1 Reve malingata ma na ma yuwain adanshi na̱ a̱mu ma̱ ta̱wisa̱ reve u jisan mu, cine a tsu jisan vuma a̱tsuma̱ a nlavu ma̱ yi. 2 Reve we ece mu, <<Nye vee inda?>> Reve n usu, <<N te inda wisawatan u fitila u zinariya, na̱ mataɗa ma mani'in a aaci a̱ yi, ni ifitila i cindere ɗe, ni ilogoni i cindere ɗe. 3 Waru na̱ ɗanga zetun re e eɓele a̱ yi, za ta̱ e eɓele o usa'ani u mataɗa'a za ta̱ waru e eɓele o ugula̱ wa̱ yi.>> 4 Reve n damma malingata ma na ma yuwain adanshi na̱ a̱mu'u, <<Nye i ɗa nda'a, zagbain va̱?>> 5 Reve u usu mu, <<Vu reve ili i nda'a shi?>> A̱vu n usu, <<O'o, zagbain va̱,>> 6 Ɗaɗa u damma numu, <<A̱yi nda adanshi a̱ A̱sulazuva a ɗa a̱ tyo ya Zerubabe, <Nu ucira u ɗa shi ko nu ukadu shi, amma na̱ Ruhu va̱,> >> A̱sulazuva o oɓolo a̱ a̱soja a zuva a ɗa a dammai ne. 7 <<Zane ɗa vu ri a̱vu masasan ma gbain? A̱ ma̱ka̱ka̱n ma Zerubabe vu to o'wo iɗa kpasa kpasa. Reve wu uta̱a̱ atali a sa'ani diga o mogogolo, reve ama e teme yisali adansa, <Ulobono ta̱, ulobono ta̱!> >> 8 Reve adanshi a̱ A̱sulazuva a̱ ta̱wa̱ ya̱'a̱ va̱ a dansa, 9 <<Ekere a Zerubabe a ɗa a varai ikyun ya̱ A̱a̱'isa̱ a nda, ekere a̱ yi a ɗa waru oo gono yi.>> Ɗaɗa yee reve a na A̱sulazuva o oɓolo a̱ a̱soja a zuva a̱ lyungu mu ta̱ ya̱'a̱ ɗu.

10 <<Adama a na za na suru tarai urana wi ili i keke'en ili i ro shi, o to zo'oso a mantsa ma na e enei amunga o ritosu wu usaa o ukere wa Zerubabe. <Ifitila i cindere a nda iroci ya̱ esu a̱ A̱sulazuva a ɗa, aza a na a̱ ri agara a̱tsuma̱ o uvaɗi suru.> >> 11 Reve me ece malingata ma̱ A̱sula̱'a̱, <<Nye i ɗa ɗanga zetun re nda'a na ri o ukere u sa'ani nu ugula̱ u wisawatan u fitila'a?>> 12 A̱vu waru me ece yi, <<Nye i ɗa eten e re a ɗanga zetu'un, a na a̱ ri zuzu na abulu a zinariya e re a na o utosu mani'in ma zinariya'a?>> 13 A̱vu u usu mu, <<Vu reve ili i nda'a shi?>> A̱vu n usu, <<O'o, zagbain va̱.>> 14 Ɗaɗa u dammai, <<Ele ɗa ama e re a na a tawai a na ee isawusan uba̱ta̱ wu zagbain vu uvaɗi suru.>>