1 Reve n ka̱lyuwisa̱ zuva reve me ene ikeke yi ido i na̱shi o uta̱ e memere ma nsasan n re, nsasa'an gba nsasan mu rumushili n ɗa! 2 Keke vu do vu ufaru, ido i shili i ɗa i da̱na̱i o ronoso yi, za ve ire a̱za̱ a̱ lima̱, 3 za va ta'atsu ido i uri, za va̱ na̱shi gba ido i pusa̱ pusa̱ suru nle a̱za̱ o ucira. 4 Reve me ece malingata ma na ma̱ shi a yuwusan adanshi na̱ a̱mu'u, <<Nye i ɗa nda'a, zagbain va̱?>> 5 Reve u usu mu u damma, <<Ele nda nan ruhu a̱ na̱shi a ɗa, aza a na o uta̱i diga zuva cina o roco aciyele a̱ ma̱ka̱ka̱n ma zagbain vu uvaɗi ma̱ɓula̱. 6 Keke vi ido na ri ni ido i lima̱ a̱ ta̱ tyo upasu wi iɗa yu ugana, za na ri ni ido i uri a̱ tyo upasu wa̱ a̱livu, za na gba ri ni ido i pusa̱ pusa̱ a̱ tyo upasu wu uyagi.>> 7 Ana ido yu ucira'a o uta̱i, a̱ shi ta̱ a maluwa ma na e reme agara a̱tsuma̱ o uvaɗi. Reve A̱sulazuva a damma le, <<Ya̱wa̱i i gara uvaɗi ma̱ɓula̱!>> Ɗaɗa a garai uvaɗi. 8 Reve malingata'a u ɗe mu, <<Uwwa nda, aza a na a saɓai a̱ tyo upasu wi iɗa yu ugana a ca ta̱ Ruhu va̱ wivuwun a̱tsuma̱ e iɗa yu ugana.>>

9 Reve adanshi a̱ A̱sulazuva a̱ ta̱wa̱ ya̱'a̱ va̱ ana, 10 <<Ushi azurufa na̱ zinariya ya aza a na a̱ pura̱i Helda na̱ Tobiya na̱ Jedaya aza a na a̱ ka̱mba̱i diga Babila, a̱vu fo vu 'ya̱wa̱ o u'wa wa Josaya* ulobo wa Zafaniya o urana'a. 11 Vu tara azurufa'a na̱ zinariya'a vu yuwan ookokolo, reve vo oto yi a aaci a̱ Josuwa ulobo wa Jehozada, ganu gbain. 12 A̱vu vu damma yi, apa ili i na A̱sulazuva o oɓolo a̱ a̱soja a zuva a dammai, <Apa nda vuma na aala a̱ yi a ɗa eten, u ta yuwan eten diga uba̱ta̱ u na wu uta̱i, a̱vu u suwa A̱a̱'isamapaɗa a̱ A̱sulazuva. 13 A̱yi ɗa waa suwa A̱a̱'isamapaɗa a̱ A̱sulazuva, reve u da̱na̱ wotowu na̱ tsugbain reve u da̱nu u yuwan tsugono o ootogu a̱ yi. Waru u ta̱ da̱na̱ na̱ ganu o upasu wo ootogu o tsugono tsa̱ yi. Reve ele ra a̱ da̱na̱ a muwwulai.> 14 Ookokolo'o a̱ ta̱ da̱na̱ a̱ A̱a̱'isamapaɗa a̱ A̱sulazuva wo o'wo macuwayin ma Helem na̱ Tobiya na̱ Jedaya na̱ Josaya ulobo wa Zafaniya. 15 Aza a na a̱ ri alanga a̱ ta̱ ta̱wa̱ a kamba a suwa A̱a̱'isamapaɗa a̱ A̱sulazuva. Ɗaɗa yee reve a na A̱sulazuva o oɓolo a̱ a̱soja a zuva ɗa lyungu mu ya̱'a̱ ɗu. Agba ili i nda i ta shiwan na̱ vu yuwan tsutoni nu uɗyo wa̱ A̱sulazuva A̱sula̱ a̱ wu ulobonu.>>