1 Apa nda nɗa n na A̱sulazuva a lyawai, adama a̱ lyungwa̱ aza a Isra'ila suru aza a na e peɗei uvon a̱tsuma̱ a Ka'ana shi. 2 U yuwan ta̱ ne adama u roco limatan ve elime va aza a Isra'ila uvon, ele aza a na koto a̱ shi a yuwain uvon shi. 3 Apa nɗa'a: azagbain o ton a aza a Filistiya na aza a Ka'ana suru na aza a Sidon na aza a Hiviya a na a̱ ri na̱ nden a nsasan ma Lebanon, diga a Masasan ma Ba'al Hamon a̱ tyo Lebo Hamat. 4 A lyawa le ta̱ a̱ lyungwa̱ aza a Isra'ila ko a ta yuwan tsutoni na̱ wila̱ wa̱ A̱sulazuva, za na u cayi nkaya n le e ekere a Musa.

5 Aza a Isra'ila a̱ da̱nu ta̱ a̱tsuma̱ a aza a Ka'ana na aza a Hitiya na aza Amoriya na aza a Periziya na aza a Hiviya oɓolo na aza a Jebusiya. 6 Reve a tara esheli a aza a Ka'ana o o'wo a̱ma̱ci e le, reve ele fo a tara esheli e le a ca olobo a aza a Ka'ana lolo. Ɗaɗa gba a yuwayin musula̱ n le a̱ga̱nda̱.

7 Aza a Isra'ila gba a yuwan ta̱ ili i wuya a̱ ma̱ka̱ka̱n ma̱ A̱sulazuva. E icina ta̱ na̱ A̱sulazuva A̱sula̱ e le reve a̱ ka̱ra̱ a yuwusaan a̱ma̱li a Ba'al na̱ Ashera a̱ga̱nda̱. 8 A̱vu A̱sulazuva a yuwan upan na aza a Isra'ila lon, reve u zuwa le e ekere a Kushan Rishatayim mogono ma Mesopotamiya. Reve aza a Isra'ila a yuwaan yi tsugbashi hali a'wan kunla̱. 9 Amma a mantsa ma na aza a Isra'ila e showeyin A̱sulazuva, u 'ya̱sa̱a̱n le ta̱ na̱ za na wawa nle, a̱yi ɗa Otiniye ulobo wu zawa'a va Keleb za na a̱ tsu ɗe Kena. 10 Ruhu va̱ A̱sulazuva cipa̱a̱ yi ta̱, reve gba wo o'wo za vu uge'etosu va aza a Isra'ila. U 'ya̱wa̱ ta̱ uvon, a̱vu A̱sulazuva a ca yi Kushan Rishatayim mogono ma Mesopotamiya e ekere a̱ yi. A̱vu u lyuwa ucira wa Kushan Rishatayim. 11 Ɗaɗa iɗa'a yi ivuwain nu uvon hali a'wan amunga, hali she na Otiniye ulobo wa̱ Kena u kuwa̱i.

12 Reve waru aza a Isra'ila a yuwisan ili i wuya a̱ ma̱ka̱ka̱n ma̱ A̱sulazuva. A̱vu A̱sulazuva a zuwa Egilon mogono ma̱ Mowa ma la'a le ucira, adama a na a yuwain ili i wuya a̱ ma̱ka̱ka̱n ma̱ A̱sulazuva. 13 Reve u ɓoloto aza a Amon na aza a Amaleka, a̱vu a̱ 'ya̱wa̱ a lyuwa aza a Isra'ila nu uvon. Reve a usa Lyuci Gbain vu Shuwa za na a̱yi ɗa Jeriko. 14 A̱vu aza a Isra'ila a yuwaan Egilon mogono ma̱ Mowa tsugbashi hali a'wan kupa na̱ kunla̱.

15 A̱vu waru aza a Isra'ila e showen A̱sulazuva, reve u 'ya̱sa̱a̱n le za vi iwawi Ehud ma̱gula̱, ulobo wa Gera o ugundo wa Banyami. A̱vu aza a Isra'ila a̱ lyunguwa̱ Egilon mogono ma̱ Mowa nu uneꞌe e ekere a Ehud. 16 A̱vu Ehud yuwaan aciya̱yi matsun me pe'eni ma̱ na̱ re, uga'an wa̱ yi u rawa ta̱ udasuwu anana a̱ ta̱ na akapi. A̱vu wu nla̱ matsu'un a aagutsu o usa'ani wa̱ yi, a̱vu wu pala yi nu utugu wa̱ yi. 17 A̱vu u 'ya̱wa̱a̱ nu uneꞌe'e uba̱ta̱ wa Egilon mogono ma̱ Mowa. Egilon gba vuma na ri na̱ lipu lon ɗa. 18 Ana Ehud ca niyi uneꞌe'e, a̱vu u zuwa ama a na a kamba niyi itana yu une'e'e a̱ ka̱ra̱. 19 A̱vu Ehud na aciya̱yi u ka̱ra̱ oɓolo ne ele hali she ana a rawai uba̱ta̱ wa̱ atali o ushe'un zuzu na̱ Gilga, a̱vu u ka̱mba̱. Reve u damma, <<Mogono, n ta̱ ni ikaka yu usokowu adama a̱ wu.>>

A̱vu mogono ma damma azagbain a̱ yi, <<Buwaa ntsu ure!>> A̱vu azagbain a̱ yi suru o uta̱.

20 A̱vu Ehud rawa ya̱'a̱ yi a̱yi nden a̱ nde'en a aasula ɗe o u'wa wa zuva uba̱ta̱ u na u ri uta̱nu. A̱vu u damma, <<N tsura̱ ta̱ ikaka uba̱ta̱ wa̱ A̱sula̱ adama a̱ wu.>> A̱vu mogono ma̱ 'yon uba̱ta̱ u na u da̱na̱i nden. 21 A̱vu Ehud zuwa ukere wu ugula̱ wa̱ yi, u tala matsun me pe'eni a aagutsu o usa'ani wa̱ yi, reve u sapaa mogono'o a̱ a̱a̱tsuma̱. 22 Matsun me pe'eni'i ma uwa ta̱ oɓolo nu ukutsu suru, a̱vu mani'in ma pala yi. Ehud rono matsun me pe'eni'i o uta̱ shi. Reve tsishin tso mogono tso lolo. 23 A̱vu Ehud uta̱, a̱vu u ɓa̱ru na̱ntsu va aasula a zuva reve u katsu le.

24 Ana u ka̱ra̱i, reve azagbain o mogono'o a̱ ta̱wa̱. Ana a cinai na̱ntsu'u ukatsuwu, a jiyan ta̱, <<U ta yuwan u uwa rulu a aasula o uta̱nu.>> 25 O puro ta̱ hali a̱ kuna̱. Amma ana u kpa̱tu'wa̱i na̱ntsu va aasula'a shi, reve a tara kpa̱tu'utsu a̱ kpa̱tu'wa̱ le. A̱vu a cina zagbain le nven e iɗa ukwa̱!

26 A mantsa ma na a̱ shi e ipiri, reve Ehud puwa̱n. Reve u ka̱ra̱la̱i nu uba̱ta̱ wa atali o ushe'un, a̱vu u ka̱ra̱ a̱ tyo Seyira. 27 Ana u rawai, reve wi ivula̱ aavana ɗe e iɗa ya agaɗi ya Ifiramu. A̱vu aza a Isra'ila a̱ zura̱ a̱ cipa̱ oɓolo na̱ a̱yi a lyawa iɗa ya agaɗi'i, a̱yi ɗa u rono nle aɗanga.

28 Reve u damma le, <<Toni numu, adama a na A̱sulazuva a ca ɗu ta̱ ɗe n'yuwatan n ɗu a̱za̱ a̱ Mowa e ekere a̱ ɗu.>> Reve a̱ kuru yi a̱cipa̱ a̱vu a usa upasata wu Uɗolu wa̱ Urudu wa̱ a̱za̱ a̱ Mowa. A lyawa nanza pasa shi. 29 A mantsa'a o una ta̱ ali o uvon o ucira wa̱ a̱za̱ a̱ Mowa ukpakukupa kupa (10,000). Babu vuma na la'ai. 30 O urana u ndolo u ɗa aza a Isra'ila a lyuwai aci a̱ a̱za̱ a̱ Mowa. Reve iɗa'a yi ivuwan nu uvon a'wan kupakunla̱.

31 A̱ca̱pa̱ a̱ Ehud she Shamga ulobo wa Ana, za na unai aza a Filistiya ukpakuta̱li (600) na aaɗanga a̱ ma̱gba̱ra̱ me inan. A̱yi fo u wawa ta̱ Isra'ila.