1 Ana a yuwain rana meketeci, a mantsa me ikani i yitabo, Samuson 'ya̱wa̱ ta̱ adama u ca̱sa̱ ka va̱ yi a̱vu u tara meggbele. Reve u damma dada vu ka va̱ yi, <<N ta uwa maa asa na̱ ka va̱.>> Agba dada va̱ yi lyawa yi u uwa pe shi.

2 A̱vu dada vu usheli'i u damma, <<N ta yuwusan majiyan vu 'yuwan yi ta̱ suru suru, adama o ndolo n ca ta̱ ɗe za ta̱ a̱tsuma̱ a aza a na a̱ da̱na̱i oɓolo na̱ a̱vu. Zawa'a va̱ yi la'a yi ulobonu lon shi? Vu zuwa yi o una̱ wa̱ yi.>>

3 Ɗaɗa Samuson tsu damma, <<Gogo ma̱a̱ da̱na̱ nu unusu o ulungusu u na maa yuwaan aza a Filistiya shi.>> 4 Reve Samuson reme musa̱n mu una ukpakuta'atsu (300), a̱vu wu nla̱ le wizan na̱ wizan ejere re. A̱vu u zuwa akata a akina e memere me ezan e re suru. 5 Ana u daɓai akata'a akina, a̱vu u lyawa musa̱n mu una'a a̱tsuma̱ e ishina i mishin ya aza a Filistiya. Reve a̱ kula̱to akatalu ni ishina i mishin, oɓolo na̱ a̱ɗuma̱ a̱ zetun.

6 A̱vu aza a Filistiya a damma, <<Zane ɗa yuwan ntsu ulinga u nda?>>

A̱vu a damma, <<Samuson ɗa, toto vuma va Timna, adama a na dada vu ka va Samuson u tara ta̱ ka va̱ yi a̱vu u ca i'utsa̱ i lolo va̱ yi.>> Reve aza a Filistiya a̱ 'ya̱wa̱ a̱ kula̱to ka'a oɓolo na̱ dada va̱ yi hali a̱ kuwa̱. 7 Reve Samuson damma le, <<Na̱ tsunda tsa ɗa i yuwaan numu, n kucina ta̱ maa bula̱ shi she na̱ n tsupa e ekere a̱ ɗu.>> 8 Reve gba Samuson ga̱la̱ le uga̱lu, wu una le na̱ a̱bunda̱. Reve u zura̱ a̱ cipa̱ u 'ya̱wa̱ u da̱nu a̱ a̱a̱ba̱nu a aatali a Etam.

9 Reve aza a Filistiya a̱ ta̱wa̱ a̱ va̱la̱ a̱tsuma̱ a Yahuda, reve a baza hali a rawa Lehi. 10 Reve aza a Yahuda a damma le, <<Nye i zuwai i ta̱wa̱i adama i yuwan uvon na̱ a̱tsu?>> Reve a̱ usu, <<Tsu ta̱wa̱ ta̱ tsu reme Samuson, a̱vu tsu yuwaan yi cine u yuwaan ntsu.>>

11 A̱vu ama a Yahuda ukpakukupa uta'atsu (3,000) a̱ zura̱ a̱ cipa̱ a̱ a̱a̱ba̱nu a aatali a Etam, reve a damma Samuson, <<Vu reve a na aza a Filistiya a ɗa a̱ ri nu ucira a aci a̱ tsu shi? Cine vu yuwan ntsu tsunda?>>

A̱vu u usu le, <<Cine a yuwan numu, ne ɗa n yuwaan nle.>>

12 Reve a damma yi, <<Tsu zura̱ ta̱ ta̱wa̱ adama tsu nla̱ wu, a̱vu tsu ca aza a Filistiya a̱vu.>>

Reve Samuson damma le, <<Kucinaa numu a na a̱ɗu na aciya̱ɗu a ɗa yoo una mu shi.>>

13 A̱vu a̱ usu yi, <<O'o, wunlu u ɗa goon tsa̱a̱ nla̱ wu a̱vu tsu ca aza a Filistiya. Na amayun tsoo una wu shi.>> A̱vu a̱ nla̱ yi na amunga a sa'avu e re a̱vu o uta̱a̱ yi a gawan diga a̱tsuma̱ a̱ a̱a̱ba̱nu'u. 14 Ana u ta̱wa̱i Lehi, aza a Filistiya a̱ ta̱wa̱ ta̱ a yisaali adama a ga'an na̱ a̱yi. Reve Ruhu va̱ A̱sulazuva cipa̱a̱ yi nu ucira. Reve amunga a na a̱ nla̱yi e ekere a̱ yi a kasa gashi agaruma a na a̱ kula̱toi na akina, a̱vu ili i na a̱ nla̱ niyi o oco e iɗa. 15 A̱vu u tsura̱ eetele a sa'avu o ugbaguzu u mololi, a̱vu u tara yi, a̱vu wu una ali ukpakukupa (1,000) na̱ a̱yi.

16 A̱vu Samuson damma, <<Ne eetele o ugbaguzu u mololi u ɗa mu unai oɓolo zuva vo oɓolo, waru ne eetele o ugbaguzu u mololi u ɗa mu unai oɓolo a ali ukpakukupa (1,000.)>> 17 A̱yi o mokotoo ma adanshi, ɗaɗa u variyi eetele o ugbaguzu u mololi'i, ɗaɗa gba a cayi uba̱ta̱'a̱ aala Ramata Lehi, a na aagaɗi e eetele o Ugbaguzu u Mololi.

18 Waru adama a na wu uwwai akuli a̱bunda̱, reve u pati A̱sulazuva u damma, <<Vu ca ta̱ aagbashi a̱ wu ulyuwu wa aci a gbain a nda. Gogo gba vu ciga mu ta̱ n kuwa̱ na akuli, reve n riya̱ e ekere a aza Filistiya a na koto a paɗai uryumbu shi?>> 19 A̱vu A̱sula̱ a̱ kpa̱tu'wa̱ a̱a̱ka̱ri o ro e iɗa ya Lehi, a̱vu mini mo uta̱ a̱tsuma̱ a̱ yi. Ana Samuson sowoi mini'i, a̱vu ugbozu wa̱ yi u ka̱mba̱ reve u garatsuwa. Adama o ndolo a ɗa a cayi uba̱ta̱'a̱ aala En Hakori, a na lyusu mini vu za vu ɗesu, waru u ta̱ ɗe a̱tsuma̱ a̱ Lehi hali na ana'an.

20 Samuson yuwan ta̱ tsugbain tsa aza a Isra'ila a'wan ushin a rana na aza a Filistiya a̱ da̱na̱i nu ucira a aci e le.