1 Reve gba aza a Isra'ila a yuwisan ili i iwuya a̱ ma̱ka̱ka̱n ma̱ A̱sulazuva. Ɗaɗa A̱sulazuva a ca nle e ekere a aza a Midiya hali a'wan e cindere. 2 Reve aza a Midiya a lyuwa ucira wa aza a Isra'ila. Adama o ndolo reve aza a Isra'ila a suma a zamiya aciyele uba̱ta̱ u na a̱a̱ da̱na̱ a pa'asan a̱ a̱ba̱nu oɓolo na̱ ba̱ta̱ ro a nsasan. 3 Mantsa ma na aza a Isra'ila a yuwain ca̱'a̱n suru, reve aza a Midiya na aza a Amaleka na akapi a ama diga asana, a̱ ta̱wa̱ a fara uvon ne ele. 4 Reve a̱ va̱la̱ e iɗa'a, reve a̱ lungusa̱ ca̱'a̱n na aza a Isra'ila a̱ cu'wa̱in hali a̱ tyo Gaza. A lyawaa aza a Isra'ila ili i na aa lyuwa shi ko ke'en, ko a lyawaa le ikyon ko inan ko nloli shi. 5 Adama a na a̱ tsu ta̱wa̱ ta̱ no oɓolo e iliyamunga i le no ogodo cine vu revei oɓolo a apapari. U ri n yuwan a gura kece ama oɓolo na arakumi e le shi. A mantsa ma na suru a uwai e iɗa'a a̱ tsu lungusa̱ yi ta̱. 6 Aza a Isra'ila o o'wo ta̱ nu ulambu lon adama a aza a Midiya. Ɗaɗa e showeyin A̱sulazuva.

7 Ana aza a Isra'ila e showeyin A̱sulazuva adama aza a Midiya, 8 u lyunguwa̱ ta̱ aza a Isra'ila na̱ vumava̱sula̱. Reve u damma le, <<Apa ili i na A̱sulazuva A̱sula̱ a Isra'ila, a dammai: Mu uta̱a̱ ɗu ta̱ diga e iɗa ya Masar, e iɗa i tsugbashi. 9 N wawa ɗu ta̱ e ekere aza a Masar ne ekere aza a na a̱ shi a tsugba nɗu suru, a̱vu n lo le a̱ ma̱ka̱ka̱n ma̱ ɗu, a̱vu n ca ɗu iɗa i le. 10 A̱vu n damma ɗu, <A̱mu ɗa A̱sulazuva A̱sula̱ a̱ ɗu. She i yuwaan musula̱ ma aza a Amoriya a̱ga̱nda̱ aza a na i ri nden e iɗa i le wan.> Amma i zuwaa mu atsuvu shi.>>

11 A̱vu malingata ma̱ A̱sulazuva ma̱ ta̱wa̱ ma̱ da̱nu e ikyun yu uɗanga u gbain wa̱ Jowash za va Abiyeza a̱tsuma̱ a Ofura. A mantsa mo ndolo Gidiyon ulobo wa̱ Jowash u da̱na̱ ta̱ a fabusa oroci a yitabo uba̱ta̱ u na o kpokuso masayan ma̱ ina̱bi adama u sokoo aza a Midiya. 12 Reve malingata ma̱ A̱sulazuva ma̱ roco aciya̱yi ya Gidiyon reve u damma yi, <<A̱sulazuva o to oɓolo na̱ a̱vu, a̱vu vuma gbain ɗa na gurai uvon.>>

13 Reve Gidiyon usu yi, <<Yuwan ankuri, zagbain va̱, na̱ A̱sulazuva a̱ ri oɓolo na̱ a̱tsu, cine tsu ri na addama a̱ a̱bunda̱? Te ɗa suru ili ya asalama i na nkaya n tsu n damma ntsu? A damma tsu ta̱ cine A̱sulazuva o uta̱a̱ nle a̱tsuma̱ e iɗa ya Masar. A̱yi ɗa nda gba gogo u vari ntsu, reve u ca tsu e ekere a aza a Midiya.>>

14 Reve A̱sulazuva a vadala uba̱ta̱ wa̱ yi reve u damma, <<'Ya̱wa̱ a̱tsuma̱ o ucira u na n ca nuwu, tsa̱ra̱ vu wawa aza a Isra'ila e ekere a aza a Midiya. A̱mu ɗa ma̱a̱ lyungusu wu shi?>>

15 Reve Gidiyon usu yi, <<Yuwan ankuri, zagbain va̱, cine maa wawa aza a Isra'ila? Umatsun u tsu ele ɗa a̱ ri babu ucira suru suru a̱tsuma̱ o ugundo wa Manase, waru ka̱lyuwa̱ a̱mu ɗa mawun a̱tsuma̱ o u'wa u tsu.>>

16 Reve A̱sulazuva a̱ usu, <<Na amayun n ta̱ da̱na̱ oɓolo na̱ a̱vu, vu to kototo aza a Midiya suru, she damma vuma ta̱ ɗa.>>

17 Reve Gidiyon damma yi, <<Na̱ n tsura̱ isa'ani e ekere a̱ wu gogo, to, vu roco mu iroci a na a̱vu ɗa na amayun vu yuwain adanshi na̱ a̱mu. 18 Yuwan ankuri she vu ka̱ra̱ wan, she na̱ n ta̱wa̱ na̱ kucci va̱, a̱vu n zuwa yi a̱ ma̱ka̱ka̱n ma̱ wu.>>

Reve A̱sulazuva a damma, <<N to puro wu hali vu ka̱mba̱.>> 19 A̱vu Gidiyon ka̱mba̱ o u'wa, a̱vu u foɓo meggbele, a̱vu waru u yuwan opopofu a na a̱ ri na̱ wolilo shi a yira i lashi makundatsu kupa ne ejere. Reve u zuwa inama a asaka na̱ mayan o upondo, reve wu uta̱ ne ele reve u ca malingata'a kucci le e ikyun yu uɗanga u gbain.

20 A̱vu malingata'a ma damma yi, <<Vu tara inama'a oɓolo no opopofu a na a̱ ri na̱ wolilo shi, a̱vu vu zuwa le a aatali a nda, a̱vu vu tsuwa̱n le mayan.>> A̱vu u yuwan tsu ndolo. 21 A̱vu malingata ma̱ A̱sulazuva ma canana aaɗanga a mmalu a na a̱ da̱na̱i o ukere wa̱ yi, a̱vu u ju'wa̱n inama'a no opopofu a na a̱ ri na̱ wolilo shi na̱ combo va aaɗanga'a. A̱vu akina o uta̱ ɗe a aatali'i u kula̱to inama'a oɓolo na opopofu'u suru. A̱vu malingata ma̱ A̱sulazuva ma̱ puwa̱n yi. 22 Ana Gidiyon ta̱wa̱ revei a na malingata ma̱ A̱sulazuva ma ɗa, a̱vu u saala, <<A̱sulazuva Zagbain! Wawawa! Me ene ta̱ malingata ma̱ A̱sulazuva esu ne esu!>>

23 Ɗaɗa A̱sulazuva a damma niyi, <<Vu da̱na̱ na asuvu nden! She vu uwwa wovon wan. Va̱a̱ kuwa̱ shi.>>

24 Ɗaɗa Gidiyon suwayi A̱sulazuva masa'a lo, a̱vu u ɗe yi A̱sulazuva a ɗa Asuvu Nden. Hali na ana'an ne ɗa u ri, masa'a'a ma̱ ta̱ lo a Ofura va aza a Abiyeza.

25 A̱tsuma̱ a ayin o ndolo a ɗa A̱sulazuva a dammai Gidiyon, <<Vu tara oogono a nan e ire a̱tsuma̱ o oɓolo a dada va̱ wu, za na rawai a'wan e cindere. Vu varu musa'a ma Ba'al aza a dada va̱ wu, reve waru vu gasa a̱a̱shuwutsu a̱ a̱ma̱li a ka Ashera za na ri zuzu na̱ a̱yi. 26 Reve vu suwa masa'a ma̱ A̱sulazuva A̱sula̱ a̱ wu zuva va aganga a nda, na atali ugeru cine wu ntsayi. Vu tara oogono a nan e ire reve vu yuwaan kucci vu ukula̱tosu na̱ a̱yi na̱ ɗanga va̱ a̱a̱shuwutsu a Ashera a na vu gasai.>>

27 Gidiyon tara ta̱ ama kupa a̱tsuma̱ a agbashi a̱ yi, a̱vu u yuwan cine A̱sulazuva a damma niyi. Amma adama a na waa uwwusa wovon wa̱ a̱za̱ a̱ yi oɓolo na ama a̱ lyuci'i, u yuwan nu urana shi, she na ayin.

28 Ana ama a̱ lyuci'i a juwain na̱ wasasa, a̱vu a cina a̱yi ɗa nda gba o ɓosoi masa'a ma Ba'al! Reve o koɗo a̱a̱shuwutsu a Ashera a na a̱ da̱na̱i zuzu na̱ a̱yi, ɗaɗa a cayi kucci vo oogono e ire a masa'a ma sa'avu ma na a suwai.

29 A̱vu e ecelei, <<Zane ɗa yuwain ulinga u nda?>> Ana a zamiyi ben, ɗaɗa a damma nle, <<Gidiyon ulobo wa Jowash ɗa za vu ulinga'a.>>

30 A̱vu a̱za̱ a̱ lyuci'i a damma Jowash, <<Uta̱a̱ nu ulobo wa̱ wu tsa̱ra̱ tsu una yi, adama a na wu mura ta̱ masa'a ma Ba'al reve wu koɗo a̱a̱shuwutsu a Ashera a na a̱ ri zuzu na̱ a̱yi.>>

31 Amma Jowash damma ta̱ aza a na a cigai a yuwan nla̱ngi na̱ a̱yi suru, <<I ta̱ usuwa̱ Ba'al? Ko i ta wawa yi? Za na suru usuwa̱ niyi a̱ to una yi nu usana. Na̱ a̱yi ma̱sula̱ ma ɗa na amayun, lyawa u yuwaan aciya̱yi nla̱ngi, adama a na a murai masa'a ma̱ yi.>> 32 O urana u ndolo u ɗa e ɗeyi Gidiyon Jeruba'al, a na, <<Lyawa Ba'al yuwaan aciya̱yi nla̱ngi,>> adama a na wu ɓosoi masa'a ma Ba'al.

33 Ana ili i ndolo i kotoi, reve aza a Midiya suru, oɓolo na aza a Amaleka, na akapi a ama diga asana o ɓoloto, reve a pasa Uɗolu wa̱ Urudu reve a̱ va̱la̱ o Uka̱ri wa Yezireyel. 34 Reve Ruhu va̱ A̱sulazuva cipa̱a̱ Gidiyon nu ucira, ɗaɗa wi ivula̱i aavana tsa̱ ɗesu adama o uvon, ɗaɗa ali o umatsun wa Abiyeza a̱ ta̱wa̱i ya̱'a̱ yi. 35 Reve u lyungu nlingata a̱ tyo uba̱ta̱ wa ama a Manase suru, e ɗesu le ta̱ a̱vu o ɓoloto o toni yi. Reve waru u lyungu nlingata a̱ 'ya̱wa̱ uba̱ta̱ wa ama a Asha na̱ Zebulun na̱ Nafutali. Reve fo a̱ 'ya̱wa̱ tsa̱ra̱ a ga'an na̱ a̱yi.

36 Reve Gidiyon damma A̱sula̱, <<Na amayun a ɗa vu ta wawa aza a Isra'ila nu ukere u va̱ cine vu yuwain nzuwulai, 37 gogo n to polo ukwan wu kyon o osoroto. Nu usana u tawa, na̱ n cina a'iza o ukwan goon, iɗa waru u'yewu, ɗaɗa mee reve a na vu ta wawa aza a Isra'ila nu ukere u va̱ cine vu dammai.>> 38 Ne ɗa ili'i i farai. Ana Gidiyon 'yoyin na̱ wasasa, reve u kpoko ukwa'an reve yanda'a i shiwan na̱ mini'i.

39 Reve Gidiyon damma A̱sula̱, <<Yuwan ankuri, she vu yuwan upan na̱ a̱mu wan. Vu lyawa mu n da̱shi pati uta̱ goon. Lyawa n da̱shi rito nu ukwa'an. Gogo lyawa ukwa'an u da̱na̱ u'yewu reve iɗa'a i da̱na̱ ure'u na a'iza ma̱ɓula̱ ma̱ yi.>> 40 Na ayin o ndolo, reve A̱sula̱ a yuwan cine Gidiyon patiyi. Ukwa'an goon u da̱na̱ ta̱ u'yewu, iɗa'a gba ma̱ɓula̱ ma̱ yi ure'u na a'iza.