1 A̱yi nda a̱ yi ɗa ikaka i na A̱sulazuva a dammai aza a Isra'ila diga o una̱ u vumava̱sula̱ Malaci.

2 <<Reve A̱sulazuva a damma, n ta̱ e icigi i ɗu mantsa suru.>>✝✝

<<Amma a̱vu i yuwan yeci i damma, <Cine tsu ɗa vu ri e icigi i tsu?>

<<Reve a̱ A̱sulazuva a̱ usu u damma, <Ashe! Isuwa mawun ma̱ a̱na̱wun ma Yakubu ɗa shi?> >> Ne ɗa A̱sulazuva a dammai. <<Na̱ ne suru n ciga ta̱ Yakubu, 3 amma n 'yuwan ta̱ Isuwa. Reve n zuwa upasu wu nsasan ma̱ yi mo o'wo okongo, waru uba̱ta̱ wa agadu a̱ yi o o'wo uba̱ta̱ wu nden n musa̱n yu una.>>

4 Ko na wo o'woi a̱za̱ a̱ Edom a̱ shi ta̱ ɗe a damma, <<O kototo tsu ta̱, na̱ ne suru tsu ta suwisa okongo'o,>> Amma a̱vu A̱sulazuva o oɓolo a̱ a̱soja a zuva a damma, <<Ee, a ta gura suwisa yi, amma n ta̱ ɓuɓoso yi, hali she na̱ e ɗe le iɗa yi iwuya, ama a na upan wa̱ A̱sulazuva aa jima aci e le.

5 <<I te ene ili i ndolo ne esu a̱ɗu reve i damma, <A̱sulazuva a̱ ta̱ na̱ tsugbain, tsugbain tsa̱ yi tsa̱ ka̱ra̱ ta̱ ukosu wi iɗa ya aza a Isra'ila!>

6 <<Mawun ma tsu yuwan ta̱ tsutoni na̱ dada va̱ yi, ne ɗa fo aagbashi aa yuwusan tsutoni na̱ zagbain va̱ yi. To, na̱ a̱mu dada ɗa a te ɗa gba tsugbain tsa̱ va̱? Na̱ a̱mu fo zagbain ɗa a te ɗa tsugbain tsa̱ va̱?>> Ne ɗa A̱sulazuva o oɓolo a̱ a̱soja a zuva a dammai. <<A̱ɗu nan ganu a na i kuɗa̱i a tara Ala a̱ va̱ ili i ro, i damma ta̱, <Cine tsu ɗa, tsu kuɗa̱i a tara Ala a̱ wu ili i ro?> >> 7 <<I ta casu ilyalya yi idaba zuva masa'a ma̱ va̱, a̱vu i damma, <Cine tsa ɗa tso o'wotoi masa'a ma̱ wu idaba?> >> <<To, n ta damma ɗu, Cine i kuɗa̱i a tara apada a̱ va̱ ili i ro. 8 Mantsa ma na i ta̱wa̱yi na̱ nama na ri irumba̱ adama i ca kucci, ashe iwuya i ɗa o ndolo'o shi? Waru mantsa ma na i ta̱wa̱yi na̱ nama na ri a̱kutsuma̱ ko za na ri ubanakun a̱yi ndolo iwuya i ɗa shi? I rito ca le ne'e e ekere a gwamna ɗu yee ene! Ko u ta yuwan ma̱za̱nga̱ na̱ a̱ɗu, reve i tsura̱ isa'ani ekere a̱ yi? Ne ɗa A̱sulazuva o oɓolo a̱ a̱soja a zuva a dammai.>>✝

9 <<To, gogo nan ganu i rito zami urewesu wa̱ A̱sula̱ u roco tsu isa'ani. Na̱ cu'un kucci nda e ekere a̱ɗu a ɗa wa̱ usu u ɗu?>> Ne ɗa A̱sulazuva o oɓolo a̱ a̱soja a zuva a dammai. 10 <<Na̱ shi a damma nanza a̱tsuma̱ a̱ɗu a̱ shi ta̱ ɓa̱ru na̱ntsu va̱ A̱a̱'isa̱mapaɗa, adama she i daɓa akina a masa'a ma̱ va̱ pere wan! Ma uwwusa uyo'o u ɗu shi,>> ne ɗa A̱sulazuva o oɓolo a̱ a̱soja a zuva a dammai, <<Waru ma̱a̱ ushi kucci diga e ekere ɗu shi. 11 Adama a na diga a̱ ma̱ɓa̱tsa̱a̱ mo urana hali uriyu wa̱ yi, Ala a̱ va̱ a̱ ta̱ na̱ tsugbain a̱tsuma̱ a nɗa. Uba̱ta̱ suru a̱ tsu kula̱to ta̱ a̱tsuka̱ a̱ ma̱guru na̱ kucci sa'ani adama Ala a̱ va̱, adama a na Ala a̱ va̱ a̱ ta̱ na̱ tsugbain a̱tsuma̱ a nɗa,>> ne ɗa A̱sulazuva o oɓolo a̱ a̱soja a zuva a dammai. 12 <<Amma a̱vu i 'yuwan a tara Ala a̱ va̱ ili i ro, na i dammai masa'a ma̱ A̱sulazuva <Ili i ro i ɗa shi,> waru ilyalya i na a tsu zuwusa zuva va̱ yi <Ili ro i ɗa shi.> 13 Agba a̱ yi ɗa nda i dammai, <Tsu kuna̱ ta̱ na̱ a̱tsuma̱lima̱ a nda'a,> Waru i ta uwwusa mu a̱ vunu!>> Ne ɗa A̱sulazuva o oɓolo a̱ a̱soja a zuva a dammai. <<I ta̱wa̱a̱ ta̱ ni ili i na i usai nu ucira, ko ili i na i ri a̱kutsuma̱, ko ili i na i ri ubanakun, waru e le nda ele ɗa i ta̱wa̱yi kucci ɗu! Gogo a̱ɗu i ta majiyan ma na ma̱a̱ ushi ili i nda diga ekere a̱ɗu ɗa?>> Ne ɗa A̱sulazuva a dammai. 14 <<Una̱ u ta̱ reme za yipalishi na ri na̱ a̱a̱giri'i a sa'ani a̱tsuma̱ oɓolo e ikyon ya̱ yi, za na u yuwain nzuwulai n na waa ca A̱sulazuva, amma na ne suru reve u ca kucci va̱ a̱a̱giri'i a na ri gbaga shi! Ko na wo o'woi i reve ta̱ a na a̱mu mogono ma gbain ma ɗa,>> ne ɗa A̱sulazuva o oɓolo a̱ a̱soja a zuva a dammai, <<hali na nɗa suru a uwwusa wovon wa Ala a̱ va̱!>>