Mateus 4

İblisın I’sa siliys ı’xiyxə

1 Qiyğa I’sa iblisın siliys ı’xecenva Allahne Rı’hı’n mana sahreeqa ıkekka. 2 I’sa sahreenang’a, Mang’vee yoq’ts’al yiğnayiy yoq’ts’al xəmna kar udyotxhan ıxhayke, Mana it’umra mıs qexhe.

3 Manke siliys ı’xı’yxəna Mang’usqa qarı eyhen:

– Ğu Allahna Dixxhee, mane g’ayebışik’le eyhe gınelqa sak’lecen.

4 I’see mang’us inəxdun alidghıniy qele:

– «İnsanee saccu gıneykacab deş, Allahne ghalençe qı’ğəəne cuvabıkab çikana ı’mı’r haa’ava»*4:4 İnəxüd Mısa peyğambarne xhod’esde kitabee otk’un (Q’aanun 8:3). otk’un.

5 Qiyğa iblisın Mana muq’addasne İyerusalimne şahareeqa arı, Allahne Xaane nekke axtıne cigeeqa giyxhxhı, 6 eyhen:

– Ğu Allahna Dixxhee, Ğucar-Ğu inçe avqa ehe. Nya’a, otk’un dişde:

Allahee «Yiğnemee malaaikaşilqa əmr haa’as,

Ğu xılibışil qıkkecen,

Yiğın g’elybı g’ayebışilek’ena qimiyxharcenva»*4:6 İnəxüd Zaburee otk’un (90:11-12)..

7 I’see mang’uk’le eyhen:

– «Yiğna Rəbb Allah siliys ı’xmiyxəvad»*4:7 İnəxüd Mısa peyğambarne xhod’esde kitabee otk’un (Q’aanun 6:16). otk’un vod.

8 Manke iblisın I’sa sa geed axtıne suvalqa alqavhu, Mang’uk’le dyunyeyn gırgın paççaharnan cigabı hits’ayghar hagu eyhen:

9 – Ğu kyorzul zas ı’bəədat he’eene, in gırgın Vak’le g’ecen zı Vas heles.

10 Manke I’see mang’uk’le eyhen:

– Şeyt’an, Zake əq’əna qixhe! Nya’a otk’un dişde:

«Rəbbis Allahıs k’yozre, saccu Mang’us ı’bəədat he’e»*4:10 İnəxüd Mısa peyğambarne xhod’esde kitabee otk’un (Q’aanun 6:13)..

11 Mançile qiyğa iblisın Mana Culer-alqa g’alyaraççe. Mang’usqa malaaikar g’ullux haa’as adayle.