1 Dí gúꞌne̱lóꞌ xúꞌkhue̱n rá. Mu̱ꞌne̱lóꞌ máꞌ xúꞌkhue̱n aꞌkhán kajngó ma̱ꞌne i̱tha̱án mba̱a̱ rí máján naxná Ana̱ꞌlóꞌ ráanꞌ. 2 ¡Na̱nguá mbá jayu! Numuu rí ikháánꞌlóꞌ tsáanꞌ nijáñalóꞌ máꞌ ná inuu aꞌkhán, ma̱xáxóo ma̱juwalóꞌ rí mu̱ꞌne̱lóꞌ xóó aꞌkhán. 3 Á tsíya̱álaꞌ rí mbá xúgiáanꞌlóꞌ tsáanꞌ waxúꞌdu-maꞌáanꞌlóꞌ ná awúun iya numuu rí nanimba̱ꞌlóꞌ juꞌyáá Krísto̱ Jesús, asndo xó rí nijáñalóꞌ ga̱jma̱á nindxu̱u̱ rá dxe̱ꞌ. 4 Numuu rí ga̱jma̱á majñu̱u̱ rí waxúꞌdu-maꞌáanꞌlóꞌ ná awúun iya, nijáñalóꞌ jamí waꞌdiáanꞌlóꞌ ga̱jma̱á nindxu̱u̱. Ikhaa jngó, xómá rí Krísto̱ ndiyáa mbiꞌyuu ga̱jma̱á ski̱yu̱u̱ꞌ Ana̱ꞌlóꞌ, xkuaꞌnii máꞌ mbu̱ꞌyáa mbiꞌyalóꞌ rí nuxe̱ꞌ mangáanꞌlóꞌ, kajngó ma̱nindxa̱ꞌlóꞌ xa̱bo̱ nuxi̱inꞌ.

5 Xí mbáwíi xa̱bo̱ ninindxa̱ꞌlóꞌ gajmiálóꞌ Krísto̱ ga̱jma̱á numuu xó rí nijáñuu̱, xkuaꞌnii máꞌ mangaa, mbáwíi xa̱bo̱ gánindxa̱ꞌlóꞌ gajmiálóꞌ ga̱jma̱á numuu xó rí ndiyáa̱ mbiꞌyuu̱. 6 Nduꞌyáálóꞌ máꞌ rí xa̱bo̱ wayii tsí ninindxa̱ꞌlóꞌ wajyúú, waꞌdujmaa̱ ná ixe̱ krúsi̱ ga̱jma̱á nindxu̱u̱ Krísto̱, kajngó ma̱mbáa ski̱yu̱u̱ꞌ aꞌkhán rí ríga̱ ná xuyalóꞌ, xkuaꞌnii rí náxáꞌthán-ñájwanlóꞌ aꞌkhán. 7 Numuu rí xa̱bo̱ tsí nijáñuu máꞌ, nijríya̱a̱ꞌ máꞌ ná inuu aꞌkhán.

8 Numuu rí nijáñalóꞌ máꞌ ga̱jma̱á nindxu̱u̱ Krísto̱, ikhaa jngó naꞌne jañii a̱kia̱nꞌlóꞌ rí mbu̱ꞌyalóꞌ ga̱jma̱á nindxu̱u̱ mangaa. 9 Jamí nduꞌyáálóꞌ máꞌ ríge̱ꞌ, ído̱ rí Krísto̱ ndiyáa mbiꞌyuu, jámuu xtáa̱. Ikhaa jngó, nánguá máꞌ wéje̱ rí ma̱ja̱ñúu̱. 10 Numuu rí nákhí nijáñúu̱ mbóó miꞌtsú, jámuu neꞌne-gámbo̱o̱ ski̱yu̱u̱ꞌ aꞌkhán. Ikhaa jngó rí xúge̱ꞌ rá, xtáa̱ ndaꞌyee̱ ma̱ꞌnii̱ rí nandoo Ana̱ꞌlóꞌ. 11 Xkuaꞌnii máꞌ mangáanꞌlaꞌ, a̱gu̱ya̱álaꞌ rí nánguá máꞌ juwalaꞌ rí mu̱ne̱laꞌ aꞌkhán, numuu rí nijáñalaꞌ inuu ne̱. Xómáꞌ xúge̱ꞌ rá, juwa ndu̱ya̱laꞌ kajngó mu̱ne̱laꞌ rí nandoo Ana̱ꞌlóꞌ ga̱jma̱á majñu̱u̱ Krísto̱ Jesús.

12 Ikhaa numuu rúꞌkhue̱n, náxáꞌthán-ñájuun aꞌkhán xuyalaꞌ rí wéje̱ ma̱mbáa, ni máꞌ náxúne̱laꞌ rí xkawe̱ꞌ nandoo xuyalaꞌ. 13 Mu̱xúxna̱xílaꞌ xuyalaꞌ ná inuu aꞌkhán kajngó ma̱jmuu ne̱ rí ma̱ꞌne rí xkawe̱ꞌ. A̱ꞌkhue̱n gakon, gu̱xna̱xí-mijnálaꞌ mbá jayu ná inuu Ana̱ꞌlóꞌ xómá tsí ndiya̱a mbiꞌñúú, kajngó ma̱jmuu Ana̱ꞌlóꞌ xuyalaꞌ rí ma̱ꞌne rí máján. 14 Xkuaꞌnii kajngó, náxági̱ꞌdoo tsiakhe̱ aꞌkhán rí maꞌthán-ñájwanlaꞌ. Numuu rí nánguá máꞌ juwalaꞌ rí mu̱ne̱-mbáníílaꞌ xtángawoo Moisés, rí juwalaꞌ ga̱jma̱á numuu rí máján naxná Ana̱ꞌlóꞌ.

15 Dí gúꞌne̱lóꞌ xúꞌkhue̱n rá. Á mu̱ꞌne̱lóꞌ máꞌ xúꞌkhue̱n aꞌkhán numuu rí nánguá máꞌ juwalóꞌ rí mu̱ꞌne̱-mbáníílóꞌ xtángoo, rí juwalóꞌ ga̱jma̱á numuu rí máján naxná Ana̱ꞌlóꞌ rá. ¡Na̱nguá mbá jayu! 16 Xí ikháanꞌlaꞌ nu̱xna̱xí-mijnálaꞌ rí maꞌthán-ñájwanlaꞌ mbáa xa̱bo̱ xómá yumbáá waꞌtsi̱in jamí nu̱ne̱-mbáníílaꞌ rí naꞌthée̱n, ikháanꞌlaꞌ ñajwanlaꞌ yumbáá waꞌtsi̱in drígo̱o̱ tsí nu̱ne̱-mbáníílaꞌ rí naꞌthán. Xí ikháanꞌlaꞌ ñajwanlaꞌ yumbáá waꞌtsi̱in drígo̱o̱ aꞌkhán, ma̱ja̱ñálaꞌ, jamí xí ikháanꞌlaꞌ ñajwanlaꞌ yumbáá waꞌtsi̱in drígo̱o̱ Ana̱ꞌlóꞌ, ikhaa̱ maꞌthée̱n rí nánda̱a̱ aꞌkhánlaꞌ ná inuu̱. 17 Rí nákhí wapha ikháanꞌlaꞌ ninindxa̱ꞌlaꞌ yumbáá waꞌtsi̱in drígo̱o̱ aꞌkhán. Xómáꞌ xúge̱ꞌ rá, núma̱aꞌ la Ana̱ꞌlóꞌ rí mbá jañii a̱kia̱nꞌlaꞌ ninimba̱ꞌlaꞌ jamí ni̱drígúlaꞌ gisngáá rí waꞌsngálaꞌ. 18 Ído̱ rí nijríñáaꞌlaꞌ máꞌ ná ñawúun aꞌkhán, nánguá máꞌ ñajwanlaꞌ yumbée ne̱, rí yumbée Ana̱ꞌlóꞌ ñajwanlaꞌ kajngó mu̱ne̱laꞌ rí máján. 19 Na̱tha̱nꞌ-makalaꞌ ríge̱ꞌ, numuu rí wabáanꞌlaꞌ jamí tsíꞌnga̱ꞌlaꞌ gáfraꞌa̱ꞌ-májánlaꞌ ne̱. Xómá rí ni̱xna̱xí-mijnálaꞌ nákhí wapha ná ñawúun aꞌkhán rí mu̱ne̱ miꞌsmba-mijnálaꞌ jamí mu̱ne̱laꞌ rí xkawe̱ꞌ, xkuaꞌnii máꞌ gúxna̱xí-mijnálaꞌ xúge̱ꞌ ná ñawúun Ana̱ꞌlóꞌ kajngó ma̱ꞌne-jaꞌwáa̱nꞌlaꞌ jamí mu̱ne̱laꞌ rí máján.

20 Numuu rí nákhí ninindxa̱ꞌlaꞌ yumbáá waꞌtsi̱in drígo̱o̱ aꞌkhán, na̱nguá máꞌ ni̱we̱je̱ inalaꞌ rí mu̱ne̱laꞌ rí máján ná inuu Ana̱ꞌlóꞌ. 21 Náá lá rí máján ni̱da̱alaꞌ nákhí ne̱ne̱laꞌ rí nandoo aꞌkhán rá. I̱ndo̱ó máꞌ na̱ti̱ya̱ꞌlaꞌ ído̱ rí na̱rmáꞌáan a̱kia̱nꞌlaꞌ rí ne̱ne̱laꞌ rí naꞌne rí ma̱ja̱ñálaꞌ. 22 Xómáꞌ xúge̱ꞌ rá, rí nijríñáaꞌlaꞌ máꞌ ná ñawúun aꞌkhán jamí ninindxa̱ꞌlaꞌ máꞌ yumbée Ana̱ꞌlóꞌ rá, na̱ka̱-ra̱gu̱ma-jaꞌwáanꞌlaꞌ eꞌne Ana̱ꞌlóꞌ, jamí nda̱wa̱á ma̱juwalaꞌ jámuu. 23 Numuu rí aꞌkhán naꞌne-numa̱aꞌlóꞌ ga̱jma̱á rí ma̱ja̱ñálóꞌ, xómáꞌ Ana̱ꞌlóꞌ naxná rí ma̱juwalóꞌ jámuu ga̱jma̱á majñu̱u̱ Tátiálóꞌ Krísto̱ Jesús.