Lucas 8

27 Inu na̱gata̱a Jesús ná ixe̱-rguwa, a̱ꞌkhue̱n ni̱ꞌkha̱ gátsijnuu̱ mbáa xa̱bo̱ tsí waꞌyáa nene̱ gíñá ꞌguéen. Neꞌne guéño máꞌ rí na̱nguá júwuun xtíin xa̱bo̱ tsúꞌkhue̱n, jamí na̱nguá xtáa̱ ná awúun guꞌwá, rí xtáa̱ ná mbaa rí gatiin wa̱jen. 28 Ído̱ ndiꞌyoo̱ Jesús, nindxawáskee̱, a̱ꞌkhue̱n nismáti̱go̱o̱ inuu jamí gakhe̱ niꞌthúu̱n: «Dí iyaaꞌ ga̱jma̱á nindxu̱ꞌ, Jesús, tsáánꞌ ñajwaanꞌ A̱dée Ana̱ꞌlóꞌ Mikhuíí róꞌ. Na̱tha̱n-jáñaaꞌ rí ma̱xátha̱ne̱ rí ma̱mínu̱u̱ꞌ».

29 Xkuaꞌnii niꞌthée̱n numuu rí Jesús inu nixná-ñájuu̱n gíñá ꞌguéen rí ma̱ga̱jnáa ná xuyuu xa̱bo̱. Phú mbaꞌa nothon máꞌ i̱to̱ꞌo̱o̱ gíñá ꞌguéen ná xuyuu xa̱bo̱ tsúꞌkhue̱n. Maske naxtoꞌwóo ñawúu̱n jamí nakhúu̱ ga̱jma̱á ñuu ajwa̱nꞌ ene̱ xa̱bo̱, xómáꞌ ikhaa̱ na̱ru̱thii̱n ne̱ ga̱jma̱á tsiakhe̱, jamí gíñá ꞌguéen naꞌne rí magáyuu̱ nikhuáa ná mbaa niníí. 30 A̱ꞌkhue̱n Jesús niraxu̱u̱ xa̱bo̱ tsúꞌkhue̱n:

—Dí mbiꞌyaaꞌ róꞌ.

Xómáꞌ ikhaa̱ niriꞌñee̱:

—«Mbaꞌiin mi̱ndaꞌkho»*8.30 Ná ajngáa griégo̱ naꞌthán «Legión». Nákhí wajyúú xkuaꞌnii nithúún rí mbaꞌa míl xa̱bo̱ tsí ku̱ra̱tuun ajwa̱nꞌ. mbiꞌyuꞌ.

Xkuaꞌnii niꞌthée̱n numuu rí phú mbaꞌiin mi̱ndaꞌkho gíñá ꞌguéen ni̱tu̱ꞌu̱ún ná xuyuu̱. 31 A̱ꞌkhue̱n rí gíñá ꞌguéen nithán-jáñíi̱ Jesús rí ma̱xájunguii̱nꞌ mbuyamíníi̱ ná iñá rí me̱jno̱ꞌ. 32 Neꞌne rí ikhín máꞌ inu gachúún mbaꞌiin a̱ga napeꞌtso ná júba̱. A̱ꞌkhue̱n rí gíñá ꞌguéen nithán-jáñíí Jesús rí maniñúu̱ ma̱tu̱ꞌúu̱n ná xuñúú a̱ga. Xómáꞌ Jesús nixná ajngóo rí ma̱goo ma̱tu̱ꞌúu̱n. 33 Ído̱ nigájna̱á gíñá ꞌguéen ná xuyuu xa̱bo̱, ni̱tu̱ꞌúu̱n ná xuñúú a̱ga. A̱ꞌkhue̱n rí mbá xúgíin a̱ga niguátaan-ragáñúú ná brákoo asndo ni̱stuáꞌán-mijnée̱ ná awúun ñañuu a̱pha̱, jamí ikhín nixmátu̱ꞌúu̱n.

34 Ído̱ ndiyáá xa̱bo̱ tsí nu̱ña̱wu̱ún a̱ga rí xkuaꞌnii niríga̱, ningujwíi̱n-ragáñúu̱, nigúu̱n gúthúu̱n xa̱bo̱ tsí júwa̱ꞌ ná xuajen jamí tsí júwa̱ꞌ ná xanáá. 35 A̱ꞌkhue̱n niguwá xa̱bo̱ ágúyáá rí niríga̱. Ído̱ niguáꞌníi̱ inuu Jesús, a̱ꞌkhue̱n ndiyáa̱ xa̱bo̱ tsí nigájna̱á gíñá ꞌguéen ná xuyuu, jamí ꞌgíi̱ ná mijngi nakhúu Jesús. Júwuu̱n xtíñuu̱ jamí káxe̱ ju̱mu̱u̱. A̱ꞌkhue̱n phú nimíñúú xa̱bo̱ rí xkuaꞌnii ndiyáá.