1 Ecei A̱sulazuva iro'i a mantsa ma̱ lyushi,

A̱sulazuva a ɗa a tsu yuwan wunla̱.

A̱yi ɗa u tsu ca ama iro'i,

no ototopi atsusa uba̱ta̱ wa ama.

2 Adama a na a̱ma̱li a ta yuwusan adanshi e epen,

oboci a̱ ta̱ e inda alavu alavu e epen.

A ta dansa alavu a na a̱ ri epen,

a casu ofoli a adanshi a̱ nden ma asuvu.

Adama o ndolo a ɗa ama a̱ ri a agara e iwau

tse e ikyon i na o ɓongiyi

adama o ulambu wu za va aguɓa.

3 Upan u va̱ u ta̱ a̱ ma̱puna̱ a aci aza a aguɓa,

waru n ta ca azagbain a̱tsuma̱lima̱,

adama a na A̱sulazuva o oɓolo a̱ a̱soja a zuva

a̱ ta̱ goloɓo oɓolo e ikyon ya̱ yi, u'wa wa Yahuda.

A̱vu u zuwa le o o'wo tso do

vu uvaɗu a̱tsuma̱ o uvon.

4 Diga Yahuda ɗa a̱a̱ tsura̱ aatali e ikyun yu usaa,

diga ya̱'a̱ yi ɗa a̱a̱ tsura̱ rumu ma̱shuwa̱,

diga ya̱'a̱ yi ɗa a̱a̱ tsura̱ utan wu uvon,

diga ya̱'a̱ yi ɗa a̱a̱ tsura̱ zagbain suru.

5 Ama a Yahuda'a suru

o to o'wo tsa ama a na a gurai uvon,

a dasasa n'yuwatan a̱tsuma̱ o yilyo'o yu ure u gbain a̱tsuma̱ o uvon.

Adama a na A̱sulazuva a̱ ri oɓolo ne ele,

a ta yuwan uvon a̱vu a ca akumbi e ido wono.

6 <<N ta gbamato u'wa wa Yahuda,

a̱vu n wawa u'wa wa̱ Isuhu.

N ta̱ ka̱mba̱to le

adama a na n te inda iliyali i le.

O to o'wo she damma gashi n shi n 'yuwan le shi,

adama a na a̱mu ɗa A̱sulazuva A̱sula̱ e le,

n ta̱ gba a̱ usu le.

7 Ama a Ifiramu o to o'wo tsa ama o ucira,

a̱vu waru okolo e le a yuwan ma̱za̱nga̱

she damma o sowo ta̱ masayan.

Muwun n le n te ene yi,

reve a yuwan ma̱za̱nga̱,

okolo e le a ta yuwan ma̱za̱nga̱ a̱tsuma̱ a̱ A̱sulazuva.

8 N ta ca le iroci,

a̱vu m ɓoloto le.

Na amayun n ta wawa le,

waru o to o'wo a̱bunda̱ tsu ufaru.

9 Ko na wo o'woi m bete'we nle a̱tsuma̱ a nɗa,

suru na̱ ne diga ba̱ta̱ va alanga a ta cuwan na̱ a̱mu.

Ele na̱ muwun n le a ta la'a,

a̱vu a̱ ka̱mba̱.

10 N ta̱ ka̱mba̱to le diga e iɗa ya Masar

a̱vu m ɓoloto le diga Asiriya.

N ta̱ ta̱wa̱ ne ele e iɗa ya Giliyadu na̱ Lebanon,

hali she nu ure u ka̱la̱ma̱ le.

11 A mantsa ma na a uwai a mala ma̱ a̱tsuma̱lima̱,

a̱mu A̱sulazuva, n to voton ikeɗu i mala'a,

waru a̱ru'un a̱ Nilu e te 'yewe.

A̱ ta̱ ka̱ɗa̱to uvaɗu wa Asiriya,

ucira u tsugbain tsa Masar gba tso to koto.

12 N ta gbamato le a̱tsuma̱ a̱ A̱sulazuva,

reve a wala a̱tsuma̱ a ala a̱ yi,>>

ne ɗa A̱sulazuva o oɓolo a̱ a̱soja a zuva a dammai.