1 Aza a Isra'ila a tara ta̱ akucunu ɗe Mizfa: <<A̱tsuma̱ a̱ tsu babu vuma ta̱ na aa ca usheli wa̱ yi wo olo ama a Banyami.>>

2 Reve ama'a a̱ 'ya̱wa̱ Betel, uba̱ta̱ u na a̱ da̱nuyi a̱ ma̱ka̱ka̱n ma̱ A̱sula̱ hali ulivu, a̱vu a̱ 'ya̱sa̱n ɗyo le e mesun babu uyo'o. 3 <<A̱sulazuva, A̱sula̱ a Isra'ila, nye i zuwai ili i nda i cina ntsu, adama n nye tsaa lamba ugundo u ta̱ a̱tsuma̱ a Isra'ila ana'an?>>

4 Ana usana u tawai na̱ wasasa, a̱vu ama o foɓo masa'a reve a ca kucci vu ukula̱tosu na̱ za muwwulai.

5 A̱vu aza a Isra'ila a yuwan yeci, <<A̱tsuma̱ o ugundo wa aza a Isra'ila suru zane ɗa kuɗa̱i o ɓoloto a̱ ma̱ka̱ka̱n ma̱ A̱sulazuva?>> Adama a na a yuwan ta̱ ɗe akucunu a Mizfa vuma na suru kuɗa̱i o ɓoloto a̱ ma̱ka̱ka̱n ma̱ A̱sulazuva a̱ to una yi na amayun.

6 A̱vu aza a Isra'ila e ene iliyali ya̱ a̱za̱ e le aza a Banyami. Reve a damma, <<Ana'an o koɗo ta̱ ugundo u ta̱ a̱tsuma̱ a aza a Isra'ila. 7 Cine tsa ɗa tsaa yuwain a̱vu tsu zamiya aza a na a buwai a̱ma̱ci, adama a na tsu tara ta̱ ɗe akucunu na̱ A̱sulazuva a na tsa ca le esheli a̱ tsu lolo shi?>> 8 Reve e ece, <<A̱tsuma̱ o gundo va aza a Isra'ila zane ɗa kuɗa̱i a gawan a̱ ta̱wa̱ a̱ ma̱ka̱ka̱n ma̱ A̱sulazuva ɗe Mizfa?>> Reve a̱ ta̱wa̱ e reve a na babu vuma na ta̱wa̱i diga a̱ lyuci va Jabe Giliyadu uba̱ta̱ e iɓolo. 9 Adama a na ana e kecei ama'a, a̱ ta̱wa̱ ta̱ e reve na babu vuma na ta̱wa̱i ɗe a̱tsuma̱ a ama a Jabe Giliyadu.

10 Reve oɓolo'o a̱ lyungu aza a na a gurai uvon ukpakukupa kupa nu ukpakukupa ure (12,000) nu udammu, <<'Ya̱wa̱i Jabe Giliyadu yu una ama a na a̱ ri pe na̱ nden suru oɓolo na̱ a̱ma̱ci na̱ muwun na̱ matsun me pe'eni. 11 Apa ili i na yaa yuwan, i kototo ali na̱ a̱ma̱ci a na e revei ɗe ali suru.>> 12 Reve a̱ tsura̱ a̱tsuma̱ a ama a na a̱ ri nden a̱tsuma̱ Jabe Giliyadu esheli a wawa'a ukpakuna̱shi (400) a na koto e revei ali shi, reve a tara le a̱ tyo o uva̱la̱ta̱ a Shilo, za na ri e iɗa ya Ka'ana.

13 Reve oɓolo a ama a aza a Isra'ila suru a̱ lyungu ni ikaka ya asuvu a̱ nden a̱ tyo uba̱ta̱ wa aza a Banyami aza a na a̱ da̱na̱i na̱ nden a aatali a Rimo. 14 A̱vu aza a Banyami a̱ ka̱mba̱ a 'wa le a mantsa mo ndolo. Reve aza a Isra'ila a ca le a̱ma̱ci a na a lyawai wuma a̱tsuma̱ a̱ a̱ma̱ci a Jabe Giliyadu, agba a rawa le suru shi.

15 Reve ama'a ene iliyali ya Banyami, adama a na A̱sulazuva a̱ shi ta̱ azama u tasa le a̱tsuma̱ o gundo va aza a Isra'ila. 16 Reve mbara mi iɓolo'o a damma, <<Cine tsa ɗa tsaa yuwain na ali o ugundo wa Banyami a na a̱ tsura̱i a̱ma̱ci shi adama a na o kototoi a̱ma̱ci e le?>> 17 Reve a damma, <<A ciga a 'yuwan a̱ tsura̱ agadu adama aza a na a la'ai o ugundo wa Banyami, tsa̱ra̱ ugundo'o u koto a̱tsuma̱ a Isra'ila wan. 18 Agba tsaa gura ca nle esheli a̱ tsu o o'wo a̱ma̱ci e le shi.>> Adama a na aza a Isra'ila'a yuwan ta̱ ɗe akucunu: <<Za na suru cayi za va Banyami ka, una̱ u ta̱ reme yi.>> 19 Reve a damma, <<Gogo tsunda a ta yuwusan a̱buki a̱ A̱sulazuva za na a tsu yuwusan aa'wan suru ɗe Shilo, a̱ tyo o ugana wa̱ Betel, na asana o ure gawaan ve Betel a̱ tyo Shekem, waru nu uyagi wa̱ Lebona.>>

20 Reve a damma ama a Banyami,<<'Ya̱wa̱i i vawan a̱ a̱ɗuma̱ a̱ ina̱bi, 21 a̱vu i ka̱lyuwa̱. Ne esheli a̱ Shilo o uta̱ tsa̱ra̱ a uwa uje'en u le, a̱vu yu uta̱ pe a̱tsuma̱ a̱ a̱ɗuma̱ a̱ ina̱bi vuma suru u rono za ta̱ a̱tsuma̱ e le a̱ ka̱mba̱ e iɗa ya Banyami wo o'wo ka va̱ yi. 22 Na̱ nan dada e le ko azakpakpara e le a̱ showen tsu, tsu ta damma le, <Yuwaan ntsu isa'ani o una̱ u na yaa kamba le, adama a na tsu tsura̱a̱ le a̱ma̱ci a mantsa mo uvon shi. Agba a̱ɗu waru i ri na̱ unusu shi, adama a na i ca le esheli a̱ ɗu shi.> >>

23 Reve ama a Banyami a yuwan ne. Esheli'i a̱tsuma̱ o uje'en, vali suru reme ta̱ za ta̱ a̱vu u rono yi wo o'wo ka va̱ yi. Reve a̱ 'ya̱wa̱ a̱ ka̱mba̱ uba̱ta̱ wa agadu e le, reve a suwisa ilyuci'i a̱vu a̱ da̱nu a̱tsuma̱ e le.

24 A mantsa ma na aza a Isra'ila a lyawai uba̱ta̱'a̱, reve a̱ ka̱ra̱ a̱ ka̱mba̱ o gundo le na̱ matsun le, vuma suru uba̱ta̱ wa agadu a̱ yi.

25 *A rana ndolo aza a Isra'ila a̱ da̱na̱ na̱ mogono shi, za suru tsu yuwan ta̱ cine u cigai.