1 Reve n ka̱lyuwisa̱ a̱vu me ene aatagada a tsu'yan! 2 Reve malingata me ece mu, <<Nye ve enei?>> A̱vu n usu, <<Me ene ta̱ aatagada a tsu'yan, uga'an wa̱ yi ana mata'tsu washin waru ana kupa no ozo o ton.>> 3 Reve malingata'a u damma mu, <<A̱yi ɗa una̱ u na u ri agara a̱tsuma̱ e iɗa'a suru, adama a na ili i na u dammai e eɓele a̱ ta̱, za na suru yuwain wivu a̱ ta̱ gba̱ra̱ yi, waru e ili i na waa dansa e eɓele a̱ ndeɗe, za na suru kucinai ne epen a̱ ta̱ gba̱ra̱ yi. 4 N ta̱ lyungu aatagada'a o uta̱, waru u ta uwa o u'wa u vivu, no u'wa wu za na kucinai na aala a̱ va̱ ne epen. U ta̱ da̱na̱ pe o u'wa wa̱ yi reve u kototo yi, na akpata a̱ yi oɓolo na atali a̱ yi.>> Ne ɗa A̱sulazuva o oɓolo a̱ a̱soja a zuva a dammai.

5 Reve malingata ma na ma yuwain adanshi na̱ a̱mu'u mo uta̱ reve u damma, <<Ka̱lyuwa̱ zuva ve ene ili i nda i na i ri o uta̱.>> 6 Reve me ece, <<Nye i ɗa nda'a?>> A̱vu u usu, <<Aasaka o ukunzusu u ɗa.>> A̱vu u dammisa, <<A̱yi ɗa iwuya ya ama a̱tsuma̱ e iɗa'a ma̱ɓula̱.>> 7 Reve gba, ana a̱ kpa̱tu'wa̱i ikpa̱ta̱tsu ya aasaka'a, a̱vu gba me eneshi ka pe nden a aasaka'a! 8 A̱vu u damma, <<A̱yi nda iwuya i ɗa,>> a̱vu u ca̱co yi pe a aasaka'a, reve u kpa̱to ikpa̱ta̱tsu'u a̱ ka̱mba̱ o una̱ wa̱ yi. 9 Reve n ka̱lyuwa̱ zuva reve gba me ene a̱yi ɗa nda, a̱ma̱ci e re a̱ ta̱wa̱ nu upepu e evelu e le. A̱ shi ta̱ ne evelu tsa aza a aashamuwa, reve a̱ 'ya̱sa̱n aasaka'a zuva e memere mo uvaɗi na̱ zuva. 10 A̱vu me ece malingata ma na ma̱ shi a adanshi na̱ a̱mu'u, <<Te ɗa aa tara aasaka'a a̱ tyo?>> 11 Reve u usu, <<A̱ tyo e iɗa ya Babila adama a suwaa yi u'wa. Reve no o koto, a zuwa pe aasaka'a a̱ nda̱na̱ta̱ ma̱ yi.>>