1 Reve malingata ma̱ A̱sulazuva ma̱ ka̱ra̱ a gawan diga Gilga a̱ tyo Bokim a̱vu u damma, <<Mu uta̱a̱ ɗu ta̱ a̱tsuma̱ a Masar, a̱vu n ta̱wa̱to ɗu e iɗa i na n kucinayi nkaya n ɗu akucunu n ta ca le. N damma ta̱, <Maa kuɗa akucunu a̱ va̱ na̱ a̱ɗu shi ko ke'en. 2 She i yuwan akucunu na ama e iɗa i nda wan, agba yi ɓoso musa'a n le.>* Agba i 'yuwan ta̱ a yuwan tsutoni na̱ a̱mu. Nye i zuwai i yuwain cu'un nda? 3 Adama o ndolo gogo n ta dansa ɗu, ma̱a̱ gba̱ra̱ ama a nda a̱ ma̱ka̱ka̱n ma̱ ɗu shi. O to o'wo ɗu awanda a̱ lipu ɗu, musula̱ n le waru o to o'wo ɗu maza.>>

4 Ana malingata ma̱ A̱sulazuva ma dammai aza a Isra'ila suru ili i nda, ama a shon ta̱ na̱ yisali lon. 5 Adama o ndolo a ɗa e ɗe yi uba̱ta̱'a̱ Bokim.* Reve a yuwaan A̱sulazuva kucci lo uba̱ta̱'a̱.

6 Ana Josuwa lyawai aza a Isra'ila a̱ ka̱ra̱i, a̱ 'ya̱wa̱ ta̱ a̱ usa agadu e iɗa'a, ugundo suru adama u usa agadu a̱ yi. 7 Aza a Isra'ila yuwaan ta̱ A̱sulazuva a̱ga̱nda̱ a rana wuma wa̱ Josuwa suru, na̱ suru a mantsa ma mbara n na n shi wuma cina Josuwa kuwa̱, aza a na waru e enei ili i gbagbain i na A̱sulazuva a yuwayin aza a Isra'ila suru.

8 Josuwa ulobo wa̱ Nun, aagbashi a̱ A̱sulazuva a̱ kuwa̱ ta̱ a̱yi na a'wan ukpaku na̱ kupa (110). 9 A̱vu a̱ ciɗo yi a̱tsuma̱ e iɗa ya agadu a̱ yi, a̱tsuma̱ a Timnat Here* e iɗa ya agaɗi ya Ifiramu, ugana u Masasan ma Ga'ash.

10 Ana ama a mantsa mo ndolo suru a̱ kuwa̱i a̱vu a cina nkaya n le, reve muwun n le n kungwa, agba e reve A̱sulazuva ko e reve ili i na u yuwayin aza a Isra'ila shi.

11 Reve aza a Isra'ila e reme a yuwusan ili i wuya a̱ ma̱ka̱ka̱n ma̱ A̱sulazuva, reve a̱ ka̱ra̱ a yuwusaan a̱ma̱li a Ba'al a̱ga̱nda̱. 12 Reve a lyawa a̱ kurusu A̱sulazuva A̱sula̱ a nkaya n le, za na uta̱a̱ nle a̱tsuma̱ e iɗa ya Masar. Reve a̱ ka̱ra̱ a̱ kurusu a̱ma̱li a ama a na a̱ ri lo uka̱nda̱ruwu ne ele reve e reme a yuwusaan le a̱ga̱nda̱. Reve a zuwa A̱sulazuva a yuwan upan. 13 Reve a lyawa a̱ kurusu A̱sulazuva reve a̱ ka̱ra̱ a yuwusaan Ba'al oɓolo na̱ a̱ma̱li a Ashitore a̱ga̱nda̱. 14 Reve A̱sulazuva a yuwan upan na aza a Isra'ila lon, ɗaɗa gba u zuwa nle e ekere a aza a na a̱a̱ pura̱ ili i na a̱ ri ne ele suru, reve gba a̱ pura̱ itana i le suru. Reve u zuwa le e ekere a n'yuwatan n le aza a na a̱ ri uka̱nda̱ruwu ne ele, a gura geshe aciyele e ekere e le waru shi. 15 Mantsa ma na aza a Isra'ila o uta̱ uvon suru, ukere wa̱ A̱sulazuva u tsu da̱na̱ ta̱ a̱ nla̱ngi ne ele, cine u kucinaa nle. A̱ shi ta̱ a uwa a̱tsuma̱ a̱ a̱tsuma̱lima̱ lon.

16 Ɗaɗa u 'ya̱sa̱in a̱za̱ o uge'etosu,* aza a na a wawa nle e ekere a aza a na a̱ tsu pura̱ itana i le. 17 Na̱ ne suru a zuwaa a̱za̱ o uge'etosu u le atsuvu shi, reve a̱ ka̱ra̱ a yuwusan tsushakala o ure u na a yuwusaan musula̱ n ro a̱ga̱nda̱. A jima pe o ure u na nkaya n le n walasai shi, a vadalashi ta̱ a lyawa ure u tsutoni na̱ wila̱ wa̱ A̱sulazuva u na nkaya n le n kurusuyi. 18 Na̱ A̱sulazuva a̱ 'ya̱sa̱a̱n aza a Isra'ila za vu uge'etosu suru, u tsu da̱na̱ ta̱ oɓolo na̱ a̱yi, reve u wawa ama'a e ekere a n'yuwatan n le a mantsa ma na za vu uge'etosu ndolo ri wuma. Adama a na A̱sulazuva e tse ene ta̱ iliyali ya ama a̱ yi, aza a na a̱ ri a̱ ma̱nga̱ e ekere a aza a na oo ɓongishi le na̱ a̱tsuma̱lima̱. 19 Amma na̱ za vu uge'etosu'u u kuwa̱, reve ama'a a vadala a̱ ka̱mba̱ e re vi idaba na la'ai za vu nkaya n le. O tsu toni ta̱ musula̱ n ro a yuwusaan le tsugbashi na̱ a̱ga̱nda̱. A lyawa linga vi iwuya le na aciyogbamu e le shi.

20 Adama o ndolo reve A̱sulazuva a yuwan upan na aza a Isra'ila lon, a̱vu u damma, <<Adama a na ama a nda a kuɗai akucunu a na n yuwain na̱ nkaya n le waru a zuwaa numu atsuvu shi, 21 m buwa a̱ da̱shi losoo le nɗa n na m buwai n na Josuwa lyawai ana u kuwa̱i shi. 22 N ta yuwan ulinga ne ele n lyungwa̱ aza a Isra'ila me ene ko a̱ ta̱ ka̱mbuwa̱ ugbozu o toni ure u va̱, reve waru a yuwan mmalu cine nkaya n le n yuwain.>> 23 Ne ɗa A̱sulazuva a lyawai nɗa n ndolo, u loso le nu uta̱ shi. Agba waru u ca le e ekere a̱ Josuwa shi.