̱i máꞌ aꞌkháanꞌ rá", o rí mi̱ꞌthán: "Araxu̱unꞌ jamí a̱ngriga̱a̱ꞌ" dxe̱ꞌ. 24 Ma̱snga̱jmálaꞌ mbu̱ya̱á rí A̱dée Xa̱bo̱ Numbaa gíꞌdoo tsiakhe̱ rí ma̱ꞌne mba̱a̱ a̱kui̱in jaꞌyoo aꞌkhúún xa̱bo̱ ná numbaa ríge̱ꞌ». A̱ꞌkhue̱n Jesús niꞌthúun xa̱bo̱ tsí nixtriga̱a̱: «Ikháánꞌ i̱tha̱a̱nꞌ, araxu̱unꞌ, atiáxi̱i aguáaꞌ, jamí ayu̱uꞌ guꞌwáaꞌ».

25 Núkho̱ ni̱tu̱xi̱i xa̱bo̱ tsí nixtriga̱a̱ ná inúú mbá xúgíin xa̱bo̱. A̱ꞌkhue̱n niyáxii̱ agúu̱ ná nibóo̱, ni̱kaa̱ guꞌwóo̱. Awúun máꞌ rí na̱kaa̱, naꞌne-mba̱a̱ Ana̱ꞌlóꞌ.