1 Uwwai nda, urana wa̱ A̱sulazuva u ta̱ ta̱wa̱, ana ee ne'eshen ili i na a̱ pura̱i ya̱'a̱ ɗu e memere ma̱ ɗu. 2 Adama a na n to ɓoloto nɗa suru a̱ ta̱wa̱ a yuwan uvon na̱ Urishelima. A ta usa lyuci'i, a̱vu a̱ pura̱ itana yu 'wa le, a̱vu fo o von na̱ a̱ma̱ci ne ele babu ucigu. Uɓatsulai u lyuci'i u ta̱ ka̱ra̱ a̱ 'ya̱wa̱ tsugbashi. Waru a ta lyawa akapi a ama a̱ lyuci'i. 3 Reve A̱sulazuva o uta̱ u yuwan uvon na̱ nɗa n ndolo'o cine u tsu yuwan o urana wu uvon.

4 O urana u ndolo ana a̱ yi e te isawan a Masasan ma̱ Zetun, asana a̱ Urishelima, reve e ne'eshen Masasan ma̱ Zetun ure diga asana a̱ tyo a̱livu, u yuwan uka̱ri u washin, hali na uɓatsulai u masasa'an waa wala a̱ tyo upasu wu ugana. Reve uɓatsulai we ire waru u wala a̱ tyo uyagi. 5 I ta suma i kuru nu uka̱ri u masasan ma̱ va̱, adama a na u ta rawa Azel. I ta suma cine i sumai ura̱mosu wi iɗa a mantsa ma Uziya mogono ma Yahuda. A̱vu A̱sulazuva A̱sula̱ a̱ va̱ a̱ ta̱wa̱ oɓolo na aza a akiza suru. 6 O urana u ndolo aa yuwan ekan shi ko uta̱nu shi ko ili i ro weshe weshe shi. 7 U to o'wo urana la̱nga̱, babu urana ko ayin, urana u na A̱sulazuva e revei na̱ a̱yi. Reve nu ulivu a yuwan ekan.

8 O urana u ndolo, mini ma na ma̱ tsu ca wuma ma̱ te yene o uta̱ diga Urishelima, akapi a̱ tyo a mala ma asana akapi waru a̱ tyo a mala ma̱ a̱livu, a mantsa ma̱ lyushi na̱ mantsa me irana suru.

9 A̱sulazuva o to o'wo mogono mo uvaɗi suru. O urana u ndolo A̱sulazuva a̱ ta̱ a ɗa a̱a̱ da̱na̱ lo, na aala a̱ ta̱.

10 Iɗa'a suru, diga Geba a̱ tyo Rimon uyagi wa̱ Urishelima u to o'wo agalaci. Agba a̱ ta̱ 'ya̱sa̱n Urishelima zuva uba̱ta̱ u na u ri diga o Una̱ntsu wa Banyami a̱ tyo upasu wu Una̱ntsu wu Ufaru, waru na̱ a̱ tyo o Una̱ntsu u ro na a̱ tsu ɗe Okonji, na̱ diga a Aatsura a Hanane a̱ tyo uba̱ta̱ u mokpoko u masayan mo mogono. 11 U to o'wo uba̱ta̱ wa asuvu nden, a̱a̱ da̱shi kototo yi shi. Urishelima to o'wo fa̱a̱n.

12 Apa nda mɓa̱la̱ n na A̱sulazuva a fabaa nɗa n na n yuwain uvon na̱ Urishelima suru, lipu le ta shama ele ubuwu mishin na ana e le. Esu e le waru a ta shama a̱tsuma̱ o okoko e le, elentsu e le waru a ta shama a̱tsuma̱ a̱ na̱ le. 13 Waru o urana u ndolo wovon wa̱ a̱bunda̱ diga uba̱ta̱ wa̱ A̱sulazuva u te reme ama. Vuma suru te reme ukere wu za va̱ yi a̱vu a lapulai. 14 Hali na̱ Yahuda fo ta yuwan nla̱ngi na̱ Urishelima. A ta usa utsuru wu nɗa n na n ri uka̱nda̱ruwu suru, oɓolo na̱ nan zinariya na̱ azurufa na̱ a̱tugu o uga'an a̱ a̱bunda̱. 15 Waru mɓa̱la̱ cu'un vu za nda te reme ido na̱ nloli na arakumi na̱ nloli mi ido, na̱ cu'un vi iliyamunga i na suru i ri a̱ va̱la̱ta̱ ndolo.

16 Reve akapi a na a pasai a nɗa n na n yuwain uvon na̱ Urishelima suru, a gawan aa'wan suru a̱ tyo Urishelima adama a yuwaan Mogono A̱sulazuva o oɓolo a̱ a̱soja a zuva a̱ga̱nda̱, waru a yuwan A̱buki o Ogodo o Ucuwusan. 17 Agba na̱ vuma ro a̱tsuma̱ a ama o uvaɗi gawan a̱ tyo Urishelima u yuwaan Mogono A̱sulazuva o oɓolo a̱ a̱soja a zuva a̱ga̱nda̱ shi, oo ro'oo le shi. 18 Agba na aza a Masar a gawan a̱ tyo Urishelima adama a̱ A̱buki o Ogodo'o shi, oo ro'oo le shi. Mɓa̱la̱ n na A̱sulazuva a zuwayi nɗa n na n gawain a̱ tyo Urishelima a yuwan A̱buki o Ogodo'o shi, n te reme le. 19 A̱yi ɗa wo o'wo oforo aza a Masar, no oforo a nɗa n na suru n gawain adama a yuwan A̱buki o Ogodo o Ucuwusan shi.

20 O urana u ndolo a ta ɗana, <<Akiza uba̱ta̱ wa̱ a̱ A̱sulazuva,>> a̱ lingi* vi ido. Mpondo mu u'wa wa̱ A̱sulazuva o to o'wo tsu Mpondo ma Akiza n na n ri elime masa'a. 21 Upondo suru a̱tsuma̱ a̱ Urishelima na̱ Yahuda o to o'wo na akiza uba̱ta̱ wa̱ A̱sulazuva o oɓolo a̱ a̱soja a zuva, za na suru ta̱wa̱i adama u ca kuci u ta gura tara mpondo'o u su'wan le pe. Waru o urana u ndolo za va awina na atsulu aa buwa pe o u'wa wa̱ A̱sulazuva o oɓolo a̱ a̱soja a zuva shi.