1 A mantsa ma na n 'ya̱sa̱in esu a̱ va̱, reve me ene vuma ro na amunga o uritosu wu usaa o ukere wa̱ yi. 2 Reve me ece, <<Te va̱ 'ya̱wa̱?>> A̱vu u usu, <<N ta̱ 'ya̱wa̱ n rito Urishelima, tsa̱ra̱ n reve washin wa̱ yi nu uga'an wa̱ yi.>> 3 A mantsa ma na malingata ma na ma̱ da̱na̱i a yuwusan adanshi na̱ a̱mu ma̱ ka̱ra̱i, reve malingata mo ro mo uta̱ tsa̱ra̱ u ga'an na̱ a̱yi. 4 A̱vu malingata'a ma damma malingata ma na n da̱na̱i oɓolo na̱ a̱yi'i, <<Suma vu damma ulobo u ndeɗe, <Urana u ro Urishelima to o'wo tse ilyuci i na i ri na̱ ɓaɓu shi, adama a̱ a̱bunda̱ a ama ni iliyamunga a̱tsuma̱ a̱ yi. 5 Reve a̱mu na aciya̱va̱ mo o'wo yi uɓaɓu wa akina a̱ ka̱nda̱ruwa̱,> ne ɗa A̱sulazuva a dammai, <reve moo o'wo yi tsugbain pe e memere ma̱ yi.> >>

6 <<Uta̱i! Uta̱i! Sumai i lyawa iɗa yu ugana, adama a na m bete'we ɗu ta̱ a̱ tyo a pasu na̱shi va zuva,>> ne ɗa A̱sulazuva a dammai. 7 <<Uta̱i! A̱ɗu ama a Sihiyona! Sumai, a̱ɗu na i ri nden e ilyuci ya Babila!>> 8 Apa ili i na A̱sulazuva o oɓolo a̱ a̱soja a zuva a dammai, <<Adama a tsugbain tsa̱ yi u lyungu mu ta̱ a̱ 'ya̱wa̱ a nɗa n na m pura̱i itana i ɗu, adama a na za na suru ju'wa̱n nɗu u ju'wa̱n ta̱ mawun ma̱ lyusu ma̱ va̱. 9 Uwwai nda, n ta̱ 'ya̱sa̱n ukere u va̱ nla̱ngi ne ele, reve agbashi e le a̱ pura̱ itana i le.>> Ɗaɗa yee reve a na A̱sulazuva o oɓolo a̱ a̱soja a zuva a ɗa a̱ lyungu numu. 10 <<Cana ishipa vu yuwan ma̱za̱nga̱, a̱vu Usheli wa̱ Sihiyona, adama a na a̱yi ɗa nda, n ta̱ lo a̱ ta̱wa̱ a̱vu n da̱nu e memere ma̱ ɗu,>> ne ɗa A̱sulazuva a dammai. 11 O urana u ndolo nɗa na̱ a̱bunda̱ o to ɓolo aci na̱ A̱sulazuva, a̱vu o o'wo ama a̱ yi. U ta̱ da̱nu e memere me le, ɗaɗa yee reve a na A̱sulazuva o oɓolo a̱ a̱soja a zuva a ɗa a̱ lyungu numu ya̱'a̱ ɗu. 12 A̱sulazuva o to o'wo na̱ Yahuda tsa agadu a̱ yi iɗa ya akiza, reve waru u ɗangwisa Urishelima. 13 Rungwa̱ yi kpen a̱ ma̱ka̱ka̱n ma̱ A̱sulazuva a̱ɗu ama suru, adama a na u 'yon ta̱ mishin uba̱ta̱ wu nden wa akiza a̱ yi.