1 Á gíꞌdoo numuu rí mbá tikhuun ñajúún xa̱bo̱ judío̱ xúꞌkhue̱n rá. Á nambáyúu rí ndiye̱e̱ tsina jndi rá. 2 Mi̱ndaꞌkho gíꞌdoo numuu ne̱. Rí phú ginii jayu, xa̱bo̱ judío̱ waꞌxná-ngáwúu̱n ajngáa rawuun Ana̱ꞌlóꞌ. 3 Xí mbá tikhuun tsí ikhii̱n tánimbúu̱n juyáa̱ ne̱, á rúꞌkhue̱n iꞌthán rí náxáꞌne-mbánuu Ana̱ꞌlóꞌ rí nixuda-mina̱ꞌ ma̱ꞌne rá. 4 ¡Na̱nguá mbá jayu! Numuu rí Ana̱ꞌlóꞌ jámba̱ miꞌtsú naꞌthée̱n rí gakon, maske máꞌ mbá xúgíin xa̱bo̱ numbaa mixtutii̱n. Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Kajngó ma̱kujma rí gakon ajngáaꞌ,

jamí ma̱ꞌnga̱a̱ꞌ ído̱ rí ma̱mba̱núu numaaꞌ».*

5 Ído̱ rí nu̱ne̱xo̱ꞌ rí ra̱máján, tsáanꞌ xa̱bo̱ judío̱ ñajwanxo̱ꞌ, a̱ꞌkhue̱n phú i̱tha̱án nakujma rí máján naꞌne Ana̱ꞌlóꞌ. Dí gúꞌthánlóꞌ xúꞌkhue̱n rá. Á mu̱ꞌthánlóꞌ rí ra̱máján eꞌne Ana̱ꞌlóꞌ ído̱ naꞌnii̱ rí mu̱drígú jamínu̱ꞌ tsí nene̱ rí ra̱máján rá. (Gu̱ne̱ mba̱a̱ a̱kia̱nꞌlaꞌ, xómá ithan jayu xa̱bo̱ numbaa i̱tha̱nlo̱ꞌ.) 6 ¡Na̱nguá, tsíꞌnii̱ mbá jayu rí ra̱máján! Xí ra̱máján eꞌne Ana̱ꞌlóꞌ, xáne lá gáxudaa̱ awan ga̱jma̱á numúú mbá xúgíin xa̱bo̱ numbaa xúꞌkhue̱n rá.

7 Xí ído̱ rí ikhúúnꞌ na̱ne̱-ndúwalo̱ꞌ, i̱tha̱án máꞌ nakujma rí kuwiin Ana̱ꞌlóꞌ kajngó ma̱gu̱ma-mba̱a̱, náá numuu kajngó xóó nithán rí xa̱bo̱ aꞌkhán ñajunꞌ xúꞌkhue̱n rá. 8 Náá numuu kajngó tsíꞌthánlóꞌ xómá nuthan mbá tikhuun tsí nu̱rígu ajngáa waꞌa tsu̱da̱xo̱ꞌ róꞌ: «Gu̱ꞌne̱lóꞌ rí xkawe̱ꞌ kajngó ma̱ꞌkha̱ rí máján». Xkuaꞌnii i̱sngáá ikháanꞌxo̱ꞌ méꞌ. Ana̱ꞌlóꞌ gáxná-máꞌíin rí mu̱míni̱í xa̱bo̱ tsí nuthan rúꞌkhue̱n.

9 Dí gúꞌthánlóꞌ xúꞌkhue̱n rá. Á i̱wa̱á máján kuajún ikháanꞌxo̱ꞌ ná inuu Ana̱ꞌlóꞌ, tsáanꞌ ñajwanxo̱ꞌ xa̱bo̱ judío̱ rá. ¡Na̱nguá mbá jayu! Numuu rí niꞌthánlóꞌ máꞌ rí mbá xúgíin xa̱bo̱ gíꞌmii aꞌkhán: xa̱bo̱ judío̱ jamí xa̱bo̱ tsí ra̱ꞌkháa judío̱ ñajúún. 10 Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ndawa̱a̱ asndo nimbáa xa̱bo̱ tsí naꞌne rí máján.

11 Ndawa̱a̱ xa̱bo̱ tsí nafroꞌo̱o̱,

ndawa̱a̱ xa̱bo̱ tsí ndaꞌyáa Ana̱ꞌlóꞌ.

12 Mbá xúgíin jayu xa̱bo̱ nene̱-tsíngua̱ꞌ-mijná,

mbá xúgíi̱n jayu niꞌchíi̱n.

Ndawa̱a̱ xa̱bo̱ tsí naꞌne rí máján,

ndawa̱a̱ asndo nimbáa wáa».*

13 «Xómá iñúu-wa̱jen rí ja̱ma̱ꞌtha jaꞌnii aphúu̱n,

jamí ga̱jma̱á ra̱júu̱n nune̱-nduwee̱».*

«Asndo xómá iyandawoo a̱bo̱ꞌ jaꞌnii ajngáa rí nagájnuu ná rawúu̱n».*

14 «Gatíí ajngáa xkawe̱ꞌ jamí rí tsíjmaa ná rawúu̱n».*

15 «Maphú nachúu̱n rí magóo̱ gúradíi̱n xa̱bo̱.

16 Nune̱ gámbúu̱n mbá xúgíí rí ríga̱

jamí i̱ndo̱ó máꞌ tsingíná ríga̱ asndo náá máꞌ nagóo̱.

17 Tsíne̱-nuwii̱n jambo̱o̱ rí tsímáá».*

18 «Jamí na̱nguá imíñúu̱ juyáa̱ Ana̱ꞌlóꞌ».*

19 Nduꞌyáálóꞌ máꞌ rí mbá xúgíí rí naꞌthán xtángawoo Moisés, gíꞌdoo ski̱yu̱u̱ꞌ ne̱ ná inúú tsí gíꞌmii rí mune̱-mbáníí rí naꞌthán ne̱. Kajngó mbá xúgíin xa̱bo̱ gáꞌne-wíyuu rawúún jamí ma̱kujma aꞌkhúún ná inuu Ana̱ꞌlóꞌ. 20 Numuu rí asndo nimbáa xa̱bo̱ ma̱xíꞌthán rí nánda̱a̱ aꞌkhúun ná inuu Ana̱ꞌlóꞌ ga̱jma̱á numuu rí naꞌne-mbánuu rí naꞌthán xtángoo. Rí xtángoo i̱ndo̱ó máꞌ najmaa ne̱ rí mbu̱ꞌyáálóꞌ rí xa̱bo̱ aꞌkhán ñajwanlóꞌ.

21 Xómáꞌ xúge̱ꞌ rá, nisngájmalóꞌ rí waꞌtháán máꞌ ná xtángoo jamí rí nithan máꞌ tsí ni̱rawíjnga̱a ajngóo Ana̱ꞌlóꞌ wajyúú. Nisngájmalóꞌ rí Ana̱ꞌlóꞌ naꞌthán rí nánda̱a̱ aꞌkhánlóꞌ, ra̱ꞌkhá ga̱jma̱á numuu rí nu̱ꞌne̱-mbáníílóꞌ rí naꞌthán xtángawoo Moisés. 22 Ana̱ꞌlóꞌ naꞌthán rí nánda̱a̱ aꞌkhúún xa̱bo̱ tsí wéje̱ a̱kui̱ín ná inuu Jesukrísto̱, jámbi̱in tsí nanimbu̱únꞌ juyáa̱. Numuu rí mbá xúgíin xa̱bo̱ mbríguii̱n ná inuu Ana̱ꞌlóꞌ. 23 Xúꞌkhue̱n máꞌ mbá xúgíi̱n nini̱i̱ aꞌkhán, jamí tsíngua̱ꞌ júwe̱e̱ꞌ inuu rí phú wáá ñajuun Ana̱ꞌlóꞌ. 24 Xómáꞌ Ana̱ꞌlóꞌ, ga̱jma̱á numuu rí maphú májáan a̱kuii̱n jamí tsíru̱mee̱ máꞌ nitháan, naꞌthée̱n rí nánda̱a̱ aꞌkhúu̱n, ga̱jma̱á numuu rí Krísto̱ Jesús niꞌtse̱-ri̱ñii̱ꞌ ná awúun aꞌkhán.

25 Ana̱ꞌlóꞌ nixnáxi̱i̱ Jesukrísto̱ rí ma̱ja̱ñúu kajngó ma̱goo ma̱ꞌne mba̱a̱ a̱kuii̱n jaꞌyoo̱ aꞌkhánlóꞌ. Jamí naꞌne mba̱a̱ a̱kuii̱n jaꞌyalóꞌ ga̱jma̱á numuu nanimba̱ꞌlóꞌ rí Jesukrísto̱ nijáñuu ga̱jma̱á numalóꞌ. Xkuaꞌnii neꞌne Ana̱ꞌlóꞌ kajngó masngájmee̱ rí ikhaa̱ naꞌnii̱ rí máján, jamí phú mba̱a̱ a̱kuii̱n jaꞌñúu̱ xa̱bo̱ rí neꞌne mba̱a̱ a̱kuii̱n jaꞌyoo̱ aꞌkhán rí nini̱i̱ nákhí wajyúú. 26 Numuu niꞌgí-mine̱e̱ꞌ rí xúge̱ꞌ masngájmee̱ rí máján naꞌnii̱, kajngó ma̱kujma rí ikhaa̱ ñajuu̱n tsí naꞌnii̱ rí máján, jamí tsí naꞌthán rí nánda̱a̱ aꞌkhúún tsí wéje̱ a̱kui̱ín ná inuu Jesús.

27 Á ma̱goo mu̱ꞌne̱-tsiꞌyálóꞌ ná inuu Ana̱ꞌlóꞌ rí xkuaꞌnii rá. ¡Na̱nguá mbá jayu! Náá numuu róꞌ. Numuu rí ra̱ꞌkhá ga̱jma̱á numuu rí nu̱ꞌne̱-mbáníílóꞌ rí naꞌthán xtángoo, naꞌthán Ana̱ꞌlóꞌ rí nánda̱a̱ aꞌkhánlóꞌ, rí ga̱jma̱á numuu rí wéje̱ a̱kia̱nꞌlóꞌ ná inuu Jesús. 28 A̱ꞌkhue̱n nakujma rí Ana̱ꞌlóꞌ naꞌthán rí nánda̱a̱ aꞌkhúun xa̱bo̱ ga̱jma̱á numuu rí wéje̱ a̱kuii̱n ná inuu Jesús, jamí ra̱ꞌkhá ga̱jma̱á numuu rí naꞌne-mbánuu̱ rí naꞌthán xtángoo.

29 Á i̱ndo̱ó máꞌ Anu̱ú xa̱bo̱ judío̱ ñajuun tsí Ana̱ꞌlóꞌ rá dxe̱ꞌ. Á ra̱ꞌkhá ikhaa̱ ñajuu̱n Anu̱ú xa̱bo̱ tsí ra̱ꞌkháa judío̱ ñajúún mangaa rá. Gakon máꞌ rí Ana̱ꞌlóꞌ ñajuun Anu̱ú xa̱bo̱ tsí ra̱ꞌkháa judío̱ ñajúún mangaa. 30 Numuu rí mbáwíi máꞌ tsí ñajuun Ana̱ꞌlóꞌ mbá xúgiáanꞌlóꞌ. Jamí ikhaa̱ maꞌthée̱n rí nánda̱a̱ aꞌkhúún xa̱bo̱ tsí wéje̱ a̱kui̱ín ná inuu Jesús, ga̱nindxúu̱n xa̱bo̱ judío̱ o xa̱bo̱ tsí ra̱ꞌkháa judío̱ ñajúún mbo̱ꞌ. 31 Á ga̱jma̱á numuu rí wéje̱ a̱kia̱nꞌlóꞌ ná inuu Jesús, nuꞌthánlóꞌ rí na̱nguá gíꞌdoo numuu xtángoo rá dxe̱ꞌ. ¡Na̱nguá mbá jayu! A̱ꞌkhue̱n gakon, nuꞌthánlóꞌ rí phú gíꞌdoo numuu ne̱.