1 Ana Abimele kuwa̱i, Tola ulobo wa Puwa, ulobo wo Dodo za vu ugundo wa Isaka, 'yon ta̱ adama u wawa aza a Isra'ila. U da̱na̱ ta̱ a̱tsuma̱ a Shami o upasu wi iɗa ya agaɗi ya Ifiramu. 2 U yuwan ta̱ tsugbain tsa aza a Isra'ila a'wan ushin na aza a ta'atsu. Reve u kuwa̱ ɗaɗa a̱ ciɗo niyi a̱tsuma̱ a Shami.

3 A̱ca̱pa̱ a̱ yi a̱vu Jayi vuma va Giliyadu 'yon, a̱yi fo u yuwan ta̱ tsugbain tsa aza a Isra'ila a'wan ushin ne ejere. 4 U da̱na̱ ta̱ no olobo mata'atsu aza a na a kumbusa nloli mata'atsu. A yuwan ta̱ tsugbain tsi ilyuci mata'atsu a̱tsuma̱ o upasu wa Giliyadu, aza a na hali na ana'an a̱ tsu ɗe Havot Jayi. 5 Ana Jayi kuwa̱i, ɗaɗa a̱ ciɗo niyi a̱tsuma̱ a Kamon.

6 Reve aza a Isra'ila a yuwisan ili i wuya a̱ ma̱ka̱ka̱n ma̱ A̱sulazuva, reve a yuwaan a̱ma̱li Ba'al na̱ Ashitore a̱ga̱nda̱, na̱ musula̱ ma Suriya na̱ musula̱ ma Sidon na̱ musula̱ ma Mowa na̱ musula̱ ma aza a Amon, oɓolo na̱ musula̱ ma aza a Filistiya. Ne ɗa aza a Isra'ila a variyi A̱sulazuva waru a buwa a yuwusaan yi a̱ga̱nda̱ shi. 7 Reve gba A̱sulazuva a yuwan upan ne ele lon. Ɗaɗa u zuwa nle e ekere a aza a Filistiya ne ekere aza a Amon. 8 Reve e irima waru o ɓongi aza a Isra'ila a aa'wan o ndolo. O ɓongi ta̱ aza a Isra'ila hali a'wan kupa na̱ kunla̱ upasu wa asana wu Uɗolu wa̱ Urudu a̱tsuma̱ a Giliyadu, iɗa ya aza a Amoriya. 9 A̱vu aza a Amon a pasa Uɗolu wa̱ Urudu tsa̱ra̱ a yuwan uvon nu ugundo wa Yahuza na̱ Banyami na̱ Ifiramu. Aza a Isra'ila a̱ shi ta̱ a uwa a̱tsuma̱ a addama lon. 10 Reve aza a Isra'ila e showen A̱sulazuva a dansa, <<Tsu yuwaan wu ta̱ unusu, adama a na tsu lyawai A̱sula̱ a̱ tsu reve tsu yuwaan a̱ma̱li Ba'al a̱ga̱nda̱.>>

11,12 Reve A̱sulazuva a damma aza a Isra'ila, <<Ashe n wawa ɗu e ekere a aza a Masar na aza a Amoriya na aza a Amon, waru na aza a Filistiya, na aza a Sidon na aza a Amaleka na aza a Mawon, a mantsa ma na o ɓongi nɗu, ana i showen mu shi? 13 Na̱ ne suru i vari mu ta̱ a̱vu i yuwaan musula̱ n ro a̱ga̱nda̱, adama o ndolo m buwa a wawa ɗu shi. 14 'Ya̱wa̱i i showen musula̱ n na i ɗangwai, lyawa le a wawa ɗu a mantsa ma na i ri a addama!>>

15 Reve aza a Isra'ila a damma A̱sulazuva, <<Tsu yuwan ta̱ unusu, yuwan na̱ tsu ili i na ve enei u lobono ta̱. Amma ili i ta̱ i ɗa vaa yuwaan tsu vu wawa tsu ana'an.>> 16 Ɗaɗa o ocoi musula̱ mo omocin n na n ri a̱tsuma̱ e le, reve a yuwaan A̱sulazuva a̱ga̱nda̱. Ɗaɗa gba a̱tsuma̱ a̱ la̱nga̱ niyi adama a̱ a̱tsuma̱lima̱ a na aza a Isra'ila oo sowuso.

17 A̱vu aza a Amon o ɓoloto ali o uvon e le uba̱ta̱ u ta̱, a̱vu a̱ va̱la̱ Giliyadu. A̱vu aza a Isra'ila gba o ɓoloto uba̱ta̱ u ta̱, reve a̱ va̱la̱ Mizfa. 18 Reve azagbain a aza a Giliyadu a dammulai, <<Za na suru fara 'ya̱wa̱yi ama a Amon nu uvon, a̱yi ɗa woo o'wo zagbain tsu ama a Giliyadu.>>