1 << Gogo gba, a̱ɗu nan Ganu udammu u nda adama a̱ɗu a ɗa. 2 Ni i 'yuwan a poloo mu atsuvu, waru ni i 'yuwan o foɓo okolo a̱ɗu i ca ala a̱ va̱ tsugbain shi.>> Ne ɗa A̱sulazuva o oɓolo a̱ a̱soja a zuva a dammai. <<To, n ta̱ lyungu na̱ mɓa̱la̱ aci a̱ ɗu, reve n yuwaan aba'un a̱ɗu una̱. Ee, n yuwaan le ta̱ ɗe una̱, adama a na i zuwa okolo a̱ ɗu i ca mu tsugbain shi.>> 3 <<Agba a̱ yi ɗa nda, n ta ɓara limatan ɗu, reve n tsuwa̱a̱n ɗu a̱ya̱n e inama i na i ta̱wa̱yi kucci o urewesu u ɗu, a̱vu mu uta̱ ɗu oɓolo na̱ a̱ya̱'a̱n. 4 Ne ɗa yee reve a na a̱mu ɗa n lyunguyi nu udammu u nda a̱ tyo ya̱'a̱ a̱ ɗu, adama n shiton nzuwulai n va̱ nu ugundo wa̱ Levi,>> ne ɗa A̱sulazuva o oɓolo a̱ a̱soja a zuva a dammai.✝ 5 <<Nzuwulai n va̱ na̱ yi nzuwulai n wuma u ɗa na̱ nden ma asuvu, zana n ca niyi, a̱ yi nda gba adama wu uwwa wovon u va̱ u ɗa. Waru wu uwwa ta̱ wovon u va̱, reve u ca ala a̱ va̱ tsugbain.✝ 6 Uritosu wa amayun u ta̱ o una̱ wa̱ yi, waru aa cina epen o una̱ wa̱ yi shi. U yuwan ta̱ mmalu oɓolo na̱ a̱mu a̱tsuma̱ asuvu nden na̱ mejege, reve u zuwa ama na̱ a̱bunda̱ a vadala a lyawa iwuya i le.>> 7 <<Adama a na ulobono ta̱ una̱ wa Ganu u da̱na̱ nu urevu, waru ama a zami udammu diga o una̱ wa̱ yi, adama a na a̱ yi malingata ma̱ A̱sulazuva o oɓolo a̱ a̱soja a zuva a ɗa. 8 Amma a̱vu a̱ɗu nan ganu i lyawa ure, hali i zuwa ama na̱ a̱bunda̱ a̱ ta̱ɗa̱tsa̱ a̱tsuma̱ o uritosu u ɗu, a̱vu i kuɗa akucunu a na n yuwain na̱ Levi,>> Ne ɗa A̱sulazuva o oɓolo a̱ a̱soja a zuva a dammai. 9 <<Adama o ndolo a̱mu na aciya̱va̱ n ta zuwa ama a Isra'ila a tara ɗu ili i ro wan, reve fo n zuwa a̱ ka̱ɗa̱to ɗu elime a ama suru, adama a na i yuwan tsutoni na̱ re va̱ shi, agba a̱ yi ɗa nda a̱tsuma̱ o uritosu u ɗu yoo rocosu aɗangulu.>>

10 Ashe dada ta̱ ɗa tsu shi? Ashe A̱sula̱ a̱ ta̱ a ɗa a yuwan tsu shi? Adama a̱ nye tsu ri nu ulambu wa̱ a̱ɓula̱, hali na tsu kuɗa̱i a tara nzuwulai mu nkaya n tsu ili i ro? 11 Ama a Yahuda a yuwan ta̱ ulambu wa̱ a̱ɓula̱, a yuwan ta̱ ili yi idaba a̱tsuma̱ a Isra'ila na̱ Urishelima. Adama a na Yahuda vari ta̱ Uba̱ta̱ wu Nde wa Akiza wa̱ A̱sulazuva, za na u cigai, a̱vu a zuwa a̱ma̱ci a na aa yuwusaan ma̱sula̱ mo ro a̱ga̱nda̱. 12 Vuma na yuwain cu'un ndolo suru, ko na̱ shi a̱yi ɗa yan, lyawa A̱sulazuva o kototo yi na̱ limatan va̱ yi diga a̱tsuma̱ a ama a Isra'ila, ko na̱ shi u ta̱wa̱a̱ ɗe na̱ kucci uba̱ta̱ wa̱ A̱sulazuva o oɓolo a̱ a̱soja a zuva.

13 Apa ili i ro i na yaa yuwusan. I re'weto ta̱ masa'a ma̱ A̱sulazuva na aɓara na̱ mesun na̱ wa̱ɗyosu adama a na u da̱shi u ushi kucci ɗu nu une'e wo okolo a̱ ta̱ a̱ ɗu diga ekere a̱ ɗu shi. 14 Amma i ta yuwusan yeci ana, <<Nye i zuwai u 'yuwain kucci tsu?>> Ashe, A̱sulazuva lyusu ɗa e ekere a̱ wu na̱ ka va̱ wu na vu zuwai a̱vu o ulobo, za na vu yuwayin ulambu wa̱ a̱ɓula̱ shi, ko na wo o'woi ka va̱ wu ɗa na vu yuwain akucunu o lolo na̱ yi.

15 Ashe, A̱sulazuva a ɗa a zuwa nɗu yo o'wo lipu ta̱ na̱ ruhu ta̱ shi? Nye i zuwai A̱sula̱ a yuwain ne? U ta zama adama muwun ntsu n da̱na̱ na̱ cu'un wuma wa̱ yi. Adama o ndolo gba, she yi idana aciya̱ɗu, she za a̱ a̱tsuma̱ a̱ ɗu kuɗa̱ da̱na̱ nu ulambu wa̱ a̱ɓula̱ e ekere a ka tsulobo tsa̱ yi wan. 16 <<Adama a na n 'yuwan ta̱ wukasu u lolo,>> ne ɗa A̱sulazuva a̱ A̱sula̱ a Isra'ila a dammai. <<Agba n ta 'yuwusan ili i nda cine n 'yuwain u'ya̱susa̱n wu ugɓozu. Adama o ndolo she yi idana aciya̱ɗu, adama ta̱wa̱ yo o'wo a̱za̱ o ulambu wa̱ a̱ɓula̱ wan.>> Ne ɗa A̱sulazuva o oɓolo a̱ a̱soja a zuva a dammai.

17 I ta damatosun A̱sulazuva na adanshi a̱ɗu, agba yeci ta̱, <<Cine tsu ɗa tsa damatosun yi?>> Ana ya dansa, <<Za na suru yuwain iwuya a̱yi ɗa za va̱ a̱ɓula̱ o urewesu wa̱ A̱sulazuva.>> I ta̱ waru e ecishe,<<Te ɗa A̱sula̱ a na a yuwusan uge'etosu u mejege?>>