1 *A̱tsuma̱ a rana ndeɗe a̱ da̱na̱ na̱ mogono a̱tsuma̱ a Isra'ila shi. A̱tsuma̱ a rana'a ugundo wa Dan u zamishi ta̱ uba̱ta̱ wu nden adama a aciyele, adama a na hali a mantsa'a koto a̱ tsura̱ uba̱ta̱ wa agadu a̱tsuma̱ o gundo va aza a Isra'ila shi. 2 Reve ama a Dan a̱ lyungu ama o ton diga o ugundo u le diga a̱tyo e iɗa i le aza a na a gurai uvon diga Zora waru diga Eshitawo a tawa utyo wi iɗa'a, a̱vu a̱ ka̱lyuwa̱ yi. A̱vu a damma le, <<'Ya̱wa̱i i ka̱lyuwa̱ iɗa'a.>> Ana ali o uvo'on a rawai e iɗa ya agaɗi ya Ifiramu, a̱vu a uwa o u'wa wa Mika a asa pe. 3 Ana a rawai zuzu nu u'wa wa Mika, a gura ta̱ reve uɗyo wu ulobo wu ugundo wa̱ Levi'i. A̱vu a̱ 'ya̱wa̱ ya̱'a̱ yi, a̱vu e ece yi, <<Zane ɗa ta̱wa̱to nuwu pa? Nye vaa yuwusan pa uba̱ta̱ u nda? Ulinga wu nye i ɗa vaa yuwusan pa?>>

4 Reve u damma le ili i na Mika yuwaan niyi, u damma, <<U tara mu ta̱ ulinga waru a̱mu ganu va̱ yi ɗa.>>

5 A̱vu a damma yi, <<Vu yuwan ankuri ve ece A̱sula̱, adama tsu tsura̱ urevu ko mmalu n na tsu cigai tsu 'ya̱wa̱ tsu ta lyuwa aci.>>

6 Reve ganu'u u damma le, <<Walai no okolo nden, A̱sulazuva a̱ ta̱ oɓolo na̱ ɗu.>>

7 A̱vu ama o to'on e reme ure, a̱vu a̱ ta̱wa̱ Layish, uba̱ta̱ u na a cinai ama a̱ ri nden gbaga, cine vu revei aza a Sidon a yuwusan wuma u le asuvu nden a̱ nden gbaga. Agba ko ili i ta̱ a lamba a̱tsuma̱ a̱ nden mu uvaɗi n le shi, a̱ ta̱ nu utsuru. Waru a̱ da̱na̱ ta̱ alanga na aza a Sidon waru a̱ ri a muwwulai no ozo o ro shi.

8 Ana a̱ ta̱wa̱i uba̱ta̱ wa̱ a̱za̱ a̱ le ɗe Zora na̱ Eshitawo, ɗaɗa a̱za̱ le a̱ tsu damma le, <<Cine tsa ɗa i cinai ili'i?>>

9 Reve a damma, <<'Yoyin tsu riya̱a̱ nle nu uvon! Tse ene ta̱ ɗe iɗa'a, waru na a amayun u ta̱ ulobonu lon. A̱ɗu yaa yuwan ili i ro shi? She i lungusa̱ mantsa na ya̱a̱ 'ya̱wa̱ i uwa i usa iɗa'a wo o'wo za ɗu wan. 10 A mantsa ma na i rawai ɗe i ta cina ama a yuwusan nden gbaga. Iɗa i ta̱ mgbain, waru A̱sula̱ a ca ta̱ ɗe iɗa'a e ekere a̱ ɗu, uba̱ta̱ u ɗa u na u lambai ili shi a̱tsuma̱ o uvaɗi.>>

11 A̱vu ama ukpakuta̱li (600) diga o ugundo wa Dan o foɓo ni itana yu uvon, a lyawa Zora na̱ Eshitawo. 12 Reve a̱ ka̱ra̱ a gawan a̱ va̱la̱ a̱livu a Kiriyat Jeyarim a̱tsuma̱ a Yahuda. Adama o ndolo a̱ tsu ɗe uba̱ta̱'a̱ Mahane Dan, a na uva̱la̱ta̱ wa Dan, hali a̱ tyo ana'an. 13 Diga lo reve a̱ ka̱ra̱la̱i ni iɗa ya aagaɗi ya Ifiramu, a̱vu a̱ ta̱wa̱ o u'wa wa Mika.

14 Reve ama o ton a na a̱ 'ya̱wa̱i a tawa utyo wi iɗa ya Layish a damma a̱za̱ e le, <<Ko i reve ta̱ a na a̱tsuma̱ a 'wa nda a̱ ta̱ pe na̱ epo nu u'wa wa̱ a̱ma̱li na̱ she'en oroci a̱ ma̱sula̱ n na a surai na̱ azurufa? Gogo she i reve ili i na yaa yuwan.>> 15 A̱vu a ɓatsa a uwa a̱tsuma̱ o u'wa wu ulobo za va̱ Levi za na ri uba̱ta̱ wa Mika'a reve a̱ ca̱sa̱ yi. 16 Ama ukpakuta̱li (600) diga o ugundo wa Dan, ufoɓu ni itana yu uvon i le, a̱vu e isawan o u'uwata wu una̱ntsu. 17 A̱vu ama o ton a na a̱ 'ya̱wa̱i matawa mo utyo wi iɗa'a a uwa pe, a̱vu a tara oroci a na e she'ei'in za na a surai na̱ azurufa na̱ a̱ma̱li na̱ epo. A̱yi gba ganu a̱vu wi isawan o u'uwata wu una̱ntsu oɓolo na ali o uvon ukpakuta̱li (600) ufoɓu ni itana yu uvon.

18 Ana ama a nda a̱ 'ya̱wa̱i o u'wa wa Mika a tarai oroci a na e she'ein i na a surai na̱ azurufa na̱ a̱ma̱li na̱ epo, a̱vu ganu damma le, <<Nye i ɗa yaa yuwusan?>>

19 A̱vu a damma yi, <<Vu ɓa̱ru una̱ wa̱ wu! She vu yuwan adanshi wan. Vu ta̱wa̱ oɓolo na̱ a̱tsu a̱vu vo o'wo dada e ekere a̱ tsu na̱ ganu tsu. Waa la'aa wu vu yuwaan ugundo nu umatsun wa aza a Isra'ila ulinga u tsuganu, a na vo o'wo ganu vu u'wa u ta̱ shi?>> 20 A̱vu ganu'u u yuwan ma̱za̱nga̱. Reve u tara epo na̱ a̱ma̱li no oroci a na e she'ein u ka̱ra̱ oɓolo na ama'a. 21 Reve a vadala e reme mmalu n le oɓolo na̱ muwun n le ni iliyamunga i le oɓolo nu utsuru u le elime.

22 Ana ama diga o ugundo wa Dan a̱ ka̱ra̱i alanga a lyawai u'wa wa Mika, a̱vu Mika ɓoloto aza a na a̱ ri nden zuzu nu u'wa wa̱ yi suru, reve a saɓa le. 23 Reve a̱ 'ya̱sa̱n uɗyo u le e ɗe aza a Dan, a̱vu gba aza a Dan a vadala a̱vu e ece Mika, <<Nye ya̱ ɓa̱la̱ wu, a na vu ɓolotoi ama a̱ a̱bunda̱ a nda?>>

24 Reve u usu, <<I tara ta̱ musula̱ n na n yuwain, oɓolo na̱ ganu va̱, a̱vu i ka̱ra̱ ne ele. Ili i ne i ɗa waru m buwai ne ele? Cine tsa ɗa ye ece, <Nye ya̱ ɓa̱la̱ wu?> >>

25 Reve aza a Dan a̱ usu yi, <<She tsu da̱shi uwwa uɗyo wa̱ wu wan, na̱ ne ɗa shi aza a na a̱ ri na asuvu usuɗuwu a̱ ta̱ riya̱a̱ wu nu uvon, reve, a̱vu vu lamba wuma wa̱ wu na̱ wuma wa̱ a̱za̱ o u'wa wa̱ wu fo.>> 26 Ɗaɗa aza a Dan a saɓai ure u le. Ana Mika enei a la'a yi ta̱ ucira lon, a̱vu u vadala u ka̱mba̱ o u'wa wa̱ yi.

27 Amma a aza a Dan a tara ta̱ i ili i na Mika yuwain, oɓolo na̱ ganu va̱ yi, a̱vu a̱ ka̱ra̱ a̱ tyo Layish uba̱ta̱ wa ama a na aa yuwusan wuma u le asuvu nden a̱ nden gbaga, a̱vu a̱ riya̱a̱ le nu uvon na̱ matsun me pe'eni a̱vu waru a̱ kula̱to lyuci'i. 28 Waru babu vuma na aa gura wawa le adama a na a̱ ta̱ alanga na̱ Sidon, waru a̱ ri a muwwulai no ozo o ro shi. Lyuci'i u da̱na̱ ta̱ o uka̱ri wa Bet Reho.

Ɗaɗa a suwisai lyuci'i a̱vu a̱ da̱nu pe. 29 Ɗaɗa a cayi lyuci'i aala Dan o una̱ wa akaya e le Dan, za na a matsayin Isra'ila, ko na wo o'woi a̱ shi ta̱ a̱ tsu ɗe lyuci'i Layish nu ufaru. 30 A̱vu aza a Dan a̱ shuwa̱a̱ aciyele oroci o ushe'e'en, a̱vu Jonata ulobo wa Gashum, ulobo wa Musa, no olobo a̱ yi a̱ da̱na̱ nan ganu e ekere o ugundo wa a aza a Dan hali mantsa ma na a̱ pura̱i nle a̱ tyo uba̱ta̱ u tsugbashi. 31 A̱vu a̱ shuwa̱ oroci e she'en na Mika yuwain, hali a mantsa ma na suru u'wa wa̱ A̱sula̱ u da̱na̱i ɗe Shilo.