1 <<Ka̱lyuwa̱, a̱yi ɗa nda n ri gan na ma̱a̱ lyungu na̱ malingata ma̱ va̱, adama a na woo foɓoo mu ure, waru babu a̱ ɗu urevu A̱sulazuva a na yaa zama u ta̱ ta̱wa̱ a̱ A̱a̱'isamapaɗa a̱ yi. Malingata ma nzuwulai ma na i jimai e ipiri, na amayun u ta̱ lo a̱ ta̱wa̱,>> ne ɗa A̱sulazuva o oɓolo a̱ a̱soja a zuva a dammai.✝ 2 Amma za ne ɗa a gura kaɓa asuvu o urana u na wa̱ ta̱wa̱, waru za ne ɗa a gura e isawan a mantsa ma na u rocoyi aciya̱yi? Adama a na a̱ yi u ta̱ tsa akina a na a̱ tsu jeruweto rumu, waru tsa̱ a̱zuma̱'a̱ a̱ lima̱.✝ 3 U ta̱ da̱nu u yuwan uge'etosu tsa za na tsu jeruweto azurufa a̱vu u ka̱mba̱to yi cece. A̱yi ɗa wa̱a̱ ka̱mba̱to ugundo wa̱ Levi cece a̱vu wu jeruweto le tsa̱ zinariya na̱ azurufa, hali na a ca kucci le uba̱ta̱ wa̱ A̱sulazuva a̱tsuma̱ a̱ɓula̱. 4 Ɗaɗa kucci va aza a Yahuda na̱ a̱za̱ a̱ Urishelima o o'wo ili yu u ushishi uba̱ta̱ A̱sulazuva tsa rana na ka̱ra̱i ɗe, waru tsa a'wan a na a̱ ka̱ra̱i. 5 <<Ɗaɗa ma̱a̱ ta̱wa̱ zuzu na̱ a̱ɗu adama n yuwan uge'etosu. N ta̱ gba o'wo esu a aci o oboci na̱ a̱za̱ a̱ tsipere, na aza a na a yuwusan akucunu epen, na aza a na a tsutsugbusa melen ma aza azamalinga, na aza a na a palusa nra̱na̱ na̱ mkpa'an, na aza a na a̱ gba̱rusa̱ omocin, ele aza a na a uwwusa wovon u va̱ shi.>> Ne ɗa A̱sulazuva o oɓolo a̱ a̱soja a zuva a dammai.

6 <<A̱mu A̱sulazuva n tsu vadala okolo a̱ va̱ shi. Adama o ndolo, a̱ɗu ugundo wa Yakubu, o kototo ɗu suru suru shi. 7 Diga a mantsa ma nkaya nɗu i lyawa ta̱ o tonishi udammu u va̱, waru i yuwan tsutoni ne e le shi. I ka̱mba̱ uba̱ta̱ u va̱, a̱mu fo n ta̱ ka̱mba̱ uba̱ta̱ u ɗu,>> Ne ɗa A̱sulazuva o oɓolo a̱ a̱soja a zuva a dammai. <<Amma a̱vu i damma, <Cine tsu ɗa tsa̱ ka̱mba̱ uba̱ta̱ wa̱ wu?> >> 8 <<Vuma ta gura yuwan A̱sula̱ a'usa? Na̱ ne suru i yuwan mu ta̱ a'usa!>>

<<Amma a̱vu i damma, <Cine tsu yuwan nuwu a'usa?> >> <<Uba̱ta̱ wu za ta̱ a̱tsuma̱ kupa ɗu nu ucasu wi itana ya̱ a̱ɗuma̱ a̱ ɗu na̱ za vi iliyamunga i ɗu, oɓolo na a ɗa o ucasu wo okolo a̱ ta̱ a̱ ɗu! 9 Una̱ u ta aci a̱ ɗu, a̱ɗu iɗa suru, adama a na i ta yuwusan mu a'usa! 10 Ta̱wa̱yi na̱ kucci ɗu suru o u'wa wu uzuwa, adama a̱ tsura̱ ilyalya a̱tsuma̱ o u'wa u va̱. Lyungwa̱ numu a̱tsuma̱ e ili ya nda,>> ne ɗa A̱sulazuva o oɓolo a̱ a̱soja a zuva a dammai. <<ko ma̱ kpa̱tu'wa̱ na̱ntsu va zuva reve n tsuwa̱n ɗu aba'un a̱ a̱bunda̱ zana ya̱ tsura̱ asula a na ya̱ tsun le shi.>> ✝ 11 <<N te geshe ili i tsu'yan adama she a̱ lungusa̱ itana ya̱ a̱ɗuma̱ a̱ ɗu wan, waru ataci a̱ɗuma̱ ɗu oo oco muwun n le shi,>> ne ɗa A̱sulazuva o oɓolo a̱ a̱soja a zuva a dammai. 12 <<Reve nɗa suru n ɗe ɗu aza aba'un, adama a na iɗa i ɗu i to o'wo iɗa yu uyo'o wu nde.>> Ne ɗa A̱sulazuva o oɓolo a̱ a̱soja a zuva a dammai.

13 <<I damma ta̱ iwuya a aci a̱ va̱,>> Ne ɗa A̱sulazuva a dammai. <<Na̱ ne suru yee ece ta̱, <Nye ɗa tsu dammai a aci a̱ wu?> >> 14 <<I ta dansa, <Ili ya̱ pere iɗa a yuwaan A̱sula̱ a̱ga̱nda̱. Uda̱shiwu u ne ɗa tsa̱ tsura̱ na̱ tsu yuwan tsutoni na adanshi a̱yi, ko a damma tsu ka̱ra̱ a̱ 'ya̱wa̱ elime A̱sulazuva o oɓolo a̱ a̱soja a zuva o rocosu a̱tsumola̱ngu? 15 Agba gogo tsu te e nda aza aciyogbamu e le ɗa aza aba'un, hali gba na aza a na aa yuwusan iwuya ulyuwu we elime a ɗa goon a̱ tsura̱sa̱ shi, amma a̱ tsu lyungwa̱ ta̱ A̱sula̱ reve a̱ da̱nu gbaga.> >>

16 Reve aza a na a uwwusa wovon wa̱ A̱sulazuva a yuwan n dammulai, a̱vu A̱sulazuva o polo atsuvu reve wu uwwa le. A ɗana ta̱ aatagada o ucuwusan a̱ ma̱ka̱ka̱n ma̱ yi adama aza a na a uwwusa wovon wa̱ A̱sulazuva, waru aa yuwusan majiyan ma Ala a̱ yi. 17 <<O to o'wo a̱za̱ a̱ va̱,>> ne ɗa A̱sulazuva o oɓolo a̱ a̱soja a zuva a dammai, <<O to o'wo ama a sa'ani a̱ va̱ o urana u na n foɓoi, n ta̱ gba ene iliyali i le ununa vuma tse ene iliyali i mawun ma̱ yi za na tsu yuwusaan yi a̱ga̱nda̱. 18 Ɗaɗa gba ya̱a̱ da̱shi ene na a̱za̱ a̱ɓula̱ na̱ a̱za̱ e iwuya a̱ ri una̱ta̱ shi, na aza a na a yuwusaan A̱sula̱ a̱ga̱nda̱ na aza a na a yuwusaan yi shi.