1 A̱tsuma̱ a Batalami a yuwan ta̱ vuma ro na ri ni ikebe, waru ama a tsu uwwa ta̱ ili i na u tsu damma. Aala a̱ yi a ɗa Buwaza, eedenge a vali va̱ Na'omi za na a̱ shi a̱ tsu ɗe Elimele.

2 Urana u ro, reve Rutu za va Mowa damma Na'omi, <<Lyawa n 'ya̱wa̱ izami yu u'yanlu wi ishina o uɗuma̱ wu za na aa lyawa mu.>>

Reve Na'omi damma, <<To, u lobono ta̱, usheli u va̱, wala.>> 3 Reve Rutu 'ya̱wa̱ izami yu u'yanlu a̱ca̱pa̱ a aza na a yuwusan kya'an. Ana ili'i yaa cina yi, reve u cina aciya̱yi a yuwusan ulingaꞌa o uɗuma̱ wa Buwaza, eedenge e Elimele.

4 A̱yi ɗe, reve Buwaza uta̱ ɗe Batalami, reve u ca̱sa̱ a̱za̱ o ugasa'a, <<A̱sulazuva a̱ da̱na̱ oɓolo na̱ a̱ɗu!>>

Reve a̱ usu, <<A̱sulazuva aa zuwaa wu aba'un!>>

5 Reve we ece zagbain va̱ a̱za̱ o ugasa'a, <<Usheli wa zane ɗa ndeɗe'e?>>

6 Reve zagbai'in u usu, <<Usheli wa̱ Mowa u ɗaɗa, za na ka̱mba̱i oɓolo na̱ Na'omi.>> 7 <<U damma ta̱ <Yuwan ankuri lyawa mu n yuwan u'yanlu m ɓoloto a̱tsuma̱ a akatalu o ucina̱ wa̱ a̱za̱ o ugasa.> Reve u uwa a̱tsuma̱ o uɗuma̱'a̱ u yuwan ulinga babu uro diga ili yu usana a cina gogo, she ma̱wivun ma na u yuwain o oogodo.>>

8 Ɗaɗa Buwaza tsu damma Rutu, <<Usheli u va̱, zuwaa mu atsuvu, she vu 'ya̱wa̱ u'yanlu uba̱ta̱ u ro wan, she pa nda. Vu linga na akapi a agbashi e esheli a̱ va̱. 9 Vu ka̱lyuwa̱ uba̱ta̱ u na ali a yuwusan ugasa, reve vu toni le. N damma ta̱ ɗe olobo a na a yuwusan ulinga she a damaton wu wan. Na̱ vu uwwa akuli, vu 'ya̱wa̱ a a̱ka̱bu vu sowo mini ma na e kenei.>>

10 Reve Rutu ka̱ɗa̱to urewesu wa̱ yi a̱ tyo e iɗa, reve u damma, <<A̱mu za va Isra'ila ɗa shi. Cine vu roco numu isa'ani tsunda?>>

11 Reve Buwaza usu, <<Mu uwwa ta̱ ili i na vu yuwayin a̱na̱wa̱ ɗu ɗe ana vali va̱ wu kuwa̱i. N reve ta̱ cine vu lyawai dada na̱ mma va̱ wu ni iɗa i limatan ya̱ wu, reve vu ta̱wa̱ tsa̱ra̱ vu da̱nu na ama a na koto vu revei shi. 12 Lyawa A̱sulazuva a tsupaa a̱tsuma̱ e ili i na vu yuwain. Lyawa A̱sulazuva, A̱sula̱ a aza a Isra'ila a tsupa wu, za na vu ta̱wa̱i ya̱'a̱ yi gogo adama vu tsa̱ra̱ upa'atan!>> 13 Reve Rutu damma, <<Lyawa n lyuwa elime na̱ ma̱tsura̱ me isa'ani, zagbain va̱. Vu da̱na̱to mu ta̱ asuvu na adanshi na aagbashi a̱ wu ulobonu, ko na wo o'woi n rawa za ta̱ a̱tsuma̱ a agbashi e esheli a̱ wu shi.>> 14 Ana mantsa ma alya e ilyalya ma rawai, reve Buwaza damma yi, <<Ta̱wa̱ pa nda. Tara opopofu vu tsupusu a masayan ma alamu.>> Ɗaɗa u da̱nuyi oɓolo na̱ a̱za̱ o ugasa, a̱vu u ca yi ishina yu uzuwun. Reve u lyuwa u cuwa̱n, hali akapi a buwa yi. 15 Ana u 'yoyin adama u reme u'yanlu, a̱vu Buwaza damma olobo a na a yuwusaan yi ulinga a na, <<I lyawa yi u yuwan u'yanlu hali a̱tsuma̱ a akatalu, she i ɓara yi wan. 16 Hali gba yi susuɗusa akita a akatalu i lyawa le adama u yuwan u'yanlu, agba she i ɓara yi wan.>> 17 Ne ɗa Rutu yuwain u'yanlu hali she ulivu. Reve ana u fabai yitabo i na u ɓolotoi, u ta rawa makundatsu ushin. 18 Reve u tanu a̱ ka̱mba̱ a̱ lyuci, a̱vu u roco a̱na̱wa̱le ili i na u 'yanlai, a̱vu waru wu uta̱a̱ ilyalya i na u buwayi a na u cuwa̱in a̱vu u ca yi. 19 A̱vu Na'omi ece yi, <<Te ɗa vu yuwain u'yanlu ana'an? Te ɗa vu yuwain ulinga? Za va aba'un ɗa vuma na revei na̱ a̱vu.>> Ɗaɗa Rutu dammai a̱na̱wa̱ le adama a vuma na u yuwain ulinga uba̱ta̱ wa̱ yi u damma, <<Aala a vuma na n yuwain ulinga na̱ a̱yi ana'an Buwaza ɗa.>> 20 Reve Na'omi damma jene va̱ yi, <<A̱sulazuva a zuwaa yi aba'un. A̱sulazuva a lyawa o rocosu aza a wuma na̱ a̱kwa̱kwa̱ isa'ani shi.>> A̱vu waru u damma, <<Vuma nda'a eedenge a̱ zuzu a̱ tsu a ɗa, a̱tsuma̱ a aza a na aa gura ɓana tsu.>> 21 Reve Rutu za va Mowa damma, <<Hali gba waru Buwaza'a u damma mu ta̱, <Vi isawusan na̱ a̱za̱ o ulinga a̱ va̱ hali she no o koto ugasa u va̱ suru.> >> 22 A̱vu Na'omi damma Rutu jene va̱ yi, <<U to lobono usheli u va̱ vu gereshe ne esheli o ulinga a̱ yi, adama ta̱wa̱ a yuwaan wu ili yu ulambu yu ugbozu o uɗuma̱ u ro wan.>> 23 Reve Rutu gereshe ne esheli o ulinga wa Buwaza a yuwusan u'yanlu hali she na o kotoi ugasa u yitabo no oroci a yitabo. Reve u lyuwa elime na̱ nden na̱ a̱na̱wa̱ le.