1 Gu̱ꞌthán-mijnálóꞌ ga̱jma̱á numuu rí nijanáá Abraám, táta̱-xi̱ꞌñáxo̱ꞌ wajyúú tsí ju̱ya̱xo̱ꞌ iꞌdiuu. 2 Xí numuu rí Ana̱ꞌlóꞌ niꞌthán rí nánda̱a̱ aꞌkhúun Abraám ga̱jma̱á numuu rí máján niꞌnii̱, ma̱goo máꞌ makúxe̱-mine̱e̱ꞌ xúꞌkhue̱n rá, i̱ndo̱ó máꞌ numuu rí ra̱ꞌkhá ná inuu Ana̱ꞌlóꞌ. 3 Numuu rí xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ninimbo̱o̱ꞌ Abraám jaꞌyoo Ana̱ꞌlóꞌ, rúꞌkhue̱n jngó ndiꞌyoo Ana̱ꞌlóꞌ rí májáan a̱kuii̱n».*

4 Ído̱ rí mbáa xa̱bo̱ nañajun, nadaa̱ numuu̱. Ra̱ꞌkhá mbá rí najanáa̱ ñajuun rúꞌkhue̱n, rí mbá rí jaꞌyoo mbayée̱. 5 Xómáꞌ xa̱bo̱ tsí nda̱a̱ rí eꞌne rá, rí i̱ndo̱ó máꞌ nanimbo̱o̱ꞌ rí Ana̱ꞌlóꞌ naꞌne májáan a̱kui̱in xa̱bo̱ aꞌkhán, tsúꞌkhue̱n tsí nánda̱a̱ aꞌkhúun numuu rí wéje̱ a̱kuii̱n ná inuu Ana̱ꞌlóꞌ. 6 Xkuaꞌnii máꞌ niꞌthán Dabíd mangaa, rí phú gagi xtáa xa̱bo̱ tsí naꞌthán Ana̱ꞌlóꞌ rí nánda̱a̱ aꞌkhúun, jamí ra̱ꞌkhá máꞌ ga̱jma̱á majñu̱u̱ rí máján naꞌnii̱. 7 Xáꞌnii niꞌthán Dabíd:

«Phú gagi júwa̱ꞌ xa̱bo̱ tsí naꞌne mba̱a̱ a̱kui̱in Ana̱ꞌlóꞌ jaꞌyoo aꞌkhúún,

jamí narngudi̱i rí xkawe̱ꞌ nuni̱i̱.

8 Phú gagi xtáa xa̱bo̱ tsí naꞌthán Táta̱ rí nánda̱a̱ aꞌkhúun».*

9 Á i̱ndo̱ó máꞌ xa̱bo̱ tsí juya̱ tsina jndi jaꞌñúú mu̱guaꞌdáá gagi ríge̱ꞌ rá, o jaꞌñúú máꞌ xa̱bo̱ tsí ra̱júya̱ tsina jndi mangiin dxe̱ꞌ. Numuu nuꞌthánlóꞌ rí Abraám ni̱we̱je̱ a̱kui̱in ná inuu Ana̱ꞌlóꞌ, kajngó niꞌthán Ana̱ꞌlóꞌ rí xa̱bo̱ tsí májáan a̱kui̱in ñajuu̱n. 10 Nguáná niꞌthán Ana̱ꞌlóꞌ rí xa̱bo̱ tsí májáan a̱kui̱in ñajuun Abraám róꞌ. Ído̱ wámba̱ ndiyée̱ tsina jndi ráanꞌ, o nákhí xóó táyée̱ tsina jndi dxe̱ꞌ. Ra̱ꞌkhá ído̱ wámba̱ máꞌ ndiyée̱ tsina jndi, rí asndo nákhí máꞌ xóó táyée̱ tsina jndi ndiꞌyoo Ana̱ꞌlóꞌ rí xa̱bo̱ tsí májáan a̱kui̱in ñajuu̱n. 11 Abraám ni̱grui̱gú tsina jndi, numuu rí rúꞌkhue̱n nasngájma rí xa̱bo̱ tsí májáan a̱kui̱in ñajuu̱n, ga̱jma̱á numuu rí ni̱we̱je̱ a̱kuii̱n ná inuu Ana̱ꞌlóꞌ nákhí rí xóó ra̱jáyée̱ tsina jndi. Xkuaꞌnii kajngó, Abraám ninindxu̱u̱ anu̱ú mbá xúgíin xa̱bo̱ tsí wéje̱ a̱kui̱ín ná inuu Ana̱ꞌlóꞌ, maske máꞌ ra̱júye̱e̱ tsina jndi. Ikhaa jngó, tsíge̱ꞌ mangiin nandoo nithán rí xa̱bo̱ tsí májáan a̱kui̱ín ñajúu̱n ga̱jma̱á numuu rí wéje̱ a̱kuíi̱n ná inuu Ana̱ꞌlóꞌ. 12 Jamí xúꞌkhue̱n máꞌ mangaa, Abraám ñajuun anu̱ú tsí juda tsina jndi, jamí wéje̱ a̱kui̱ín ná inuu Ana̱ꞌlóꞌ xómá ni̱we̱je̱ a̱kui̱in tátiáxo̱ꞌ Abraám nákhí rí xóó ra̱jáyée̱ tsina jndi.

13 Numuu rí Ana̱ꞌlóꞌ nixuda-mina̱ꞌ ga̱jma̱á nindxu̱u̱ Abraám, rí ikhaa̱ gajmíi̱ xa̱bii̱ ma̱ꞌne drígúu̱n ñajuun mbá xúgíí numbaa. Ra̱ꞌkhá ga̱jma̱á numuu rí neꞌne-mbánuu̱ xtángoo rí nixuda-mina̱ꞌ Ana̱ꞌlóꞌ ríge̱ꞌ, rí ga̱jma̱á numuu rí xa̱bo̱ tsí májáan a̱kui̱in ñajuu̱n ndiꞌyoo Ana̱ꞌlóꞌ, numuu rí wéje̱ a̱kuii̱n ná inuu Ana̱ꞌlóꞌ. 14 Xí tsí nune̱-mbáníí xtángoo ñajúún tsí ma̱ꞌne drígu̱ún rí niꞌthán Ana̱ꞌlóꞌ, nda̱a̱ máꞌ numuu rí ma̱we̱je̱ a̱kia̱nꞌlóꞌ ná inuu Ana̱ꞌlóꞌ xúꞌkhue̱n rá, ni máꞌ nda̱a̱ numuu rí nixuda-mina̱ꞌ Ana̱ꞌlóꞌ mangaa. 15 Numuu rí ná ríga̱ xtángoo, mudaa jamínu̱ꞌ xa̱bo̱ tsí na̱nguá ene̱-mbáníí ne̱. Xómáꞌ ná nda̱a̱ xtángoo rá, ndawa̱a̱ máꞌ tsí ma̱rigu tsu̱du̱u̱ rí tsíꞌne-mbánuu ne̱ mangaa.

16 Ikhaa jngó, Ana̱ꞌlóꞌ nixuda-mina̱ꞌ ga̱jma̱á majñu̱u̱ rí ni̱we̱je̱ a̱kui̱in Abraám ná inuu̱, numuu ndiyoo Ana̱ꞌlóꞌ rí mbá xúgíin xa̱bi̱i Abraám ma̱janúú rí naxuda-mine̱e̱ꞌ. Ra̱ꞌkhá i̱ndo̱ó tsí nune̱-mbáníí xtángoo ma̱janúú rí nixuda-mina̱ꞌ Ana̱ꞌlóꞌ, rí asndo tsí wéje̱ a̱kui̱ín ná inuu Ana̱ꞌlóꞌ mangiin xómá ni̱we̱je̱ a̱kui̱in Abraám. Ikhaa̱ ñajuu̱n tátiálóꞌ mbá xúgiáanꞌ ikháánꞌlóꞌ. 17 Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ni̱ꞌgíínlo̱ꞌ rí ma̱nindxa̱a̱ꞌ anu̱ú mbaꞌa inii xa̱bo̱».* Xkuaꞌnii ninimbo̱o̱ꞌ Abraám jaꞌyoo Ana̱ꞌlóꞌ, tsí naꞌne rí mbuya̱a mbiꞌñúú wa̱jen, jamí naꞌthán numuu rí xóó nda̱a̱, asndo xó rí ríga̱ máꞌ ne̱ jaꞌnii.

18 Abraám ninimbo̱o̱ꞌ jaꞌyoo Ana̱ꞌlóꞌ jamí ga̱jma̱á mbá jañii a̱kuii̱n ni̱gi̱ꞌthu̱u̱n, maske máꞌ nánguá jaꞌnii rí ma̱gi̱ꞌthu̱u̱n, rí ikhaa̱ ma̱nindxu̱u̱ anu̱ú mbaꞌa inii xa̱bo̱, xómá waꞌtháa̱n neꞌne Ana̱ꞌlóꞌ: «Xkuaꞌnii mbaꞌiin xa̱bia̱aꞌ gáꞌne».* 19 Jamí táꞌne wabaa a̱kuii̱n rí ma̱gi̱ꞌthu̱u̱n, maske máꞌ ndiꞌyoo̱ rí maphú nikhi̱i̱ jamí asndo xó rí nijáñúu̱ máꞌ jaꞌnii, numuu rí naꞌne máꞌ xí mbá witsu skíñú (100) wáa tsiguu̱, jamí ndiꞌyoo̱ máꞌ rí náxáꞌngo̱o̱ gáꞌne xuajen Sára̱ mangaa. 20 Xúꞌkhue̱n máꞌ táꞌne a̱jma̱ a̱kuii̱n, ni máꞌ táꞌnii̱ rí ma̱xánimbo̱o̱ꞌ rí nixuda-mina̱ꞌ Ana̱ꞌlóꞌ ma̱ꞌne, a̱ꞌkhue̱n gakon i̱wa̱á ni̱we̱je̱-gúkúu a̱kuii̱n ná inuu Ana̱ꞌlóꞌ. Xkuaꞌnii neꞌne-mba̱a̱ Ana̱ꞌlóꞌ. 21 Mbá jañii a̱kui̱in Abraám ninimbo̱o̱ꞌ rí Ana̱ꞌlóꞌ gíꞌdoo tsiakhe̱ rí ma̱ꞌne-mbánuu mbá xúgíí rí nixuda-mina̱ꞌ ma̱ꞌne. 22 Ikhaa numuu rúꞌkhue̱n, niꞌthán Ana̱ꞌlóꞌ rí xa̱bo̱ tsí májáan a̱kui̱in ñajuun Abraám ga̱jma̱á numuu rí ni̱we̱je̱ a̱kuii̱n ná inuu Ana̱ꞌlóꞌ.

23 Ra̱ꞌkhá máꞌ i̱ndo̱ó ga̱jma̱á numuu Abraám waꞌtháán rí ndiꞌyoo Ana̱ꞌlóꞌ rí májáan a̱kuii̱n, 24 rí ga̱jma̱á máꞌ numalóꞌ ikháánꞌlóꞌ mangaa, tsáanꞌ nanimba̱ꞌlóꞌ juꞌyáá Ana̱ꞌlóꞌ, tsí neꞌne rí mbayáa mbiꞌyuu Tátiálóꞌ Jesús, mi̱ꞌthán rí xa̱bo̱ tsí májáan a̱kui̱ín ñajwanlóꞌ. 25 Ana̱ꞌlóꞌ nixnáxi̱i̱ Jesús kajngó ma̱ja̱ñúu̱ ga̱jma̱á numuu aꞌkhánlóꞌ, jamí Ana̱ꞌlóꞌ máꞌ neꞌne rí mbayáa̱ mbiꞌyuu̱ kajngó maꞌthée̱n rí nánda̱a̱ aꞌkhánlóꞌ.