1 Ana Ehud kuwa̱i waru, reve aza a Isra'ila a yuwisan ili i wuya a̱ ma̱ka̱ka̱n ma̱ A̱sulazuva. 2 Reve A̱sulazuva zuwa le e ekere a Jabin mogono ma Ka'ana, za na shi o tsugono a̱tsuma̱ a Hazo. Sisera ɗa da̱na̱i yali ya̱ a̱soja ya̱ yi, za na da̱na̱i a̱tsuma̱ a Haroshet vu Nɗa. 3 Reve ama a Isra'ila e showen A̱sulazuva, adama a na Jabin da̱na̱ ta̱ ni ikeke yi ido yi irumu ukpaku kucci (900) reve u ɓongi nu ule'eshiyi aza a Isra'ila hali a'wan ushin.

4 Debora ka va Lapido, vumava̱sula̱ a̱yi ɗa u shi za vu uge'etosu va aza a Isra'ila a mantsa mo ndolo. 5 U tsu da̱nusu ta̱ e ikyun yu Ushuwa wa̱ Debora e memere ma Rama na̱ Betel e iɗa ya agaɗi ya Ifiramu, reve aza a Isra'ila a gawan a̱ 'ya̱wa̱ uba̱ta̱ wa̱ yi ɗe adama o uge'etosu. 6 Reve u zuwa e ɗe Barak ulobo wa Abinowam diga a̱ lyuci va Kedesh a̱tsuma̱ e iɗa ya Nafutali, reve u damma yi, <<A̱sulazuva A̱sula̱ a aza a Isra'ila a damma wu ta̱, <'Ya̱wa̱, vu tara ali ukpakukupa kupa (10,000) o ugundo wa Nafutali na̱ Zebulun, vu rono le aɗanga a̱ tyo a Masasan ma Tabo. 7 A̱mu n to rono Sisera yali ya̱ a̱soja a Jabin ugbozu, oɓolo ni ikeke yi ido ya̱ yi na̱ a̱za̱ o uvon a̱ yi, a̱ tyo o Uɗolu wa̱ Kishon. N ta̱ gba aa ca wu a̱yi e ekere a̱ wu.> >>

8 Reve Barak damma yi, <<Na̱ va̱a̱ 'ya̱wa̱ oɓolo na̱ a̱mu, n ta̱ 'ya̱wa̱, agba na̱ va̱a̱ 'ya̱wa̱ oɓolo na̱ a̱mu shi, ma̱a̱ 'ya̱wa̱ shi.>>

9 Reve Debora damma, <<U yuwan ta̱, n ta̱ 'ya̱wa̱ oɓolo na̱ a̱vu. Agba tsugbain tsu mmalu tsa nda tsoo o'wo za va̱ wu shi, adama a na A̱sulazuva a ta zuwa Sisera e ekere a ka.>> Reve Debora 'yon a̱vu u 'ya̱wa̱ oɓolo na̱ Barak a̱ tyo Kedesh. 10 A̱vu Barak ɗe ugundo wa̱ Zebulun na̱ za va Nafutali a̱ tyo Kedesh. Reve ama ukpakukupa kupa (10,000) o toni yi, reve fo Debora 'ya̱wa̱ oɓolo na̱ a̱yi.

11 Heba gba za va Keni wu kasa ta̱ ɗe na aza a Keni, umatsun wa̱ Hoba a̱sha̱wa̱le Musa, reve u shuwa̱ oogodo a̱ yi zuzu nu uɗanga wo Oku a̱tsuma̱ a Za'ananim za na ri zuzu na̱ Kedesh.

12 Ana a dammai Sisera a na Barak ulobo wa Abinowam u ka̱ra̱ ta̱ a gawan a Masasan ma Tabo, 13 a̱vu u ɓoloto ikeke yi ido yi irumu ya̱ yi suru ukpaku kucci (900) na ali o uvon a na a̱ ri oɓolo na̱ a̱yi suru, diga Haroshet vu Nɗa a̱ tyo o Uɗolu wa̱ Kishon.

14 A̱vu Debora damma Barak, <<'Yon! Apa urana u na A̱sulazuva a cayi Sisera e ekere a̱ wu. Na amayun A̱sulazuva a̱ ta̱ elime a̱ wu.>> Ɗaɗa Barak cipa̱i a Masasan ma Tabo, reve ama ukpakukupa kupa (10,000) o toni. 15 Ana Barak remei uvon na̱ matsun me pe'eni ma̱ yi, reve A̱sulazuva a zuwa Sisera ra̱pula̱ ni ikeke yi ido ya̱ yi na ali o uvon a̱ yi suru. Reve Sisera cipa̱ e ikeke vi ido ya̱ yi reve u suma. 16 A̱vu Barak saɓa ikeke yi ido oɓolo na ali o uvon a̱ yi hali a̱ tyo Haroshet vu Nɗa. A̱vu o una ali o uvon a Sisera suru. Ko vuma ta̱ la'a shi.

17 Amma Sisera suma ta̱ a̱ tyo o oogodo a Jaye, ka va Heba za va Keni, adama a na Jabin mogono ma Hazo na̱ limatan va Heba za va Keni a̱ da̱na̱ ta̱ a muwwulai.

18 A̱vu Jaye uta̱ u raba Sisera a̱vu u damma yi, <<Uwa, zagbain va̱, uwa o oogodo a̱ va̱. She vu uwwa wovon wan.>> Ɗaɗa u uwai o oogodo a̱ yi, a̱vu wu pala yi nu umuna.

19 Reve Sisera damma yi, <<N ta uwwusa akuli, yuwan ankuri ne'e mu mini ke'en n sowo.>> A̱vu Jaye kpa̱tu'wa̱ tsa̱n vu ukwan maani, a̱vu u ca yi u sowo, a̱vu wu palisa yi waru.

20 Reve Sisera damma yi, <<Vi isawan o una̱ntsu wo oogodo'o, na̱ vuma ro ta̱wa̱ we ece wu, <Za ta̱ pa?> Vu usu yi, <O'o.> >>

21 Amma Jaye ka va Heba tara ta̱ rumu ma̱shuwa̱ mo oogodo, a̱vu u tara ma̱ka̱ta̱. Reve u 'ya̱wa̱ ya̱'a̱ yi ben a̱yi nven a nlavu cina u kuna̱ ɗe a̱bunda̱ lon. Reve u vara na̱ rumu ma̱shuwa̱ mo oogodo'o e kengi vu utsuvu va̱ yi hali wu urulai a̱ tyo e iɗa, ɗaɗa gba u kuwa̱i.

22 Barak gba o tono Sisera, a̱vu Jaye uta̱ u raba yi. A̱vu u damma, <<Ta̱wa̱, n to roco wu vuma na vu ri e izami.>> A̱vu Barak uwa o oogodo a̱ yi, she nlo gba Sisera nven uvaru na̱ ili i ma̱shuwa̱ mo oogodo e kengi vu utsuvu va̱ yi ukwa̱!

23 O urana u ndolo u ɗa A̱sula̱ a cayi aza a Isra'ila ulyuwu wa aci a Jabin mogono ma Ka'ana nu uvon. 24 Reve aza a Isra'ila a̱ da̱shishi ucira, reve o ɓongishi Jabin mogono ma Ka'ana, hali she ana o kototo niyi.