1 A aa'wan a̱ na̱shi o Mogono Dariyu, adanshi a̱ A̱sulazuva a̱ ta̱wa̱ ta̱ ya Zakariya o urana wa̱ na̱shi u woto wa̱ kucci, za na a̱yi ɗa Kislev. 2 Cina Betel Shareza lyungu ɗe Regemele oɓolo na ama e le, a zami isa'ani ya̱ A̱sulazuva, 3 e ece nan ganu vu u'wa wa̱ A̱sulazuva o oɓolo a̱ a̱soja a zuva na ama̱sula̱, <<N shon a̱vu n yuwan akuli o woto wa tawun, cine n yuwain a'wan na̱ a̱bunda̱?>> 4 Reve adanshi a̱ A̱sulazuva o oɓolo a̱ a̱soja a zuva a̱ ta̱wa̱ ya̱'a̱ va̱ ana, 5 <<Ece a ama e iɗa'a suru na̱ nan ganu, <A mantsa ma na i yuwain akuli na̱ a̱tsumola̱ngu o woto wa tawun na̱ woto we cindere a̱tsuma̱ a a'wan kupocindere'e, na amayun a ɗa adama a̱ va̱ a ɗa i yuwain akuli'i? 6 Waru a na i da̱na̱i a alya ni i sowi, adama a aciya̱ɗu a ɗa i lyuwusai ni i sowi shi? 7 Ele nda ele ɗa adanshi a na A̱sulazuva a dammai o una̱ wa ama̱sula̱ o ufaru, a mantsa ma na Urishelima ni ilyuci i na i ri uka̱nda̱ruwu na̱ a̱yi a̱ tsura̱i ulyuwu we elime, oɓolo na̱ Nege nu upasu wa̱ a̱livu wi iɗa i mugaɗi i na i ri na ama shi?> >>

8 Reve adanshi a̱ A̱sulazuva a̱ da̱shi ta̱wa̱ ya Zakariya adansa, 9 <<Apa ili i na A̱sulazuva o oɓolo a̱ a̱soja a zuva a dammai, <I yuwan uge'etosu wa amayun, i rocoloi isa'ani ni iliyali. 10 She i ɓongi ma̱runa̱ ko makpa'an wan na̱ mocin na̱ za vu ulambu wan. She i yuwunlai majiyan me iwuya o okolo a̱ ɗu wan.>

11 <<Agba a̱vu a 'yuwan o polo atsuvu, a̱vu a vadala ucina̱ u le na aciyogbamu, a̱vu a ula atsuvu e le adama a uwwa wan. 12 Reve a gbawato asuvu e le tsa a̱ta̱mba̱ adama a uwwa wila̱ ko adanshi a na A̱sulazuva o oɓolo a̱ a̱soja a zuva a̱ lyunguyi e ekere a̱ Ruhu va̱ yi wan o una̱ wa ama̱sula̱ o ufaru. Adama o ndolo a ɗa A̱sulazuva o oɓolo a̱ a̱soja a zuva a yuwain upan ne ele lon. 13 <Ana n ɗeyi, a uwwa shi, ne ɗa fo ne e ɗe maa uwwa shi,> >> ne ɗa A̱sulazuva o oɓolo a̱ a̱soja a zuva a dammai. 14 <<M bete'we le ta̱ a̱tsuma̱ a nɗa na̱ lipa̱, uba̱ta̱ u na e revei shi. Ne ɗa iɗa i na a lyawai wo o'woi ofoli, hali na ko za aa gura gara pe shi. Ne ɗa o o'wotoi iɗa i sa'ani ofoli.>>