1 Apa ikaka ya̱ A̱sulazuva a aci e iɗa ya Hadra,

waru u ta̱ cipa̱ a aci a Dimaska.

Adama a na esu a̱ A̱sulazuva a̱ ta̱ uba̱ta̱ u vuma,

oɓolo na̱ gundo va aza a Isra'ila suru.

2 Esu a̱ yi fo a ta a aci a Hamat,

za na ri na̱ a̱tyo na̱ Dimaska.

Oɓolo na̱ Taya na̱ Sidon,

ko na wo o'woi a̱ tu nu ugbozu lon.

3 Taya suwaa ta̱ aciya̱yi uba̱ta̱ wu ucira,

a̱vu u gangato azurufa tsa̱ ma̱buta̱ ma̱ ma̱bula̱,

na̱ zinariya tsa yiyaɓan yu ure u gbain.

4 Ka̱lyuwa̱, A̱sulazuva a ta usa yi ili i na u ri na̱ a̱yi,

reve u kototo ucira wa̱ yi a̱tsuma̱ a mala,

waru akina a ɗa aa lyuwa yi.

5 Ashikelon te ene yi reve wu uwwa wovon.

Gaza fo te je'en lipu a̱tsuma̱ o wovon,

oɓolo na̱ Ekuron fo,

adama a na ili i na wa zuwusaa okolo u to ɓoso.

Gaza ta lamba mogono ma̱ yi,

Ashikelon waru to o'wo ofoli.

6 Ugundo wa̱ a̱girutu a ɗa a̱a̱ da̱nu pe Ashido,

agba n to koɗo uvaɗu wa Filistiya.

7 N ta tawa mpasa o una̱ wa̱ yi,

oɓolo ni ili idaba ya̱ yi, e memere ma anga a̱ yi.

Akapi a̱ yi a na a pasai fo, o to o'wo a̱za̱ a̱ A̱sula̱ a̱ tsu.

O to o'wo tso umatsun a̱tsuma̱ a Yahuda,

reve Ekuron o'wo tsa aza a Jebusiya.

8 Amma n ta̱ piri u'wa u va̱

e ekere a aza a na a̱a̱ 'ya̱wusa̱ na̱ a̱ ka̱mbi.

Ko za vi iɓongi a̱a̱ da̱shi kuru na̱ pe shi,

adama a na gogo n ta̱ ka̱lyuwusa̱ uba̱ta̱'a̱ ne esu a̱ va̱.

9 Yuwan ma̱za̱nga̱ lon, a̱vu Usheli Sihiyona!

Oruwo, a̱vu Usheli Urishelima!

Ka̱lyuwa̱, mogono ma̱ ɗu moo ta̱ lo a̱ ta̱wa̱ ya̱'a̱ ɗu.

Za va̱ a̱ɓula̱ ɗa, waru za vu ulyuwu wa aci.

U tara aciya̱yi ili i ro shi ukumbu o mololi,

zuva molloli ɗa u ri ukumbu.✝

10 N ta tawa ikeke yi ido diga ya Ifiramu

ni ido yu uvon diga Urishelima,

utan wu uvon waru u ta kuɗa.

U ta yuwaan nɗa adanshi a̱ nden ma asuvu.

Tsugono tsa̱ yi tsa̱ te reme diga a mala a̱ tyo a mala,

na̱ diga o Uɗolu a̱ tyo o ukosu wu uvaɗi.

11 Amma a̱vu gba, adama a mpasa ma akucunu a̱ va̱ na̱ a̱vu,

n ta lyawa a̱za̱ a̱ wu a na a̱ ri o u'wa wa ali,

diga a̱ wa̱cin u na u ri na̱ mini shi.

12 Ka̱mba̱i o upa'atan wu ucira u ɗu,

a̱ɗu agbashi a na a zuwusa okolo.

Adama a na gogo n ta tsupa ɗu toto ure.

13 N ta̱ ka̱nza̱ Yahuda tsu utan u va̱,

a̱vu n shiton yi na̱ Ifiramu.

N ta̱ 'ya̱sa̱n olobo a̱ wu a̱vu Sihiyona, a aci olobo a Javan,

a̱vu n vuta̱la̱ wu tsa matsun me pe'eni ma za na gurai uvon.

14 Reve A̱sulazuva a̱a̱ ta̱wa̱ ya̱'a̱ le,

a̱vu aya a̱ yi o uta̱ tsi imaɗatsu.

A̱sulazuva zagbain ta̱ e ivula̱ aavana,

a̱vu u wala o uta̱ a̱tsuma̱ a̱ lipa̱ vu uyagi,

15 A̱sulazuva o oɓolo a̱ a̱soja a zuva a ta yuwaan le a̱a̱ra̱ga̱.

A̱ to una n'yuwatan na atali a̱ a̱bitsutsu, reve a dasa le.

A̱vu o sowo o oruwo

she damma a̱ tu usowu na̱ ma̱ra̱.

A ta shunwa tsa aasa'atsu a na a̱ tsu kyo'onu

mpasa eɓele a masa'a.

16 O urana u ndolo A̱sulazuva A̱sula̱ e le a ta wawa le,

tso oɓolo e ikyon a ama a̱ yi.

Adama a na a̱ te ikana e iɗa ya̱ yi,

tsa atali e ikebe okokolo o tsugono.

17 Cine maluwa nu ulobonu u le wa̱ da̱na̱!

Olobo a ta yuwan a̱bunda̱ tse ishina,

esheli waru tsa masayan ma sa'avu.