1 Kpa̱tu'wa̱ na̱ntsu va̱ wu, a̱vu Lebanon,

adama akina a tama ɗanga sida va̱ wu!

2 Shon a̱vu uɗanga u fir,

adama a na sida riya̱ ta̱,

o kototo ta̱ ɗanga vu ucira na ri ulobonu!

Shoyin a̱ɗu ɗanga Oku va Bashan,

adama a na o koɗo ta̱ a̱a̱rumbu e irumbu!

3 Uwwai mesun ma aza a aguɓa,

adama a na o kototo ta̱ uba̱ta̱ wa alyuna

o ulobonu u le!

Uwwai mesun me ikamu,

adama a na o kototo ta̱

a̱a̱rumbu a̱ Urudu!

4 Apa nda ili i na A̱sulazuva A̱sula̱ a̱ va̱ a dammai, <<Vu yuwan aguɓa o oɓolo e ikyon i na a tawai adama a paɗa. 5 Aza a na aa tsulusa le a ta paɗasa le reve gba a̱ ka̱ra̱ fa̱a̱n. Aza a na aa winasa le a ta dansa, <A̱sulazuva za va aba'un a ɗa, adama a na mo o'wo ta̱ za vu utsuru.> Aza a aguɓa e le ee inda iliyali i le shi.>> 6 Reve A̱sulazuva a damma, <<M buwa ee ene iliyali ya ama e iɗa'a shi, n ta ca za suru e ekere o moron ma̱ nden ma̱ yi na̱ mogono ma̱ yi. O to ɓongi iɗa'a, waru maa wawa le e ekere e le shi.>> 7 Ɗaɗa mo o'woi za va aguɓa vo oɓolo e ikyon i na aza a atsulu na awina a tawai adama a mapaɗa. Reve n tara aɗanga e re, a̱vu n ɗe za ta̱, <<Isa'ani>> za va ire, <<Uɓolu wa Aci.>> Reve n guɓa ikyo'on. 8 A̱tsuma̱ o woto uta̱, n tawa ta̱ aza a aguɓa a ta'atsu'u, adama a na n kuna̱ ta̱ ne ele, ele fo a 'yuwan mu ta̱. 9 Ɗaɗa n dammai, <<Moo o'wo za va aguɓa ɗu shi. Za na a̱a̱ kuwa̱, u kuwa̱. Ili i na oo kototo, lyawa o kototo yi. Lyawa aza a na a la'ai a tamalai inama i lipu le.>>

10 Reve n tara aaɗanga a̱ va̱ a na a̱ tsu ɗe Isa'ani, a̱vu n kuɗa yi, a kuɗusa akucunu a na n yuwain na̱ gundo va aza a Isra'ila suru. 11 A̱vu gba a kuɗa akucunu'u o urana u ndolo, ɗaɗa aza a atsulu na awina a na a̱ shi a̱ a̱ka̱nla̱ a̱ va̱, e revei a na adanshi a̱ A̱sulazuva a ɗa. 12 Reve n damma le, <<Nna̱ ye ene u lobono ɗu ta̱, ca numu atsupu a̱ va̱. Agba na ne ɗa shi, i guza̱ ili i ɗu.>> Ɗaɗa a tsupa numu ukunzuwu u Azurufa mata'atsu.

13 Reve A̱sulazuva a damma mu, <<Vari le o uzuwata.>> Atsulu a na wu ntsayi a tsula mu. Ɗaɗa n tarai ikebe i azurufa mata'atsu'u a̱vu n vari le a̱tsuma̱ o u'wa wa̱ A̱sulazuva uba̱ta̱ wu uzuwata'a. 14 Reve n kuɗa, <<Uɓolu wa Aci>> aaɗanga e ire a̱ va̱, za na rocoi wukasu u muwwulai ma Yahuda na̱ Isra'ila. 15 Reve A̱sulazuva a damma mu, <<Tarisa itana yu ulo yi za va aguɓa. 16 Adama a na, n ta̱ 'ya̱sa̱n za va aguɓa e iɗa'a za na damai na a ɗa a aza a na o kototoi shi, ko u zami muwun nna mu uwwai usa̱n u ka̱mba̱to le gbaga shi. Ko gba u lyuwato aza a na a̱ shi gbaga shi, amma u to soɗu inama ya aza a na a̱ ri mgbain, a sazasa okotsu e le.>>

17 <<A̱tsuma̱lima̱ a ta cina za va aguɓa vama va̱,

za na tsu lyawa oɓolo e ikyon!

Lyawa matsun me pe'eni ma gasa

ukere wa̱ yi na̱ lyusu vu ukere u sa'ani wa̱ yi!

Lyawa ukere wa̱ yi u sowo suru suru,

lyusu vu ukere u sa'ani va̱ yi rumba̱na̱ suru suru!>>