1 Reve Jeruba'al za na a̱yi ɗa Gidiyon na ali o uvon a na a̱ ri oɓolo na̱ a̱yi suru a̱ 'yon na̱ wasasa, a̱vu a̱ va̱la̱ zuzu ne esu a̱ mini a Haro. Aza a Midiya a̱ da̱na̱ ta̱ uva̱lu upasu wu ugana ne ele o uka̱ri zuzu na̱ Masasan ma̱ More. 2 Reve A̱sulazuva a damma Gidiyon, <<A̱za̱ o uvon a na vu ri ne ele a la'a ta̱ a̱bunda̱ lon a na maa ca aza a Midiya e ekere e le, ta̱wa̱ aza a Isra'ila a yuwaan mu uvaɗu a damma, <Ucira u tsu u ɗa u wawa ntsu> wan. 3 Gogo damma ama'a, <Vuma na uwwai wovon suru a̱vu u je'en lipu u ka̱mba̱ o u'wa, u lyawa Masasan ma Giliyadu.> >>* Reve ama ukpakukupa ushin ne ejere (22,000) a̱ ka̱mba̱ a 'wa, a̱vu ukpakukupa kupa (10,000) e isawan.

4 Reve A̱sulazuva a damma Gidiyon, <<Hali n gogo vu ta̱ na̱ ali o uvon a na a la'ai a̱bunda̱ lon. Tara le a̱ 'ya̱wa̱ esu a̱ mini'i, n ta ɗangulaa wu ele ɗe. Na̱ n damma, <Vuma nda ta 'ya̱wa̱ oɓolo na̱ a̱vu,> u ta̱ 'ya̱wa̱. Amma na̱ n damma, <A̱yi ndeɗe a̱a̱ 'ya̱wa̱ na̱ a̱vu shi,> wa̱a̱ 'ya̱wa̱ shi.>>

5 Ɗaɗa Gidiyon tarai ali o uvo'on a̱ tyo a̱ mini'i. Reve A̱sulazuva a damma yi, <<Ne'eshen ali o uvo'on ba̱ta̱ re. Oɓolo a̱ ta̱ aza a na o sowoi mini tsa̱ musa̱n suru. Oɓolo e ire aza a na a̱ kingyoi suru, reve o sowo mini.>> 6 Ali o uvon ukpakuta'atsu (300) goon ɗa e kenei mini ne ekere e le reve o sowo tsa̱ musa̱n. Akapi gba shi suru, a̱ kingyo ta̱ reve o sowo mini.

7 Reve A̱sulazuva a damma Gidiyon, <<Na ama ukpakuta'atsu (300) a nda aza a na o sowoi tsa̱ musa̱'a̱n n ta wawa ɗu n ca aza a Midiya e ekere a̱ ɗu. Damma akapi a ama, vuma suru u ka̱mba̱ o u'wa wa̱ yi.>> 8 Reve Gidiyon zuwa akapi ali o uvon a Isra'ila a̱ ka̱mba̱ o ogodo e le, amma a̱vu u lyawa ali o uvon ukpakuta'atsu (300) oɓolo na̱ a̱yi, aza a na a̱ ushiyi ilyalya na avana a akapi a ama'a.

Uva̱la̱ta̱ wa aza a Midiya gba u da̱na̱ ta̱ za̱la̱ ne ele o uka̱ri'i. 9 Na ayin o ndolo, reve A̱sulazuva a damma Gidiyon,<<'Yon, 'ya̱wa̱ tsa̱ra̱ vu riya̱a̱ aza a Midiya nu uvon, adama a na n ca wu ta̱ ɗe ele e ekere a̱ wu. 10 Amma na̱ vaa uwwusa wovon u na va̱a̱ riya̱a̱ le nu uvon, vu 'ya̱wa̱ oɓolo na̱ Pura za na aa ɓanasaa wu itana yu uvon. 11 Vu uwwa ili i na aza a Midiya a̱ da̱na̱ a dansa. Na̱ a̱yi ndolo koto, vu ta̱ tsura̱ okolo o ugbamu a na va̱a̱ riya̱a̱ uva̱la̱ta̱'a̱ nu uvon.>> A̱vu Gidiyon oɓolo na̱ Pura za na aa ɓanasaa yi itana yu uvon a rawa a̱ nge'en mu uva̱la̱ta̱ wu n'yuwatan uba̱ta̱ u na ali o uvon a̱ ri e ipiri. 12 A̱vu aza a Midiya na aza a Amaleka oɓolo na ama diga asana suru a̱ da̱nu o uka̱ri tso oɓolo a apapari. Aa gura kece arakumi e le shi, adama a na a̱ da̱na̱ ta̱ a̱bunda̱ cine vu revei wuyun wu nge'en m mala.

13 Ana Gidiyon rawai, a̱vu wu uwwa vuma ro a dansaa za̱ va̱ yi alavu a na u yuwain. U da̱na̱ ta̱ a dansa, <<N yuwan ta̱ alavu. Me ene ta̱ a̱a̱kutsu o oopopofu a na a yuwain na̱ yitabo a gandaluwusa a̱ tyo o uva̱la̱ta̱ u tsu. A̱vu u gama oogodo nu ucira, hali oogodoꞌo u ganlyuwa a̱vu u riya̱ e iɗa.>>

14 A̱vu za̱ yi'i u usu, <<Ili i ro i ɗa shi u ka̱ra̱i matsun me pe'eni ma Gidiyon ulobo wa Jowash, vuma va Isra'ila. A̱sula̱ a ca ta̱ ɗe aza a Midiya oɓolo na ali o uvon a̱ tsu suru e ekere a̱ yi.>>

15 Ana Gidiyon uwwai adama a alavu'u nu ucuɗuwu wa̱ yi, a̱vu u von ma̱kpa̱ɓa̱ u yuwaan A̱sulazuva a̱ga̱nda̱. A̱vu u ka̱mba̱ o uva̱la̱ta̱ wa aza a Isra'ila a̱vu u saala, <<'Yoyin! A̱sulazuva a ca ta̱ ɗe oɓolo aza a Midiya e ekere a̱ ɗu.>> 16 Reve u ne'eshen ama ukpakuta'atsu (300) oɓolo a ta'atsu, reve waru u ca za suru aavana na̱ meden na aakata a akina pe.

17 Reve u damma le, <<I ka̱lyuwa̱ mu. Na̱ tsu 'ya̱wa̱ a̱ nge'en mu uva̱la̱ta̱ ma aza a Midiya, i yuwan ununa n yuwain suru. 18 Na̱ a̱mu na ama a na a̱ ri oɓolo na̱ a̱mu tsi ivula̱ avana a̱ tsu, reve a̱ɗu fo yi ivula̱ avana a̱ ɗu a̱ mɓa̱nga̱ mu uva̱la̱ta̱'a̱ suru. Reve i salaa, <Adama a̱ A̱sulazuva na̱ Gidiyon.> >>

19 Gidiyon na ama ukpaku (100) a na a̱ ri oɓolo na̱ a̱yi a rawa a̱ nge'en mo o uva̱la̱ta̱ ma aza a Midiya na ayin uɓatsu, a mantsa ma na a vadalai a̱za̱ e ipiri gan. Reve e ivula̱ avana, reve waru o ɓoso muden n na a̱ ri ne ele e ekere e le. 20 Ɗaɗa oɓolo a ta'atsu'u suru e ivula̱i avana'a a̱vu o ɓoso mude'en. A̱vu a̱ guza̱ akata a akina e le o ukere ugula̱, avana gba o ukere usa'ani u na ee ivula̱. Reve a saala, <<Matsun me pe'eni adama a̱ A̱sulazuva na̱ Gidiyon!>>

21 Reve vuma suru isawan uba̱ta̱ u na u ri a̱ka̱nda̱ruwa̱ o uva̱la̱ta̱'a̱. Reve aza a Midiya suru a suma a̱ka̱nda̱ruwa̱ a yisaali na̱ wovon reve a suma.

22 Mantsa ma na a za a Isra'ila ukpakuta'atsu (300) e ivula̱i avana e le, reve A̱sulazuva a zuwa n'yuwatan n le n ka̱ra̱ a yuwusan nla̱ngi va̱ni le na̱ matsun me pe'eni a̱tsuma̱ o uva̱la̱ta̱ suru. Akapi a ama a na gba o unai shi, reve a suma a̱ tyo Bet Shita zuzu na̱ Zerera, ozo o ro waru gba a suma a̱ tyo Abel Mehola, zuzu na̱ Taba.

23 A̱vu e ɗe aza a Isra'ila diga o ugundo wa Nafutali nu ugundo wa Asha, oɓolo waru nu ugundo wa Manase suru, a̱vu o uta̱ a saɓa aza a Midiya. 24 A̱vu gba Gidiyon lyungu nlingata e iɗa ya agaɗi a Ifiramu suru u damma, <<Zura̱i a̱cipa̱ za̱la̱, i yuwan uvon na aza a Midiya, a̱vu i usa upasata wu Uɗolu wa̱ Urudu na̱ a̱za̱ ɗolu hali a̱ tyo Bet Bara.>>

Ɗaɗa e ɗeyi ama a Ifiramu suru, a̱vu a usa upasata wu Uɗolu wa̱ Urudu na̱ a̱za̱ ɗolu hali a̱ tyo Bet Bara. 25 A̱vu waru e reme azagbain e re a aza a Midiya, Ore na̱ Zeye. A̱vu o una Ore a aatali a Ore, a̱vu waru o una Zeye uba̱ta̱ u na o kpokuso masayan ma̱ ina̱bi ɗe Zeye. A̱vu a lyuwa elime na̱ masaɓa ma aza a Midiya a̱vu a̱ ta̱wa̱a̱ Gidiyon na aaci a Ore na̱ Zeye, uba̱ta̱ u na u shi asana nu Uɗolu wa̱ Urudu.