1 Reve A̱sulazuva o roco mu Josuwa ganu gbain mishin a̱ ma̱ka̱ka̱n ma malingata ma̱ A̱sulazuva, na̱ Mekerenkesu* mishin a̱ mɓa̱nga̱ mu ukere u sa'ani wa̱ yi adama u 'ya̱wa̱ na adanshi a aci a̱ Josuwa.✝ 2 Reve A̱sulazuva a damma Mekerenkesu'u, <<Lyawa A̱sulazuva a ɓara wu, Mekerenkesu! A̱sulazuva za na ɗangwai Urishelima ɓara wu! Vuma nda'a u ta̱ tsa aɗanga a na a usai diga a̱tsuma̱ a akina.>> 3 Josuwa da̱na̱ ta̱ wotowu na̱ a̱tugu e idaba mishin a̱ ma̱ka̱ka̱n ma malingata'a. 4 Reve malingata'a ma damma aza a na a̱ ri mishin a̱ ma̱ka̱ka̱n ma̱ yi, <<Foɗo niyi a̱tugu e idaba'a.>> Reve u damma Josuwa, <<Ka̱lyuwa̱ nda, n tawa ta̱ unusu wa̱ wu, agba n to oto wu itana i cece.>> 5 Reve n damma, <<Lyawa o oto yi ookokolo e cece a aaci a̱ yi.>> Ɗaɗa o oto niyi ookokolo e cece a aaci'i, a̱vu fo o oto yi itana'a, malingata ma̱ A̱sulazuva'a gba lo mishin zuzu. 6 Reve malingata'a ma yuwaan Josuwa tsuɓari u damma, 7 <<Apa nda ili i na A̱sulazuva o oɓolo a̱ a̱soja a zuva a dammai, <Na̱ vaa yuwan mmalu o ure u va̱ a̱vu vu guza̱ tsuɓari tsa̱ va̱, ɗaɗa vaa yuwan tsugbain tsu u'wa u va̱, reve waru vu ka̱lyuwa̱ ukowo u va̱, waru n ta ca wu uba̱ta̱ a̱tsuma̱ a ama a nda a na a̱ ri mishin pa. 8 Uwwa nda, a̱vu Josuwa ganu gbain, a̱vu na̱ n'utsa̱ ma̱ wu n na n ri nden a̱ ma̱ka̱ka̱n ma̱ wu, adama a na ele iroci i ɗa yi ili i na ya̱a̱ ta̱wa̱, n ta̱ ka̱mbuwa̱ aagbashi a̱ va̱, ete'en. 9 A̱yi ɗa nda n zuwai aatali a nda a̱ ma̱ka̱ka̱n ma̱ Josuwa, aatali a na a̱ ri na̱ pasu cindere, n ta yuwan iɗana zuva va̱ yi, waru n ta tawa unusu wa ama nda urana u ta̱,> >> ne ɗa A̱sulazuva o oɓolo a̱ a̱soja a zuva a dammai. 10 <<O urana u ndolo, koyan a̱tsuma̱ a̱ ɗu u ta banu moron ma̱ nden ma̱ yi u ta̱wa̱ u da̱nu za̱la̱ va ataci a ina̱bi va̱ yi nu uɗanga wu ubiri wa̱ yi.>> Ne ɗa A̱sulazuva a dammai.