1 Reve adanshi a̱ A̱sulazuva o oɓolo a̱ a̱soja a zuva a̱ ta̱wisa̱ ya̱'a̱ va̱ a dansa,

2 <<Apa nda ili i na A̱sulazuva o oɓolo a̱ a̱soja a zuva a dammai,

<N ta̱ na̱ tsushu'un tsa Sihiyona lon,

n ta̱ a̱ ma̱puna̱ na̱ tsushu'un adama a̱ yi.> >>

3 <<Apa ili i na A̱sulazuva a dammai,

<N ta̱ ka̱mba̱ Sihiyona a̱vu n da̱nu Urishelima.

Reve e ɗe Urishelima Lyuci Gbain va Amayun,

masasan ma̱ A̱sulazuva o oɓolo a̱ a̱soja a zuva

waru Masasan ma Akiza.>

4 Apa ili i na A̱sulazuva o oɓolo a̱ a̱soja a zuva a dammai,

<Mbara na̱ mukuci n ta̱ da̱nuwisa̱ e re va̱ Urishelima,

za suru na aaɗanga o ukere wa̱ yi

adama a tsukutsa lon.

5 Waru re lyuci gbai'in a ta shiwan

no olobo ne esheli

a yuwusan uro e re'e.>

6 Apa ili i na A̱sulazuva o oɓolo a̱ a̱soja a zuva a dammai,

<Ko na̱ shi wo o'wo she damma ili i na yaa yuwan shi

e yeni ya akapi a na a pasai a mantsa mo ndolo,

o to o'wo fo she damma ili i na yaa yuwan shi e yeni i va̱?> >>

Ne ɗa A̱sulazuva o oɓolo a̱ a̱soja a zuva a dammai.

7 Apa ili i na A̱sulazuva o oɓolo a̱ a̱soja a zuva a dammai,

<<Ka̱lyuwai, n ta wawa ama a̱ va̱

diga e iɗa ya asana ni iɗa ya̱ a̱livu.

8 Waru n ta̱ ka̱mba̱to le

adama a̱ da̱nu a̱tsuma̱ a̱ Urishelima.

Reve o o'wo ama a̱ va̱,

a̱vu mo o'wo A̱sula̱ e le,

a̱tsuma̱ a amayun na̱ a̱ɓula̱.>>

9 Apa ili i na A̱sulazuva o oɓolo a̱ a̱soja a zuva a dammai, <<Lyawa ekere a̱ ɗu a gbama, a̱ɗu na a rana nda yaa uwwusa a yuwusan adanshi a nda diga o una̱ wa ama̱sula̱ a na a̱ shi lo o urana u na a varai ikyun yu usaa wu u'wa wa̱ A̱sulazuva o oɓolo a̱ a̱soja a zuva, adama a suwa a̱a̱'isa̱'a̱.>> 10 Adama a na kafu mantsa mo ndolo a̱ shi a tsu tsupa vuma ko iliyamunga shi. Ko za shi tsu gura 'ya̱wa̱ ulinga wa̱ yi babu wovon wu n'yuwatan shi, adama a na n shi ta̱ n zuwa za suru n'yuwunlai na̱ za va̱ yi. 11 Agba gogo maa yuwan na akapi a ama a nda cine n yuwain ɗe a̱ca̱pa̱ shi, ne ɗa A̱sulazuva o oɓolo a̱ a̱soja a zuva a dammai. 12 <<Adama a na a ta yuwan ca̱'a̱n na asuvu nden. Ataci a ina̱bi a ta ca umatsun wa̱ yi. Iɗa i ta ca limatan va̱ yi, zuva waru ta ca a'iza a̱ yi. N ta ca akapi a ama a na a pasai ili i nda woo o'wo za le. 13 A̱ɗu u'wa wa Yahuda na̱ Isra'ila, cine i shi yo o'woi iroci yu una̱ a̱tsuma̱ a nɗa, ne ɗa maa wawa ɗu, waru i to o'wo aba'un. She yu uwwa wovon wan, amma lyawa ekere a̱ ɗu a gbama.>> 14 Adama a na apa ili i na A̱sulazuva o oɓolo a̱ a̱soja a zuva a dammai, <<Cine n foɓoi n ta̱wa̱a̱ ɗu na̱ a̱tsuma̱lima̱ a mantsa ma na nkaya n ɗu n zuwa numu n yuwain upan, agba m bula̱ shi.>> Ne ɗa A̱sulazuva o oɓolo a̱ a̱soja a zuva a dammai. 15 <<Adama o ndolo n foɓo ta̱ n yuwaan Urishelima isa'ani a yashi i nda nu u'wa wa Yahuda, she yu uwwa wovon wan. 16 Apa nda ili i na yaa yuwan, koyan ɗa damma za va̱ yi amayun, a̱vu i yuwan uge'etosu wa amayun na̱ za va̱ a̱ɓula̱ o ukobu wu uge'etosu ɗu. 17 She i foɓoo nron ma̱ nden ɗu iwuya wan, waru she i ciga akucunu e epen wan,>> Ne ɗa A̱sulazuva o oɓolo a̱ a̱soja a zuva a dammai. 18 Reve adanshi a̱ A̱sulazuva o oɓolo a̱ a̱soja a zuva a̱ ta̱wisa̱ ya̱'a̱ va̱, a dansa, 19 <<Apa ili i na A̱sulazuva o oɓolo a̱ a̱soja a zuva a dammai, <Akuli o woto wa̱ na̱shi na̱ wo woto wa tawun, na̱ wo woto we cindere na̱ wo woto wa kupa, o to o'wo mantsa ma̱ ma̱za̱nga̱ na̱ mere nu uyo'o e ekere o u'wa wa Yahuda, a mantsa ma̱ a̱buki a na a zuwai. Adama o ndolo, i ciga amayun na asuvu nden.> >>

20 Apa ili i na A̱sulazuva o oɓolo a̱ a̱soja a zuva a dammai, <<Ama a̱ a̱bunda̱ na aza a na a̱ ri nden e ilyuci i gbagbain na̱ a̱bunda̱ a buwa ta̱ a̱ ta̱wa̱. 21 A̱za̱ a̱ lyuci ta̱, a̱ ta̱ 'ya̱wa̱ a̱ lyuci ro, a̱vu a damma, <Ta̱wa̱i tsu walai gogo, tsu zamiyi isa'ani ya̱ A̱sulazuva, a̱vu tsu zamiyi A̱sulazuva o oɓolo a̱ a̱soja a zuva. 22 Ama a̱ a̱bunda̱ na̱ nɗa mu ucira a̱ ta̱ ta̱wa̱ Urishelima a zami isa'ani ya̱ A̱sulazuva o oɓolo a̱ a̱soja a zuva.> >> 23 <<Apa ili i na A̱sulazuva o oɓolo a̱ a̱soja a zuva a dammai, a̱tsuma̱ a yashi i ndolo ali kupa diga a nɗa me elentsu suru, e te reme utugu u vuma va Yahuda a̱vu a damma, <Lyawa tsu kuru wu, adama a na tsu uwwa ta̱ a na A̱sula̱ a̱ ri oɓolo na̱ a̱vu.> >>