1 O urana u ndolo a̱vu Debora na̱ Barak ulobo wa Abinowam a cana ishipa i nda a damma,

2 <<Ana azagbain a aza a Isra'ila a tarai tsugbain tsa Isra'ila,

ana ama a cayi aciyele nu ucigu u le a yuwan uvon,

a cuwa A̱sulazuva!

3 <<Poloi atsuvu a̱ɗu ngono!

Uwwai nda, a̱ɗu aza a tsugbain!

A̱mu na aciya̱va̱ n ta canaa A̱sulazuva ishipa,

n ta canaa A̱sulazuva, A̱sula̱ a Isra'ila ishipa yi ica.

4 <<A̱sulazuva, mantsa ma na vu lyawai nsasan ma̱ Seyi,

ana vu uta̱i e iɗa ya Edom,

iɗa i jinga̱ɗa̱ ta̱

a̱vu iro'i yu ucira yo oco diga zuva.

Ee, eleshe o oco ta̱ mini mo ucira.

5 Nsasan n jinga̱ɗa̱ ta̱ a̱ ma̱ka̱ka̱n ma̱ A̱sulazuva,

ko Masasan ma Sinai✝ fo a̱ ma̱ka̱ka̱n ma̱ A̱sulazuva, A̱sula̱ a Isra'ila.

6 <<A rana va Shamga, ulobo wa Ana

a rana va Jaye, a lyawa ta̱ itoni yu uregbain,

reve aza a mmalu a̱ ka̱ra̱ a̱ kurusu a̱ka̱nda̱ruwa̱ta̱ e re.

7 Reve mulyuci ma aza a Isra'ila mo o'wo okongo,

mo o'wo okongo she mantsa ma na a̱mu Debora n 'yoyin.

N 'yoyin tsa mma e ekere a aza a Isra'ila.

8 Ana a ɗangwai musula̱ n sa'avu,

a̱vu uvon u ta̱wa̱ a̱ na̱ntsu lyuci gbain.

Amma ko a̱a̱ra̱ga̱ ko ibata a̱ tsura̱

a̱tsuma̱ a̱ a̱za̱ o uvon ukpakukupa amunga (40,000) a̱tsuma̱ a Isra'ila shi.

9 Okolo a̱ va̱ a̱ ta̱ uba̱ta̱ u nan yali o uvon a Isra'ila,

aza a na a cayi aciyele nu ucigu u le a̱tsuma̱ a aza a Isra'ila.

A cuwa A̱sulazuva!

10 <<I yuwan adanshi e ili i na A̱sulazuva a yuwain,

a̱ɗu na i kumbai nloli n uri,

a̱ɗu na i ri nden a̱ rutsu sa'ani,

na̱ a̱ɗu fo na a zuwai mmalu a ana o ure uba̱ta̱ u na ya̱a̱ 'ya̱wa̱ biti.

11 I polo atsuvu o uɗyo wa aza a na aa tanusu mini o una̱ wo oko'o,

a casu alabari o ulyuwu wa aci a̱ A̱sulazuva,

ulyuwu wa aci wa aza a Isra'ila.

<<A̱vu ama a̱ A̱sulazuva a dasu a̱ cipa̱

a̱ tyo o una̱ntsu.

12 A damma, <Vu 'yon, vu 'yon, a̱vu Debora!

'Yon, 'yon vu uwa elime, vu cana ishipa!

Vu 'yon a̱vu Barak,

vu guɓa aza a na vu pura̱i, a̱vu ulobo wa Abinowam.>

13 <<A̱vu ama a na a pasai,

a̱ cipa̱ a̱ ta̱wa̱ uba̱ta̱ wa azagbain e le,

ama a̱ A̱sulazuva a̱ ta̱wa̱ ta̱ ya̱'a̱ va̱

oɓolo na̱ n'yuwatan mu ucira ma̱ yi.

14 Ozo o ro o uta̱ ta̱ uba̱ta̱ wa Ifiramu, aza a na ikyun i le i ri a̱tsuma̱ a Amaleka.*

Banyami shi ta̱ oɓolo na aza a na a̱ kuru nuwu.

Diga o umatsun wa Maki azagbain a̱ a̱soja a̱ cipa̱i a̱ ta̱wa̱,

waru diga ya̱ Zebulun aza a na a̱ ri uguzu na aaɗanga a yali ya̱ a̱soja.

15 Azagbain a Isaka o to oɓolo na̱ Debora,

amayun, Isaka to oɓolo na̱ Barak,

o toni yi ta̱ ni ilaɗi a̱ tyo o uka̱ri'i.

Amma ugundo wa̱ Roben u ne'eshen ta̱,

a̱sa̱la̱ a̱ ta̱wa̱ le a̱ ta̱ shi.

16 Adama a̱ nye yi isawain oɓolo no oɓolo e ikyon,

adama yu uwwa i'ulu adama o oɓolo e le?

Amayun ugundo wa̱ Roben u ne'eshen ta̱,

a̱sa̱la̱ a̱ ta̱wa̱ le a̱ ta̱ shi.

17 Ugundo wa Gadu wi isawan ta̱ asana o Uɗolu wa̱ Urudu.

Nye i zuwai ugundo wa Dan

wi isawain uba̱ta̱ wa antsun?

Asha waru isawan ta̱ a̱ nge'en m mala,

e isawan ta̱ uba̱ta̱ u na antsun e isawusan.

18 Amma ama a̱ Zebulun a ca ta̱ wuma u le,

ne ɗa waru ama a Nafutali uba̱ta̱ wu uvon.

19 <<Ngono n ta̱wa̱ ta̱ a yuwan ta̱ uvon,

ngono ma Ka'ana a̱ ta̱wa̱ ta̱ a yuwan uvon,

ɗe Ta'ana, a̱ nge'en mu uɗolu wa Megido,

agba a̱ pura̱ itana i azurufa shi.

20 Italyo'o i yuwan ta̱ uvon ɗe zuva,

ele a paɗalasa, a yuwan ta̱ uvon na̱ Sisera.

21 Uɗolu wa̱ Kishon u lyuwa le ta̱,

a̱yi akuci o uɗolu, Uɗolu wa̱ Kishon.

<<Lyuwa elime wuma u va̱,

vu kapanu!

22 <<Reve ido yu ucira ya Sisera i uwa ilaɗi,

a̱vu a̱ ka̱ra̱ o ka̱vurusa̱ iɗa no okotsu e le.

23 <<Reve malingata ma̱ A̱sulazuva ma damma,

<Yuwaan lyuci va Mero una̱.

Vu yuwaan ama a̱ yi una̱ u vama,

adama a na a̱ ta̱wa̱ a kamba A̱sulazuva shi,

a kamba A̱sulazuva uvon oɓolo na̱ a̱za̱ o uvon o ucira a̱ yi shi.>

24 <<Ka na la'ai aba'un a̱tsuma̱ a̱ a̱ma̱ci a̱yi ɗa Jaye,

ka va Heba za va Keni,

za na la'ai akapi a̱ a̱ma̱ci

a na a̱ ri nden a̱tsuma̱ o ogodo aba'un.

25 Sisera pati ta̱ mini,

a̱vu u ca yi maani;

a yanda i na yi ntsayi a ca azagbain,

reve u ca yi maani ma̱ a̱ga̱ɓa̱.

26 U canana ta̱ ukere wa̱ yi u tara rumu ma̱shuwa̱ mo oogodo,

ukere u sa'ani wa̱ yi u ɗa u guza̱i ma̱ka̱ta̱.

A̱vu u ga̱la̱a̱ Sisera, a̱vu wu ɓoso yi aaci,

reve u mura yi aaci u tusula niyi kengi vu utsuvu.

27 E memere ma ana a̱ yi a ɗa u liɓai e iɗa, u riya̱i, u voyin.

E memere ma ana a̱ yi a ɗa u liɓai, u riya̱i.

Uba̱ta̱ u na u liɓai, lo ɗa u riya̱ u kuwa̱i.

28 <<Mma va Sisera indana ta̱ iɗa nu usowoto wu upepu

wi indana ta̱ nu uba̱ta̱ wi irumu i na i geshei usowoto wu upepu, u damma,

<Adama a̱ nye keke vi ido ya̱ yi jimai babu na u ka̱mba̱i?

Adama a̱ nye ilama yi ido ya̱ yi i ka̱mba̱i keɗu shi?>

29 A̱ma̱ci a na a la'ai ugbozu,

a̱tsuma̱ a aza a na aa kambusa yi ulinga, a̱ usu yi ta̱;

amayun gba u lyuwa ta̱ elime a dansaa aciya̱yi,

30 <Ele a zamishi a̱vu waru e ne'eshishen

itana i na a̱ pura̱i uba̱ta̱ wu uvon:

usheli u ta̱ ko ejere adama a vuma ta̱,

a̱tugu a sa'ani a wukalu adama a Sisera,

a̱tugu a sa'ani na̱ a̱za̱ o uɗavu,

na̱ a̱tugu a wukalu adama a̱ va̱.>

31 <<A̱sulazuva, lyawa n'yuwatan ma̱ wu suru n koto, tsa̱ Sisera!

Amma lyawa aza a na a ciga nuwu a̱ 'yon a̱tsuma̱ o ucira,

cine urana u tsu uta̱!>>

A̱vu iɗa'a yi ivuwan nu uvon hali a'wan amunga.