1 Jámba̱a̱ xa̱bo̱ gíꞌmaa rí ma̱ꞌne-mbánuu̱ rí nuthan xa̱bo̱ ñajun. Numuu rí Ana̱ꞌlóꞌ niskuíji̱in mbá xúgíin xa̱bo̱ ñajun. Rúꞌkhue̱n iꞌthán rí xa̱bo̱ ñajun tsí trigi̱in, Ana̱ꞌlóꞌ máꞌ niskuíjii̱n. 2 Ikhaa jngó, jámba̱a̱ xa̱bo̱ tsí najñaguii inúú xa̱bo̱ ñajun, rí niꞌgí máꞌ Ana̱ꞌlóꞌ na̱we̱je̱-ꞌthu̱u̱n, jamí ma̱grui̱guíi̱ jamínu̱ꞌ ga̱jma̱á numuu rí naꞌnii̱. 3 Numuu rí tátrigi̱in xa̱bo̱ ñajun kajngó ma̱mi̱ꞌñúú tsí nune̱ rí máján, rí nitrigii̱n kajngó ma̱mi̱ꞌñúú tsí nune̱ rí xkawe̱ꞌ. Á nandaaꞌ rí ma̱xámíñaaꞌ gúne̱ xa̱bo̱ ñajun dxe̱ꞌ. Athane̱ rí máján, jamí ikhii̱n muthee̱n rí máján ga̱jma̱á numaaꞌ. 4 Numuu rí yumbée Ana̱ꞌlóꞌ ñajúu̱n, kajngó ma̱ra̱xtaa májáanꞌ ikháánꞌ. I̱ndo̱ó máꞌ numuu rí, xí nathane̱ rí ra̱máján rá, ga̱mi̱ꞌñáaꞌ xúꞌkhue̱n rá, numuu rí yumbée Ana̱ꞌlóꞌ ñajúu̱n. Jamí ra̱ꞌkhá máꞌ nijanúu̱ xúgi̱í tsiakhe̱, rí nijanúu̱ ne̱ kajngó mu̱xpa̱thúu̱n tsí nune̱ rí ra̱máján. 5 Ikhaa jngó, ndaꞌyóo rí mu̱ꞌne̱-mbáníílóꞌ rí nuthan xa̱bo̱ ñajun, ra̱ꞌkhá máꞌ i̱ndo̱ó numuu rí mu̱xúxpa̱tháa̱nꞌlóꞌ, rí ga̱jma̱á numuu rí nduꞌyáálóꞌ máꞌ ná awúun a̱kia̱nꞌlóꞌ rí jaꞌyalóꞌ mu̱ꞌne̱-mbáníílóꞌ rí nuthee̱n. 6 Ikhaa máꞌ numuu rúꞌkhue̱n nu̱ne̱-numalaꞌ rí jaꞌyalaꞌ ná inuu xa̱bo̱ ñajun, numuu rí ikhii̱n ñajúu̱n yumbée Ana̱ꞌlóꞌ tsí nitrigi̱in rí muthan-ñajun. 7 Gu̱xna̱álaꞌ mbámbáa rí jaꞌyoo mu̱xna̱álaꞌ: xí jaꞌyoo mu̱xna̱laꞌ mbúkho̱o̱ guꞌwá-ñajun, gu̱xna̱laꞌ ne̱. Xí gíꞌmaa mu̱xna̱laꞌ rí ma̱jmaa ná xuajen, gu̱xna̱laꞌ ne̱. Tsí gíꞌmaa mbu̱ya̱-makuíílaꞌ, gu̱ya̱-makuíi̱laꞌ. Tsí gíꞌmaa mu̱xna̱álaꞌ gamaku, gu̱xnáa̱laꞌ ne̱.

8 Ma̱xági̱ꞌmáaꞌlaꞌ inuu nimbáa xa̱bo̱. Mbóó máꞌ rí phú gíꞌmáaꞌlaꞌ mu̱ne̱, rí ma̱galaꞌ ju̱ya̱-mijnálaꞌ. Numuu rí tsí nandoo jaꞌyoo xa̱bo̱ numbaa ga̱jma̱á, neꞌne-mbánuu̱ máꞌ mbá xúgíí rí naꞌthán xtángoo. 9 Numuu rí xtángoo naꞌthán: «Ma̱xátha̱ba̱a̱ꞌ ga̱jma̱a̱ꞌ xa̱bo̱ tsí tíya̱a̱. Ma̱xáta̱xíya̱a̱ xa̱bo̱. Ma̱xátha̱ne̱ ku̱ꞌwá. Ma̱xátrígu ajngáa waꞌa tsu̱du̱u̱ xa̱bo̱. Ma̱xáni̱gua̱a̱ꞌ ma̱raꞌdáá rí na̱nguá xtaꞌdáá». Jamí asndo náá máꞌ rí i̱mba̱ xtángoo, na̱gu̱ma-mbáníí ne̱ ga̱jma̱á mbóó xtángoo ríge̱ꞌ: «Ga̱gaaꞌ xtayáá xa̱bo̱ numbaa ga̱jma̱a̱ꞌ xómá rí nandaaꞌ xtaya-mina̱ꞌ ikháánꞌ». 10 Tsí nandoo jaꞌñúú xa̱bo̱, tsíꞌne-ñawúu̱n máꞌ nimbáa. Ikhaa jngó, tsí nandoo jaꞌñúú xa̱bo̱, naꞌne-mbánuu̱ máꞌ xúgíí xtángoo.

11 Gu̱ne̱laꞌ rí na̱tha̱nꞌlaꞌ ge̱jyoꞌ, numuu rí ndu̱ya̱álaꞌ máꞌ náá mbiꞌi juwalóꞌ xúge̱ꞌ. Nixtáa máꞌ rí ma̱jwi̱iꞌlóꞌ rá, numuu rí i̱tha̱án máꞌ nangiyuu mbiꞌi rí ma̱jríñáaꞌlóꞌ xúge̱ꞌ xó rí nákhí ninimba̱ꞌlóꞌ. 12 Ni̱ka̱ guéño máꞌ mbroꞌon rá, jamí inu máꞌ ma̱ga̱nú mbiꞌi. Ikhaa jngó, gu̱ni̱ꞌñáá-ru̱ꞌne̱lóꞌ rí nune̱ xa̱bo̱ tsí júwa̱ꞌ ná mijína, jamí ga̱jmalóꞌ ski̱yu̱u̱ꞌ Ana̱ꞌlóꞌ rí xómá xtíin ajwa̱nꞌ jaꞌnii. 13 Ga̱juwalóꞌ ga̱jma̱á gamaku ná awúun mbiꞌi rí juwalóꞌ, xómá jaꞌyoo rí mu̱ꞌne̱lóꞌ. Ma̱xápeꞌtso guéñalóꞌ jamí ma̱xájngáanꞌlóꞌ. Ma̱xáni̱gua̱ꞌlóꞌ rí mu̱ꞌbálóꞌ gajmiálóꞌ xa̱bo̱ tsí túꞌyáalóꞌ ni máꞌ mu̱xúꞌne̱lóꞌ rí xkawe̱ꞌ nu̱ndxa̱ꞌwa̱-mijnálóꞌ. Ma̱xátsa̱ña̱ꞌlóꞌ gajmiálóꞌ xa̱bo̱ jamí ma̱xáxígua̱ꞌlóꞌ juꞌñúu̱. 14 A̱ꞌkhue̱n gakon, ga̱nindxa̱ꞌlaꞌ xómá jaꞌnii Táta̱ Jesukrísto̱, jamí mu̱xúꞌyálaꞌ rí mu̱ne̱laꞌ rí nandoo xuyalaꞌ.