1 <<Ka̱lyuwa̱, na amayun urana u ta̱ lo a̱ ta̱wa̱, tsa akina o uruma, a na aza aciyogbamu suru na̱ a̱za̱ e iwuya a̱ kula̱ tso ogozo o u'yewu. Urana u na u ri lo a̱ ta̱wa̱ u ta̱ lyuwa le suru,>> ne ɗa A̱sulazuva o oɓolo a̱ a̱soja a zuva a dammai. <<Diga a aralu a̱ tyo eten, ili yi lo na a lyawaa le shi. 2 Amma a̱ɗu na ya yuwusan mu tsutoni, ucira wi iwawi i va̱ u ta̱ uta̱ ɗu tsu urana. U ta̱ ta̱wa̱a̱ ɗu no opocino tse e ekan yu urana. Waru i to uta̱ a tsu'yan tsa̱ mudindim n na a̱ ba̱ɗa̱i diga a̱tsuma̱ oɓolo e inan. 3 A̱tsuma̱ o urana u na n foɓoi, i ta dadasa a̱za̱ e iwuya, adama a na o to o'wo okomo za̱la̱ va ana a̱ɗu. Ne ɗa A̱sulazuva o oɓolo a̱ a̱soja a zuva a dammai.>>

4 <<I cuwan nu uritosu wa aagbashi a̱ va̱ Musa, ni ili i na n zuwai na̱ a̱ kuru na̱ wila̱ nu udammu u na n ca niyi ɗe Horeb adama aza a Isra'ila suru a̱ kuru.>> 5 <<Agba a̱yi ɗa nda n ta̱ lyunguwa̱a̱ ɗu na̱ vumava̱sula̱ Iliya, kafu urana u gbain urana u wovon wa̱ A̱sulazuva a̱ ta̱wa̱.✝ 6 U ta vadala okolo a mbara a̱ tyo uba̱ta̱ u muwun nle, waru okolo a̱ muwun a̱ tyo uba̱ta̱ wu mbara nle, adama she n ta̱wa̱ n faba iɗa nu ukototosu wan.>>