1 A̱vu aza a Isra'ila suru diga upasu wu ugana u lyuci wa Dan a̱ tyo upasu wu uyagi u lyuci wa Biyasheba na̱ diga e iɗa ya Giliyadu o uta̱ a alanga tse elentsu a̱ ta̱ a̱vu o ɓoloto a̱ ma̱ka̱ka̱n ma̱ A̱sulazuva a̱tsuma̱ a Mizfa. 2 A̱vu azagbain a ama o gundo va a aza a Isra'ila suru o roco aciyele uba̱ta̱ wo oɓolo a ama a̱ A̱sula̱. A̱bunda̱ a̱ a̱soja a na a̱ da̱na̱i a ana ni itana yu uvon a ta rawa ama ukpakukupa ukpakuna̱shi (400,000). 3 A̱za̱ o ugundo wa Banyami a uwwa ta̱ a na aza a Isra'ila a gawan ta̱ a̱ tyo Mizfa. Reve aza a Isra'ila a damma, <<Damma ntsu cine ili i wuya i nda i farai.>>

4 Ɗaɗa Levi, vali vu ka na o unai'i, u dammai, <<A̱mu na̱ ka vu nge'en va̱ tsu ta̱wa̱ ta̱ Gibiya va Banyami tsa̱ra̱ tsaa asa. 5 Na ayin a̱vu azagbain a Gibiya o toni mu a̱vu a̱ ka̱nda̱ruwa̱ u'wa'a, azama o una mu. A̱vu o von na̱ ka vu nge'en va̱ babu ucigu wa̱ yi, reve u kuwa̱. 6 A̱vu n tara ka'a, reve mu paɗa yi apaɗi apaɗi, a̱vu n lyungu mupaɗi ma̱ yi za ta̱ ta̱ a̱ tyo upasu wa agadu wa aza a Isra'ila suru, adama a na ama a nda a yuwan ta̱ ili i wuya ni ili i wono a̱tsuma̱ a Isra'ila. 7 Gogo, lyawa aza a Isra'ila suru a ca a̱sa̱la̱ ni ili i na wu ntsayi adama a nda.>>

8 Reve ama'a suru a̱ 'yon nu uta̱ a damma, <<Babu vuma na a̱a̱ 'ya̱wa̱ o oogodo a̱ yi, ko vuma ta̱ a̱ ka̱mba̱ o u'wa wa̱ yi shi. 9 Gogo, apa ili i na tsaa yuwain na ama a Gibiya: Tsu ta zuwai agita a̱vu tsu 'ya̱wa̱a̱ nle nu uvon cine mazuwa ma agita ma dammai. 10 Tsu ta tara ama kupa kupa a̱tsuma̱ o ukpaku (100) a̱tsuma̱ o ugundo wa Isra'ila suru, ukpaku waru a̱tsuma̱ o ukpakukupa (1,000), ukpakukupa waru a̱tsuma̱ o ukpakukupa kupa (10,000), adama a̱ ta̱wa̱ ni ili i na suru a̱soja a na a̱a̱ 'ya̱wa̱ uvon a cigai. A̱vu, na a rawa Gibiya a̱tsuma̱ a Banyami, aza a Gibiya a̱ tsura̱ ili i na yi ntsaa nle adama e ili i wono i na a yuwain a̱tsuma̱ a Isra'ila.>> 11 Reve ali a Isra'ila suru o ɓoloto uba̱ta̱ u ta̱ o ɓolo aci tsa̱ra̱ a yuwan uvon na̱ lyuci'i.

12 Reve gundo va Isra'ila a̱ lyungu ama a̱ ya̱wa̱ uba̱ta̱ wu ugundo wa Banyami suru, adansa, <<Cu'un vi ili i wuya i ne i ɗa i yuwain tsunda a̱tsuma̱ a̱ ɗu? 13 Gogo uta̱yi ama a vama a Gibiya a nda a alanga tsa̱ra̱ tsu una le, tsa̱ra̱ tsu uta̱a̱ ni iwuya i nda a̱tsuma̱ a Isra'ila.>> Amma ama a Banyami a zuwaa a̱za̱ e le a Isra'ila atsuvu shi. 14 A̱vu ama a Banyami o uta̱ e ilyuci ya Gibiya nu uta̱, adama a yuwan uvon na aza a Isra'ila. 15 Aza a Banyami o ɓoloto ta̱ aza a na a gurai uvon na̱ matsun ma̱ pe'eni e ilyuci i le, ukpakukupa ushin nu ukpakuta̱li (26,000). Babu nu ukpakucindere (700) a na a ɗangulai aza a na a̱ ri nden a̱tsuma̱ a Gibiya. 16 A̱tsuma̱ a̱ a̱soja a nda suru a̱ da̱na̱ ta̱ pe na ama ukpakucindere (700) aza a na a ɗangwai a na a la'a gurai uvon nu ugula̱, a̱tsuma̱ e le suru vuma ta gura vari aatali na̱ a̱bitsutsu a̱ a̱nji agba waa nusan shi.

17 Agba ama a Isra'ila, babu na ama a Banyami a̱vu o ɓoloto a̱soja ukpakukupa ukpakuna̱shi (400,000) aza a na a̱ ri na̱ mutsun mu pe'eni, ama a nda suru aza a na a gurai uvon u ɗa.

18 A̱vu ama a Isra'ila a gawan a̱ 'ya̱wa̱ Betel reve a yuwan yeci uba̱ta̱ wa̱ A̱sula̱, <<A̱tsuma̱ a̱ tsu zane ɗa aa fara gawan a̱ 'ya̱wa̱ u yuwan uvon na ama a Banyami?>>

Reve A̱sulazuva a̱ usu, <<Yahuza ɗa aa fara 'ya̱wa̱.>>

19 Ana usana u tawai reve aza a Isra'ila a̱ 'yon a̱vu a̱ va̱la̱ zuzu na̱ Gibiya. 20 Reve aza a Isra'ila a̱ 'ya̱wa̱ adama a yuwan uvon na aza a Banyami. Reve aza a Isra'ila e gere adama o uvo'on hali a̱ tyo Gibiya. 21 A̱vu ama a Banyami o uta̱ a̱tsuma̱ a Gibiya reve o kototo aza a Isra'ila ama ukpakukupa ushin ne ejere (22,000) o urana u ndolo. 22 Reve aza a Isra'ila a calai adanshi reve waru e gerishe tsa̱ra̱ a yuwisan uvo'on cine a yuwain urana wu ufaru. 23 A̱vu aza a Isra'ila a gawan a̱ 'ya̱wa̱ a̱ ma̱ka̱ka̱n ma̱ A̱sulazuva, a̱vu a yuwan mesun hali ulivu. A̱vu a zami urevu uba̱ta̱ wa̱ A̱sulazuva, reve a damma, <<Tsu 'ya̱wisa̱ tsu yuwan uvon na ama a Banyami a̱za̱ a̱ tsu?>>

Reve A̱sulazuva a̱ usu le, <<Gawain a̱ 'ya̱wa̱ i yuwan ne ele.>>

24 A̱vu aza a Isra'ila a rawa zuzu na ama a Banyami o urana we ire. 25 A mantsa ma nda, ana aza a Banyami o uta̱i diga Gibiya adama a yuwan uvon ne ele, reve o una ama Isra'ila ukpakukupa kupa na̱ ukpakukupa kunla̱ (18,000), suru nle aza a na a gurai mutsun pe'eni ɗa.

26 A̱vu ama a Isra'ila suru, o uta̱ a̱vu a gawan a̱ tyo Betel reve a̱ da̱nu a̱ shon a̱ ma̱ka̱ka̱n ma̱ A̱sulazuva. Reve a yuwan akuli o urana u ndolo hali ulivu, reve a ca kucci vu ukula̱tosu na̱ kucci muwwulai e ekere a̱ A̱sulazuva. 27 Reve aza a Isra'ila a zami urevu uba̱ta̱ wa̱ A̱sulazuva. A rana ndolo Akpati a Nzuwulai a̱ A̱sula̱ a̱ da̱na̱ ta̱ lo. 28 Finiha ulobo wa Eliyaza, ulobo wa Haruna, u yuwusan ta̱ ulinga u tsuganu a mantsa'a. A̱vu aza a Isra'ila e ece A̱sulazuva, <<Tsu da̱shi uta̱ a gawan tsu yuwan uvon na̱ Banyami a̱za̱ a̱ tsu, ko tsu lyawa?>>

Reve A̱sulazuva a̱ usu, <<Gawain a̱ 'ya̱wa̱, adama a na nfa'an n ta ca ɗu ele e ekere a̱ ɗu.>>

29 Ɗaɗa aza a Isra'ila o foɓoi ama a vawan o ogozo a Gibiya a̱ka̱nda̱ruwa̱.✝ 30 Reve a gawan tsa̱ra̱ a yuwan uvon na aza a Banyami o urana wa ta'atsu, reve e gere adama a yuwan uvon na̱ Gibiya, cine a yuwain nu ufaru. 31 Reve aza a Banyami o uta̱ adama a ga'an ne ele. Reve o rono le alanga na̱ lyuci. A̱vu a uwa o unusa aza a Isra'ila tsu ufaru, hali ama mata'atsu a̱ kuwa̱ a agalaci no o ure u na u ri a̱ tyo Betel na̱ za na ri a̱ tyo Gibiya waru.

32 Aza a Banyami a dansa, <<Tsu to o unusa le tsu ufaru.>> Aza a Isra'ila gba a dansa, <<Lyawa tsu sumai adama tsu rono nle alanga na̱ lyuci a̱ tyo e re.>>

33 A̱vu aza a Isra'ila suru a̱ 'yon diga ba̱ta̱ na a̱ ri, a̱vu e gerishe a Ba'al Tama. A̱vu ama e le a na a̱ ri uvawun a̱livu a Gibiya o utushi. 34 Reve aza a Isra'ila a na a gurai uvon ama ukpakukupa kupa (10,000) a̱ riya̱a̱ Gibiya nu uvon. Uvon gba u suɗuwa ta̱, agba aza a Banyami e reve a na meleshe ma̱ ri zuzu ne ele shi. 35 A̱sulazuva gba a lyuwa ta̱ Banyami nu uvon a̱ ma̱ka̱ka̱n ma aza a Isra'ila. O urana u ndolo reve gba aza a Isra'ila o una ama a Banyami ukpakukupa ushin nu ukpakukupa uton nu ukpaku (25,100). Suru nle gba aza a na a gurai uvon na̱ matsun ma pe'eni n ɗa. 36 A̱vu ama a Banyami e reve na a lyuwa nle nu uvon.

Aza a Isra'ila a̱ shi ta̱ o ronusoo ama a Banyami na̱ a̱ca̱pa̱ adama a na a zuwaa ta̱ ama a na zuwai a vawan zuzu na̱ Gibiya ucira. 37 Reve ama a na a̱ shi a vawain o utushi a̱ riya̱a̱ Gibiya, a̱vu a uwa upasu biti a̱vu o una ama a na a̱ ri pe a̱ lyuci'i suru na̱ matsun me pe'eni. 38 Aza a Isra'ila a lyawulayi ta̱ na aza a na a̱ shi uvawun a na a̱ 'ya̱sa̱n mikyon lon a̱tsuma̱ a̱ lyuci'i. 39 Reve ama a Isra'ila a vadala nu uvon ana e enei mikyo'on. Aza a Banyami a̱ shi ta̱ ɗe e teme mona ma aza a Isra'ila hali a̱ shi ɗe o una ama a na a rawai mata'atsu. Reve a damma, <<Tsu ta lyuwusa le nu uvon tsu ufaru.>> 40 Agba a na iroci i mikyon i temei a̱ 'yosun a̱tsuma̱ a̱ lyuci'i, a̱vu aza a Banyami a vadala, reve e ene mikyon n lyuci'i suru a gawusan zuva. 41 Reve ama a Isra'ila a vadala a̱ ka̱mba̱ ya̱'a̱ le, a̱vu ama a Banyami a uwwa wovon lon, adama a na e reve ta̱ meleshe ma̱ riya̱a̱ le ta̱. 42 Ɗaɗa a sumayi aza a Isra'ila a̱ tyo a̱tsumona, agba a gura la'a uvo'on shi. Reve ama a na o uta̱i e ilyuci i ro e reme le o una. 43 Reve a̱ ka̱nda̱ruwa̱ aza a Banyami, a saɓa le babu uro diga Menuha hali a rawa Gibiya na asana. 44 O una ta̱ aza a Banyami ukpakukupa kupa na̱ ukpakukupa kunla̱ (18,000), suru nle aza a na a gurai uvon ɗa. 45 Ana a vadalai reve a suma a uwa a̱tsumona a̱ tyo a aatali a Rimo. Reve aza a Isra'ila o una ta̱ ama ukpakukupa uton (5,000) e re. A lyuwa ta̱ elime a saɓusa aza a Banyami hali a rawa Gidom, reve a̱ da̱shi una ama ukpakukupa ure (2,000) waru.

46 O urana u ndolo ama a Banyami aza a na gurai uvon na̱ matsun me pe'eni ukpakukupa ushin nu ukpakukupa uton (25,000) u ɗa kuwa̱i, suru nle aza a na gurai uvon. 47 Amma ali ukpakuta̱li (600) a vadala ta̱ a suma a uwa a̱tsumona a̱ tyo a aatali a Rimo, uba̱ta̱ u na e isawain hali woto na̱shi. 48 A̱vu ama a Isra'ila a vadala a̱ ka̱mba̱ uba̱ta̱ wa ama a Banyami, a̱vu o una le e ilyuci'i suru na̱ matsun ma pe'eni, oɓolo ni iliyamunga ni ili i na suru a cinai. Ilyuci i na a cinai suru a daɓa le ta̱ akina.