1,2 1 A mantsa ma na a̱za̱ o uge'etosu a yuwusain tsugbain a̱tsuma̱ a Isra'ila, a yuwan ta̱ vuma na a̱ tsu ɗe Elimele, diga o ugundo wa Efarata za na da̱nuyi a̱ lyuci va Batalami a̱tsuma̱ a Yahuda. Na'omi ɗa aala a ka va̱ yi, waru a̱ da̱na̱ ta̱ no olobo e re, za ta̱ Malo, za ta̱ waru gba Kiliyon. Ana a yuwain ambulu, reve a̱ 'ya̱wa̱ e iɗa ya Mowa a̱ da̱nu ɗe. 3 Reve Elimele kuwa̱, a̱vu u lyawa Na'omi oɓolo no olobo e re a̱ yi. 4 Olobo'o a zuwa ta̱ esheli a̱ Mowa. Za ta̱ zuwa ta̱ usheli u na a̱ tsu ɗe Ofa za ta̱ gba u zuwa Rutu. Amma a na a yuwain a'wan a na a rawa kupa ɗe, 5 reve Malo na̱ Kiliyon a̱ kuwa̱. Reve a lyawa Na'omi a̱ nde'en, babu vali babu waru mawun.

6 Ana Na'omi uwwai a na A̱sulazuva a kamba ta̱ ama a̱ yi, reve u cayisa le ilyalya. Reve a̱yi ne ejene a̱ yi o foɓo tsa̱ra̱ a lyawa Mowa, tsa̱ra̱ a̱ ka̱mba̱ Batalami. 7 Reve Na'omi ne ejene e re a̱ yi a lyawa uba̱ta̱ u na a̱ da̱na̱i e reme ure tsa̱ra̱ a̱ ka̱mba̱ e iɗa ya Yahuda. 8 Ele a̱tsuma̱ a mmalu, ɗaɗa Na'omi tsu damma ejene e re a̱ yi, <<Ka̱mba̱i e iɗa i nan dada i ɗu, she i kuru mu wan. Lyawa A̱sulazuva o roco ɗu isa'ani cine i yuwayin ali a̱ ɗu oɓolo na̱ a̱mu. 9 Lyawa A̱sulazuva a zuwa i tsura̱ wivuwun o u'wa u lolo u ro.>>

Reve Na'omi katala le, a̱vu a̱ shon lon. 10 Reve a damma yi, <<O'o! Tsu ta̱ 'ya̱wa̱ uba̱ta̱ wa ama a̱ wu oɓolo na̱ a̱vu.>>

11 Amma Na'omi damma ta̱, <<Esheli a̱ va̱, ka̱mba̱i a 'wa ɗu. Cine i cigai i kuru mu? N ta gura matsisan olobo o ro a na aa zuwa ɗu? 12 Ka̱mba̱i esheli a̱ va̱ saɓai ure u ɗu. Adama a na n kutsa ta̱ lon m buwa a̱ tsura̱ vali shi. Ko a damma n ta̱ nu uzuwu wo okolo, ko a damma n ta̱ tsura̱ vali na ayin a nda reve m matsan olobo, 13 i ta gura puro le hali she na a kungwa? I ta 'yuwan a yuwan lolo? O'o, esheli a̱ va̱, okono a̱ va̱ a la'a ta̱ za ɗu a̱bunda̱ lon, adama a na ukere wa̱ A̱sulazuva u ta̱ a̱ nla̱ngi na̱ a̱mu.>>

14 Reve a̱ 'ya̱sa̱n ɗyo le a uwisa mesun. Reve Ofa katala a̱na̱wa̱le, reve u lyawa yi. Amma Rutu kaɓa yi ta̱ Na'omi.

15 Reve Na'omi damma Rutu, <<Ka̱lyuwa̱, za va̱ wu ka̱mba̱ ta̱ o u'wa wa ama e le na̱ a̱ma̱li e le. Ka̱mba̱ oɓolo na̱ a̱yi.>>

16 Reve u usu, <<She vu gbagba mu n ka̱mba̱ wan, ko vu zuwa mu n lyawa itoni ya̱ wu. Uba̱ta̱ u na vu tyoi suru, ɗe ɗa ma̱a̱ tyo. Uba̱ta̱ u na vu da̱nuyi suru, ɗe ɗa ma̱a̱ da̱nu. Ama a̱ wu o to o'wo ama a̱ va̱. A̱sula̱ a̱ wu waru A̱sula̱ a̱ va̱. 17 Uba̱ta̱ u na vu kuwa̱i suru, ɗe ɗa ma̱a̱ kuwa̱. Uba̱ta̱ u na a̱a̱ ciɗo wu, ɗe ɗa fo a̱a̱ ciɗo mu. M pati ta̱ A̱sulazuva a ca mu a̱tsuma̱lima̱ lon na̱ n shiton nzuwulai n na n yuwain shi, a̱yi ɗa n kakasa na̱ a̱vu wan. Ukwa̱ u ɗa goon waa kasa tsu.>> 18 Ana Na'omi revei Rutu zuwa ta̱ okolo a na wa̱a̱ 'ya̱wa̱ na̱ a̱yi, u da̱shi yuwan adanshi o ro waru shi.

19 Reve Na'omi oɓolo na̱ Rutu a lyuwa elime na̱ mmalu, hali a rawa a̱ lyuci va Batalami. Ana a rawai Batalami, reve ama suru ra̱pula̱ na̱ ma̱za̱nga̱ adama e le. Reve a̱ma̱ci a̱ lyuci'i a damma, <<Na'omi ɗaɗa nda gba'a?>>

20 Reve u usu ama'a, <<She i da̱shi ɗe mu Na'omi wan. I ɗe mu Mara,* adama a na Mogono me Ili Suru ma zuwa ta̱ wuma u va̱ a̱tsuma̱ o okono lon. 21 Ana n lyawai pa, n da̱na̱ ta̱ ni ili i na n cigai, amma gogo A̱sulazuva a̱ ka̱mba̱to mu ta̱ o u'wa babu ili. Cine yee ɗe mu waru Na'omi, ana A̱sulazuva a ca numu a̱tsuma̱lima̱, reve u zuwa wuma u va̱ wo o'wo usa̱n?>>

22 Ne ɗa Na'omi ka̱mba̱i diga Mowa oɓolo na̱ Rutu za va Mowa jene va̱ yi, reve a rawa Batalami o ufaru u magasa mo oroci a yitabo†.