1 <<O urana u ndolo, a̱ ta̱ kpa̱tu'wa̱a̱ u'wa wa̱ Da̱wuda lyusu mini na aza a na a̱ ri na̱ nden Urishelima, adama a̱ za̱'wa̱ unusu ni idaba. 2 O urana u ndolo, n ta tasa ala a̱ a̱ma̱li diga e iɗa'a, hali na a̱a̱ da̱shi cuwan ne ele waru shi, waru n ta tawa ama̱sula̱ oɓolo na̱ ruhu vi idaba diga e iɗa'a.>> Ne ɗa A̱sulazuva o oɓolo a̱ a̱soja a zuva a dammai. 3 <<Agba na̱ za ro buwa a yuwusan adanshi e ili i na yaa fara, dada va̱ yi na̱ mma va̱ yi aza a na a matsan niyi, a ta damma yi, <Na̱ vu ciga vu 'yuwan vu kuwa̱, adama a na vu yuwan ta̱ epen na ala a̱ A̱sulazuva.> >> Reve dada va̱ yi na̱ mma va̱ yi a sapa yi mantsa ma na waa yuwusan adanshi e ili i na yaa fara'a. 4 O urana u ndolo vumava̱sula̱ suru ta uwwa wono wa alavu alavu a̱ yi a adanshi e ili i na yaa fara. Woo oto utugu we eleme wa vumava̱sula̱ adama wu luma̱ ama shi. 5 <<Amma u ta damma, <A̱mu vumava̱sula̱ ɗa shi, a̱mu cimbi ɗa, iɗa i ɗa ure wi ilyalya i va̱ diga a̱mu a mawun.> >> 6 <<Reve na̱ za ro ece yi, <Nye i ta̱wa̱i na antsu a nda a̱ lipu va̱ wu?> U ta̱ usu, <Antsu a na n tsura̱i a 'wa vu n'utsa̱ n va̱ n ɗa.> >>

7 <<Jiwan, matsun me pe'eni,

vu riya̱a̱ za va aguɓa a̱ va̱,

vuma na ri zuzu na̱ a̱mu,

ga̱la̱ za va Aguɓa, a̱vu ikyon i bete'we,

n ta vadala ukere u va̱ n ga̱la̱ a̱za̱ e keke'en.>>

Ne ɗa A̱sulazuva o oɓolo a̱ a̱soja a zuva a dammai,

8 <<A̱tsuma̱ e iɗa'a ma̱ɓula̱,

a̱ ta̱ ga̱la̱ uɓatsulai ure a̱tsuma̱ o uɓatsulai uta'atsu a̱vu a̱ kuwa̱,

a̱vu a lyawa uɓatsulai u ta̱ wuma.>> Ne ɗa A̱sulazuva a dammai.

9 <<A̱vu n vari za ta'atsu nda a̱tsuma̱ a akina.

N ta lapula le cine a tsu lapula azurufa,

reve n rito le cine a tsu rito zinariya.

E te ɗe ala a̱ va̱,

a̱vu gba n usu le.

N ta damma, <Ele ama a̱ va a ɗa,>

a̱vu ele a damma, <A̱sulazuva A̱sula̱ a̱ tsu a ɗa.> >>