1 Apa nda ikaka ya̱ A̱sulazuva a aci a Isra'ila. A̱sulazuva a na a yuwain zuva waru shuwa̱i uvaɗi a̱vu fo u yuwaan vuma ruhu a̱tsuma̱ a̱ yi damma ta̱, 2 <<Uwwai, n ta zama mo o'woto Urishelima mokkoto mo utakalyuwu e ekere ama a na a̱ ri uka̱nda̱ruwu na̱ yi. A mantsa ma na a̱ ka̱nda̱ruwa̱i Urishelima a̱ ta̱ fo a̱ ka̱nda̱ruwa̱ Yahuda. 3 O urana u ndolo, a mantsa ma na nɗa m ɓoloi aci a̱ riya̱a̱ yi, n to o'woto Urishelima aatali o ume e ekere a nɗa suru. Aza na biti a cigai a tanu yi suru a ta amaton aciyele.>> 4 <<O urana u ndolo n ta faba do suru na̱ wovon, kumbi va̱ yi waru nu ujaru, agba n ta zuwa esu a̱ va̱ o u'wa wa Yahuda, reve n rumba̱na̱to ido yi iɗa'a suru.>> Ne ɗa A̱sulazuva a dammai. 5 <<Ɗaɗa azagbain a Yahuda aa damma o okolo e le, <Ama a̱ Urishelima a̱ ta̱ nu ucira, adama a na A̱sulazuva o oɓolo a̱ a̱soja a zuva a ɗa A̱sula̱ e le.> >> 6 O urana u ndolo n to o'woto azagbain a Yahuda tso upondo wa akina e memere ma akina, tsa aakata a akina e memere ma akatalu. O to soɗu ama a na a̱ ri uka̱nda̱ruwu a̱ tyo usa'ani nu ugula̱. Agba Urishelima ta̱ da̱na̱ na ama uba̱ta̱ u na u ri. 7 A̱sulazuva a ta wawa nda̱na̱ta̱ ma Yahuda ne'e, adama tsugbain tsu u'wa wa̱ Da̱wuda na̱ za va aza a na a̱ ri nden Urishelima u la'a za va Yahuda wan.

8 <<O urana u ndolo n te geshe aza a na a̱ ri na̱ nden Urishelima, adama za na ka̱la̱ma̱i ucira suru suru a̱tsuma̱ e le o urana u ndolo wo o'wo nu ucira tsa̱ Da̱wuda. U'wa wa̱ Da̱wuda waru u to o'wo tsa̱ A̱sula̱, tsa a malingata ma̱ A̱sulazuva elime e le. 9 O urana u ndolo n to uta̱ adama n kototo nɗa n na n ta̱wa̱i a yuwan uvon na̱ Urishelima.

10 <<Reve n tsuwa̱a̱n u'wa wa̱ Da̱wuda na aza a na a̱ ri nden Urishelima ruhu mene me iliyali na̱ za mayan ma avasa. A̱ ta̱ ka̱lyuwa̱ mu, za na a sapai, reve a yuwaan yi mesun ma̱ a̱tsumola̱ngu, cine za tsu yuwan mesun ma̱ a̱tsumola̱ngu a mawun ma̱ ta̱ ma̱ yi goon. Reve a yuwan mesun lon adama a̱ yi, cine vuma tsu yuwan mesun lon adama a mawun mo ufaru ma̱ yi mo ulobo. 11 O urana u ndolo mesun ma̱ a̱tsumola̱ngu ma̱ a̱tsuma̱ a̱ Urishelima u ta yuwan tsa̱ mesun ma na a yuwain adama a Hadad Rimon* a agalaci a Megido. 12 Iɗa'a i ta yuwan mesun ma̱ a̱tsumola̱ngu, u'wa suru o una̱ wa aciya̱yi. U'wa wa̱ Da̱wuda o una̱ wa aciya̱yi, a̱ma̱ci e le waru o una̱ wa aciyele. Umatsun wu u'wa wa Natan o una̱ wa aciya̱yi, na̱ a̱ma̱ci e le waru o una̱ wa aciyele. 13 Umatsun wu u'wa wa̱ Levi u ta̱ shon o una̱ wa aciya̱yi, na̱ a̱ma̱ci e le waru o una̱ wa aciyele. Umatsun wu u'wa aza a Shimeyi u ta̱ shon o una̱ wa aciya̱yi, na̱ a̱ma̱ci e le waru o una̱ wa aciyele. 14 Akapi o umatsun wu 'wa na buwai suru, za suru o una̱ wa aciya̱yi, na̱ a̱ma̱ci e le waru o una̱ wa aciyele.>>