1 Reve aza a Ifiramu ece Gidiyon, <<Nye i zuwai vu yuwan ntsu tsunda? Nye i zuwai vu ɗe ntsu a na va̱a̱ 'ya̱wa̱ uvon na aza a Midiya shi?>> A̱vu a yuwan mawasan ma̱ a̱bunda̱ na̱ a̱yi.

2 Reve gba u usu le, <<Ili i ne i ɗa n yuwain ana a kurato na̱ za na i yuwain? U'yanlu wa Ifiramu wu umatsun ina̱bi u la'a ugasa wu umatsun ina̱bi va amayun wu umatsun u ke'en wa Abiyeza shi? 3 A̱sula̱ a ca ta̱ ɗe Ore na̱ Zeye azagbain a Midiya e ekere a̱ ɗu. Ili i ne i ɗa n gura yuwain ana a kurato na̱ za na i yuwain?>> Ana u yuwain adanshi o ndolo, a̱vu upan u le a aci a̱ yi u von.

4 A̱vu Gidiyon oɓolo na ali o uvon a̱ yi ukpakuta'atsu (300) a lyuwa elime na̱ masaɓa ma n'yuwatan n le ko na a̱ shi a̱ kuna̱i ɗe, a̱vu a̱ rawa Uɗolu wa̱ Urudu a̱vu a pasa yi. 5 A̱vu u damma ama a Suko, <<Yuwain ankuri, cayi ali o uvon a̱ va̱ ilyalya, adama a na a̱ ta̱ ukunu, a̱yi ɗa nda m buwa ta̱ e itoni ya Zeba na̱ Zalumuna, ngono ma Midiya.>>

6 Amma a̱vu azagbain a Suko a damma, <<Koto vu reme Zeba na̱ Zalumuna e ekere a̱ wu ne'en shi, cine tsa ɗa tsaa ca ali o uvon a̱ wu ilyalya?>>

7 A̱vu Gidiyon usu, <<To, mantsa ma na A̱sulazuva a cayi Zeba na̱ Zalumuna e ekere a̱ va̱, n ta̱ ta̱wa̱ m ɓuɓatsa lipu ɗu na awanda o una.>>

8 Diga lo a̱vu u ka̱ra̱ a̱ tyo Penuwe, a̱vu u yuwan adanshi ne ele cine u yuwain ɗe, a̱vu gba aza a Penuwe a̱ usu yi cine ama a Suko a̱ usu niyi. 9 A̱vu u damma aza a Penuwe, <<Na̱ n ka̱mba̱ waru nu ulyuwu wa aci, n to ɓoso aatsura a nda.>>

10 Gogo Zeba oɓolo na̱ Zalumuna a̱ da̱na̱ ta̱ Karko oɓolo na̱ ali o uvon e le, ukpakukupa kupa nu ukpakukupa uton (15,000), aza a na a buwai suru a̱tsuma̱ a ali o uvon diga asana. Ele ɗa ukpakukupa ukpaku nu ukpakukupa ushin (120,000) aza a na o unai ɗe na̱ matsun me pe'eni. 11 Ɗaɗa Gidiyon tsu toni nu ure u na u toniyi nu ure wa aza a aguɓa, za na ri asana a Noba na̱ Yogbeha, a̱vu u ta̱wa̱a̱ a̱soja a Midiya nu uvon babu ele ufoɓu. 12 Zeba na̱ Zalumuna ngono n re ma Midiya a suma ta̱, ɗaɗa gba u toni nle a̱vu u reme le. A̱vu u zuwa a̱soja suru a uwwa wovon.

13 A̱vu Gidiyon ulobo wa Jowash u ka̱mba̱ diga ɗe uba̱ta̱ wu uvon nu ugawun wu ure wa Here. 14 A̱vu u reme molobo mo Suko a̱vu u yuwan yi yeci. A̱vu molobo'o ma ɗanaa yi ala a azagbain na̱ mbara ma Suko, ama kupocindere na̱ a̱za̱ e cindere. 15 A̱vu u ta̱wa̱ uba̱ta̱ wa ama o Suko reve u damma le, <<To, apa Zeba na̱ Zalumuna aza a na i yuwaan numu ulamu adama e le, adansa, <Koto vu reme Zeba na̱ Zalumuna e ekere a̱ wu ne'en shi, cine tsa ɗa tsaa ca ali a̱ wu a na a̱ ri ukunu ilyalya?> >> 16 A̱vu Gidiyon tara mbara n lyuci'i a̱vu u ca le a̱tsuma̱lima̱ na awanda o una. 17 A̱vu wu ɓoso atsura a Penuwe a̱vu wu una ama a̱ lyuci'i.

18 A̱vu we ece Zeba na̱ Zalumuna, <<Cu'un va ama a̱ ne ɗa yu unai ɗe Tabo?>>

Reve a̱ usu, <<Ama icu'un ya̱ wu. Suru nle o rotso ta̱ muwun mu ngono.>>

19 Reve Gidiyon usu, <<Ele muwun ma̱ a̱na̱wun n va̱ n ɗa, muwun ma mma va̱ n ɗa! N kucina ta̱ na̱ A̱sulazuva a na a̱ ri wuma, na̱ shi yu una le shi, n shi o una ɗu fo shi.>> 20 A̱vu u damma Jete, mawun mo ufaru ma̱ yi, <<Una le!>> Amma u tala matsun me pe'eni ma̱ yi shi adama a na u buwai mawun waru u da̱na̱ ta̱ a uwwusa wovon.

21 A̱vu Zeba na̱ Zalumuna a damma, <<Ta̱wa̱, vu una tsu na aciya̱wu. Adama a na she na̱ vuma rawa vali ɗaɗa waa yuwan ulinga u vali.>> A̱vu Gidiyon 'yon a̱vu wu una le, a̱vu u ba̱ɗa̱ itana i sa'ani yi ikebe a̱ yinlu ya arakumi e le.

22 A̱vu aza a Isra'ila a damma Gidiyon, <<Vu yuwan tsugbain a aci a̱ tsu, a̱vu nu ulobo wa̱ wu na̱ mawun ma tsukaya ma̱ wu mo ulobo adama a na vu wawa ntsu e ekere aza a Midiya.>>

23 Amma a̱vu Gidiyon damma le, <<Maa yuwan tsugbain a aci a̱ ɗu shi, ko ulobo u va̱ shi. A̱sulazuva a ɗa a yuwan tsugbain a aci a̱ ɗu.>> 24 A̱vu u lyuwa elime na adanshi u damma, <<N ta̱ ni ipati e ekere a̱ ɗu, suru nɗu i ca mu iliyatsuvu i ta̱ ta̱ a̱tsuma̱ e ili i na i pura̱i uba̱ta̱ wu uvon.>> Adama a na aza a Midiya aza a Isma'ila a ɗa, waru agadu a aza Isma'ila a ɗa u'otosu wi iliyatsuvu i zinariya.

25 Reve a̱ usu, <<Tsu ta ca wu ele na̱ ma̱za̱nga̱!>> A̱vu o polo a̱tugu e iɗa, a̱vu vuma suru vari ɗe iliyatsuvu a̱tsuma̱ e ili i na a̱ pura̱i uba̱ta̱ wu uvon. 26 Ume wi iliyatsuvu i zinariya i na Gidiyon patiyi u ta rawa kilo ushin, babu ni itana i sa'ani yi ikebe, oɓolo ni iliyinlu, na̱ amuna a na a yuwain na̱ mini ma̱ ma̱ɗiya̱ aza a na ngono ma Midiya mo otosu, ni iliyinlu i na o otosu arakumi a̱ yinlu. 27 Ɗaɗa gba Gidiyon yuwain a̱a̱ma̱li a zinariya, a̱vu u zuwa yi a Ofura, a̱ lyuci va̱ yi. A̱vu ama Isra'ila suru a yuwan tsushakala o ure u na a yuwusain a̱a̱ma̱li o ndolo a̱ga̱nda̱. Ili i ndolo yo o'wo ta̱ maza a̱ tyo ya Gidiyon nu umatsun wa̱ yi.

28 Ne ɗa aza a Isra'ila a lyuwai aci a aza a Midiya, adama o ndolo a̱ da̱shi zami le adanshi waru shi. A mantsa ma wuma wa Gidiyon iɗa'a yi ivuwan ta̱ nu uvon hali a'wan amunga.

29 Reve Jeruba'al za na a̱yi ɗa Gidiyon ulobo wa̱ Jowash u ka̱mba̱ o u'wa wa̱ yi na̱ nden. 30 Gidiyon da̱na̱ ta̱ no olobo kupocindere aza a aciya̱yi, adama a na u da̱na̱i na̱ a̱ma̱ci a̱ a̱bunda̱. 31 Ka vu nge'en va̱ yi za na da̱na̱i Shekem, u matsaan yi ta̱ fo ulobo, za na Gidiyon cayi aala Abimele. 32 A̱vu Gidiyon ulobo wa̱ Jowash kuwa̱ cina u kutsa lon a̱vu a̱ ciɗo yi a aason a̱ Jowash dada va̱ yi, ɗe Ofura va aza a Abiyeza.

33 A jima shi ana Gidiyon kuwa̱i, a̱vu aza a Isra'ila a̱ ka̱mbisa̱ a yuwusan tsushakala a yuwusaan a̱ma̱li a Ba'al a̱ga̱nda̱. A̱vu a̱ ka̱mba̱to Ba'al Beri* ma̱sula̱ me ele. 34 Reve e icina na̱ A̱sulazuva A̱sula̱ e le, za na wawa nle e ekere a n'yuwatan n le suru, aza a na a̱ ri uka̱nda̱ruwu ne ele. 35 A̱vu waru a̱ kuɗa̱ o roco u'wa wa Jeruba'al za na a̱yi ɗa Gidiyon isa'ani ya amayun, suru ni isa'ani i na u yuwaan nle.